ແສງວິໄລ ຈັນທະສິລິ ເຊັນສັນຍາຮ່ວມ ສະໂມສອນ ພິດສະນຸໂລກ ເອັຟຊີ 2015
ສະໂມສອນ ພິດສະນຸໂລກ ເອັຟຊີ 2015 ສະໂມສອນຈາກໄທລີກ 4 ໂຊນພາກເຫນືອ ປະເທດໄທ ໄດ້ປະກາດເປັນທາງການວ່າ: ໄດ້ເຊັນສັນຍາກັບ ແສງວິໄລ ຈັນທະສິລິ ກອງກາງປະສົບການສູງ ໄວ 32 ປິ ດ້ວຍສັນຍາ 1 ປີ.
ແສງວິໄລ ກ່າວວ່າ: ຕົນເອງມີຄວາມຮຸ້ສຶກດີໃຈຫລາຍທີ່ຍ້າຍຮ່ວມສະໂມສອນ ພິດສະນຸໂລກ ແລະ ຫວັງວ່າຈະນຳປະສົບການຕົນເອງພາສະໂມສອນເລື່ອນຊັ້ນສູ່ໄທລີກ 3.
ສຳລັບປະຫວັດ ແສງວິໄລ ຈັນທະສິລິ ເກີດໃນວັນທີ 3 ພະຈິກ 1987 ເກິດຢູ່ບ້ານນາຊາຍທອງກາງ ເມືອງນາຊາຍທອງ ນະຄອນຫລວງວຽງຈັນ ເຄີຍຫລິ້ນໃຫ້ກັບຫລາຍສະໂມສອນ ຄື: ປີ 2013-2014 ຫລິ້ນໃຫ້ກັບ ສະໂມສອນ ຮ່ວງແອ໋ງອັດຕະປື ເອັຟຊີ, ປີ 2015-2016 ຫລິ້ນໃຫ້ກັບ ສະໂມສອນ ລ້ານຊ້າງ ຢູໄນເຕັດ, ປີ 2017 ຫລິ້ນໃຫ້ກັບ ສະໂມສອນ ນະຄອນຫລວງ ຢູໄນເຕັດ, ປີ 2018 ຫລິ້ນໃຫ້ກັບ ສະໂມສອນ ລາວໂຕໂຢຕ້າ ເອັຟຊີ. ສ່ວນຜົນງານລະດັບທີມຊາດ ແມ່ນຫລິ້ນໃຫ້ ທີມຊາດລາວຫລາຍລຸ້ນ ນັບຕັ້ງແຕ່ຊຸດເຍົາວະຊົນ 14, 17 ແລະ ທີມຊາດລາວ ຊຸດໃຫຍ່.
ທັງນີ້ ແສງວິໄລ ກາຍເປັນນັກເຕະຄົນລາວຄົນທີສອງທີ່ໄດ້ລົງຫລິ້ນໃຫ້ກັບ ສະໂມສອນ ພິດສະນຸໂລກ ເອັຟຊີ 2015 ເຊິ່ງກ່ອນຫນ້ານັ້ນມີ ສຸກອາພອນ ວົງຈຽງຄຳ ແມ່ນເຄີຍຫລິ້ນໃຫ້ກັບ ສະໂມສອນ ດັ່ງກ່າວ. ມາຮອດປັດຈຸບັນ ປີ 2019 ມີນັກເຕະຈາກລາວເຊັນສັນຍາເປັນທາງການຫລິ້ນຢູ່ລີກປະເທດໄທມີ 7 ຄົນ ປະກອບມີ: ສຸກອາພອນ ວົງຈຽງຄຳ (ໄຊນາດ ເອັຟຊີ ໄທລີກ 1), ຈັນທະຈອນ ທີໂນລາດ (ຣະຢອງ ເອັຟຊີ ໄທລີກ 2), ພຸດທະໄຊ ໂຄຈະເລີນ (ນະຄອນປະຖົມ ເອັຟຊີ ໄທລີກ 3), ແສງວິໄລ ຈັນທະສິລິ (ພິດສະນຸໂລກ ເອັຟຊີ 2015 ໄທລີກ 4), ທົດນີລາດ ສີບຸນເຮືອງ (ພັດທະລຸງ ເອັຟຊີ ໄທລີກ 4), ມິດສະດາ ສາຍໃຕ້ຟ້າ (ປັດຕານີ ເອັຟຊີ ໄທລີກ 4) ແລະ ພັດທະນາ ພົມມະເທດ (ອະຄາເດມີ ຊົນບູຣີ ເອັຟຊີ).
