ມສ ວຽງຈັນ ໄດ້ຮັບການຢັ້ງຢືນ ເປັນໂຮງຮຽນຄຸນະພາບ ດ້ານການຮຽນ-ການສອນ ສອງພາສາ ລາວ-ຝຣັ່ງ ເປັນຄັ້ງທີ 2
ໂຮງຮຽນ ມສ ວຽງຈັນ ໄດ້ຮັບການຢັ້ງຢືນ ເປັນໂຮງຮຽນຄຸນນະພາບ ດ້ານການຮຽນ-ການສອນຫ້ອງສອງພາສາ ລາວ-ຝຣັ່ງ LabelFranceEducation ຈາກ ເອີຣົບ ແລະ ການຕ່າງປະເທດ ແຫ່ງສາທາລະນະລັດຝຣັ່ງ ເປັນຄັ້ງທີ 2, ຊຶ່ງພິທີມອບ-ຮັບການຢັ້ງຢືນດັ່ງກ່າວ, ໄດ້ມີຂຶ້ນໃນວັນທີ 10 ມັງກອນນີ້, ຢູ່ທີ່ນະຄອນຫຼວງວຽງຈັນ, ລະຫວ່າງທ່ານ ນາງ ເບເນດິກ ເດຊັງ ທູດວັດທະນະທໍາ ປະຈໍາສະຖານທູດ ຝຣັ່ງ ທັງເປັນຜູ້ອໍານວຍການສູນພາສາຝຣັ່ງ ປະຈໍາລາວ ແລະ ທ່ານ ນາງ ວຽງສຸວັນ ພະໄຊສົມບັດ ຜູ້ອໍານວຍການໂຮງຮຽນ ມສ ວຽງຈັນ, ມີທ່ານ ກອງສີ ແສງມະນີ ຮອງລັດຖະມົນຕີກະຊວງສຶກສາທິການ ແລະ ກິລາເຂົ້າຮ່ວມນໍາດ້ວຍ.
ເພື່ອຢັ້ງຢືນຄຸນນະພາບການຮຽນ-ການສອນທີ່ດີເລີດຂອງລະບົບການສິດສອນສອງພາສາໃນທົ່ວໂລກທີ່ສອນເປັນພາສາຝຣັ່ງ. ນອກນີ້, ຍັງສະແດງເຖິງການຮັບຮອງ ແລະ ຮັບຮູ້ ຈາກປະເທດຝຣັ່ງ ກ່ຽວກັບຄຸນນະພາບການຮຽນ-ການສອນເປັນພາສາຝຣັ່ງຂອງໂຮງຮຽນ ມສ ວຽງຈັນ, ຊຶ່ງໂຮງຮຽນແຫ່ງນີ້ ແມ່ນໜຶ່ງໃນສະຖາບັນການສຶກສາທີ່ນອນຢູ່ໃນເຄືອຂ່າຍລະບົບການສິດສອນສອງພາສາ ທີ່ມີເຖິງ 285 ສາຍວິຊາ ໃນ 53 ປະເທດທົ່ວໂລກ, ການທີ່ເປັນສະມາຊິກໃນເຄື່ອຂ່າຍລະດັບໂລກ ຖືເປັນໂອກາດທີ່ດີສໍາສັບສະຖາບັນທີ່ໄດ້ຮັບຮອງຄຸນນະພາບໃນການເຕົ້າໂຮມ ແລະ ແບ່ງປັນດ້ານຊັບພະຍາກອນ ແລະ ວິທີການປະຕິບັດດ້ານການສຶກສາທີ່ຖືກຕ້ອງ.
ໂຮງຮຽນ ມສ ວຽງຈັນ ເປັນໂຮງຮຽນແຫ່ງທໍາອິດ ທີ່ເປີດຮັບລະບົບຫ້ອງຮຽນສອງພາສາ ລາວ-ຝຣັ່ງ ໃນປີ 1995, ຊຶ່ງການຮຽນການສອນພາສາຝຣັ່ງ ເລີ່ມແຕ່ຊັ້ນປະຖົມປີທີ 3 ຈົນເຖິງມັດທະຍົມຕອນປາຍ. 20 ປີຕໍ່ມາ, ໂຮງຮຽນດັ່ງກ່າວ ໄດ້ກາຍເປັນໂຮງຮຽນຕົວແບບໃຫ້ແກ່ອີກ 3 ໂຮງຮຽນສາມັນສຶກສາພາຍໃນປະເທດ ທີ່ມີການຈັດການຮຽນ-ການສອນສອງພາສາ ລາວ-ຝຣັ່ງ. ມສ ວຽງຈັນ ໄດ້ລາງວັນ LabelFranceEducation ຄັ້ງທໍາອິດ ໃນປີ 2016 ຊຶ່ງແມ່ນຄວາມພາກພູມໃຈສໍາລັບໂຮງຮຽນ ກໍຄືບັນດາຄູສອນທຸກຄົນ ແລະ ທຸກພາກສ່ວນທີ່ມີສ່ວນຮ່ວມດ້ານການສຶກສາ ແລະ ການຮຽນ-ການສອນສອງພາສາ ລາວ-ຝຣັ່ງ. ການໄດ້ຮັບລາງວັນດັ່ງກ່າວ ຖືເປັນໝາກຜົນຂອງການຮ່ວມມື ລະຫວ່າງລາວ ແລະ ຝຣັ່ງ ໃນຂະແໜງການສຶກສາ ແລະ ເປັນສິ່ງຢັງຢືນຄຸນນະພາບດີເລີດຂອງລະບົບການຮຽນ-ການສອນສອງພາສາຂອງລັດ.
ປະເທດຝຣັ່ງໄດ້ມີການຮ່ວມມືກັບຫ້ອງການສົ່ງເສີມພາສາຝຣັ່ງ ກະຊວງສຶກສາທິການ ແລະ ກິລາ ເພື່ອສະໜັບສະໜູນຊ່ວຍເຫຼືອຫ້ອງຮຽນສອງພາສາລາວ-ຝຣັ່ງ ດ້ວຍການສະໜອງຊ່ຽວຊານຝຣັ່ງມາປະ, ການຝຶກອົບຮົມດ້ານວິຊາການສິດສອນ ແລະ ດ້ານພາສາໃຫ້ແກ່ຄູສອນ ແລະ ອື່ນໆອີກ.
