ດີໃຈ ຊິໄດ້ທາງດີ

​ໂດຍ : ມຶກ​ບໍ່​ແຫ້ງ

ເນື່ອງຈາກລະດູຝົນໃນປີຜ່ານມາເຮັດໃຫ້ເສັ້ນທາງສາຍຫຼັກ ເປ່ເພຢ່າງຫຼວງຫຼາຍ ໃຜໆ ກໍຈົ່ມທຸກ ແຕ່ຮູ້ບໍ່ວ່າ ລັດຖະບານເພິ່ນໄດ້ອະນຸມັດເງິນກ້ອນໃຫຍ່ເພື່ອປັບປຸງເສັ້ນທາງທີ່ເປ່ເພດັ່ງກ່າວແລ້ວ.

ເມື່ອລະດູຝົນຜ່ານມາມີຝົນຕົກໜັກ, ນໍ້າຖ້ວມ ພິລຶກຫຶກຫືນຫຼາຍ ເຮັດໃຫ້ເສັ້ນທາງຫຼາຍເສັ້ນເປ່ເພເສຍຫາຍ, ນັບແຕ່ທາງຮ່ອມ ທາງດິນແດງ ທີ່ຂຶ້ນກັບນຳຄອນຫຼວງວຽງຈັນ ຈົນໄປຮອດບັນດາເສັ້ນທາງສາຍຫຼັກຂອງປະເທດ ເຊັ່ນ ເສັ້ນທາງເລກທີ 13 ເໜືອ ແລະໃຕ້.

ເສັ້ນທາງທີ່ເປ່ເພໃນປີນີ້ ໄດ້ນຳມາເຊິ່ງຄວາມຫຍຸ້ງຍາກໃນການໄປມາພໍສົມຄວນ, ບາງບ່ອນເປັນຂຸມເລິກຕິດຕໍ່ກັນຫຼາຍບ່ອນ, ຂີ່ລົດໄປກໍຍັງຫຼີກບໍ່ໄຫວພຸ້ນລະ, ໄດ້ຄ່ອຍໄປ ຄ່ອຍມາ ຕົວຢ່າງ ແຕ່ນະຄອນຫຼວງວຽງຈັນ ຫາ ວັງວຽງ ທີ່ເຄີຍໃຊ້ເວລາປະມານ 3-4 ຊົ່ວໂມງ ກາຍເປັນ 5-6 ຊົ່ວໂມງ ຈຶ່ງຮອດ ເຊິ່ງເວົ້າເລື່ອງ ປະສິດທິພາບ ຂອງການເດີນທາງແລ້ວ ຖືວ່າຕໍ່າຫຼາຍ. ຮ້າຍແຮງໄປກວ່ານັ້ນ ກໍເຮັດໃຫ້ ມີຄວາມສ່ຽງໃນການເກີດ ອຸບັດຕິເຫດ ເຊິ່ງອາດເຖິງແກ່ຊີວິດ ແລະຊັບສິນໄດ້.

ເມື່ອເປັນເຊັ່ນນັ້ນ ປະຊາຊົນຫຼາຍເຂດແຂວງກໍຈົ່ມເຖິງຄວາມຫຍຸ້ງຍາກໃນການໄປມາ, ເມື່ອບໍ່ດົນຜ່ານມາ ປະຊາຊົນທາງເມືອງນາຊາຍທອງ ນະຄອນຫຼວງວຽງຈັນ ກໍຄືປະຊາຊົນ ເຂດເມືອງໂພນໂຮງ ແຂວງວຽງຈັນ ກໍໄດ້ຮ້ອງທຸກຜ່ານ ລາຍການວິທະຍຸ ແລະ ຜ່ານສື່ອອນລາຍ ເພື່ອອະທິບາຍວ່າ ເສັ້ນທາງຂົງເຂດທີ່ເຂົາເຈົ້າອາໄສຢູ່ຫຍຸ້ງຍາກພຽງໃດ ແລະຮຽກຮ້ອງການສ້ອມແປງໂດຍດ່ວນ ເຊັ່ນດຽວກັນກັບ ປະຊາຊົນເຂດເມືອງປາກຊັນ ແຂວງບໍລິຄຳໄຊ ທີ່ພົບກັບຄວາມຫຍຸ້ງຍາກ ເພາະເສັ້ນທາງເລກທີ 13 ໃຕ້ຜ່ານຕົວເມືອງ ເປ່ເພ ກໍຮຽກຮ້ອງທາງການແກ້ໄຂເຊັ່ນກັນ ແລະຂົງເຂດອື່ນທົ່ວປະເທດ.

ແນ່ນອນແລ້ວລັດຖະບານເຮົາກໍຫຼິງເຫັນບັນຫານີ້ຢ່າງໜັກແໜ້ນ ແລະເພິ່ນກໍໄດ້ປະກາດຈັດສັນງົບປະມານ ຈຳນວນ 500 ຕື້ກີບ ເມື່ອ ເດືອນມັງກອນ 2019 ນີ້ ເພື່ອສ້ອມແປງພື້ນຖານໂຄງລ່າງ ໂດຍສະເພາະເສັ້ນທາງ ແລະລະບົບຊົນລະປະທານ ທີ່ໄດ້ຮັບຄວາມເສຍຫາຍຈາກໄພພິບັດທາງທຳມະຊາດ ເມື່ອລະດູຝົນຜ່ານມາ.

ການນຳໃຊ້ງົບປະມານດັ່ງກ່າວແມ່ນໃຫ້ບູລິມະສິດ ກະຊວງໂຍທາທິການ ແລະກະຊວງກະສິກຳ ແລະປ່າໄມ້. ບັນດາເສັ້ນທາງທີ່ຈະສ້ອມແປງແມ່ນ ຈະຕ້ອງນອນໃນບັນດາເສັ້ນທາງທີ່ຖືກຜົນກະທົບຈາກໄພທຳມະຊາດແທ້ ແຕ່ຍັງບໍ່ທັນຮູ້ຄັກແນ່ວ່າເສັ້ນທາງສາຍໃດ ຈະໄດ້ຮັບການສ້ອມແປງ ດ້ວຍງົບປະມານທີ່ຈັດສັນດັ່ງກ່າວ.

ແຕ່ສິ່ງສຳຄັນ, ເມື່ອມີການຈັດສັນງົບປະມານຄືດັ່ງກ່າວແລ້ວ ຂໍໃຫ້ມີການນຳໃຊ້ຢ່າງຖືກເປົ້າໝາຍ ດ້ວຍຄວາມວ່ອງໄວ ດ້ວຍຄວາມໂປ່ງໄສ ມີປະສິດພາບ, ຮັບປະກັນຄຸນນະພາບການສ້ອມແປງ ເພາະອີກ 3-4 ເດືອນກໍຈະຮອດລະດູຝົນອີກແລ້ວ, ຖ້າເຮົາເຮັດດີ ກໍບໍ່ມີຊິຕິແຕ່ຝົນຟ້າຫັ້ນດອກ.

ພວກເຮົາມັກເວົ້າວ່າ ເສັ້ນທາງຄືສາຍເລືອກ, ຖ້າສາຍເລືອດແຕກຮ່າງກາຍກໍບໍ່ອາດຄົງຕົວຢູ່ໄດ້ ດັ່ງດຽວກັບປະເທດເຮົາ, ເສັ້ນທາງເປ່ເພກໍຮີບຟ້າວສ້ອມແປງ ເຊິ່ງກໍເຊື່ອວ່າ ປະຊາຊົນ ຈະໄດ້ກັບມາໃຊ້ ເສັ້ນທາງທີ່ດີໃນໄວໆນີ້.