ນາຍົກຮຽກຮ້ອງໃຫ້ຍົກສູງຈິດໃຈຊາດເພື່ອແກ້ໄຂຄວາມຫຍຸ້ງຍາກດ້ານເສດຖະກິດ
ທ່ານນາຍົກລັດຖະມົນຕີທອງລຸນສີສຸລິດໄດ້ຮຽກຮ້ອງໃຫ້ພະນັກງານລັດຖະກອນໃນຂະແໜງການທີ່ຕິດພັນກັບຂົງເຂດວຽກງານເສດຖະກິດຍົກສູງຈິດໃຈເພື່ອຊາດຫລາຍຂຶ້ນເພື່ອພ້ອມກັນແກ້ໄຂຄວາມຫຍຸ້ງຍາກດ້ານເສດຖະກິດຂອງປະເທດໃຫ້ຜ່ານພົ້ນໄປໂດຍໄວ.
ການຮຽກຮ້ອງດັ່ງກ່າວມີຂຶ້ນໃນໂອກາດໂອ້ລົມກອງປະຊຸມສະຫລຸບການຈັດຕັ້ງປະຕິບັດວຽກງານແຜນການ-ການເງິນປະຈໍາປີ 2018 ເມື່ອບໍ່ດົນນີ້, ໂດຍທ່ານນາຍົກໄດ້ຍົກໃຫ້ເຫັນວ່າ: ວຽກງານແຜນການ-ການລົງທຶນ, ການເງິນ-ງົບປະມານແລະນະໂຍບາຍເງິນຕາແມ່ນມີຄວາມສໍາຄັນຍິ່ງຕໍ່ການພັດທະນາປະເທດຊາດ, ຂະແໜງແຜນການ-ການລົງທຶນເປັນໃຈກາງໃນການຈັດຕັ້ງປະຕິຜັນຂະຫຍາຍແຜນພັດທະນາເສດຖະກິດ-ສັງຄົມເປັນຕົ້ນວຽກງານການລົງທຶນຂອງລັດ, ການຄຸ້ມຄອງໜີ້ສີນ, ການຜັນຂະຫຍາຍແຜນງົບປະມານແຫ່ງລັດ, ການຈັດເກັບລາຍຮັບແລະການຄຸ້ມຄອງລາຍຈ່າຍ. ເຊິ່ງໃນໄລຍະຜ່ານມາ, ເຖິງວ່າພວກເຮົາໄດ້ມີຜົນສໍາເລັດຫລາຍດ້ານໃນການປັບປຸງແລະຜັນຂະຫຍາຍຕິນິກໍາເພື່ອເປັນບ່ອນອິງໃນການປະຕິບັດວຽກງານຫັນສູ່ລະບຽບກົດໝາຍຢ່າງເຂັ້ມງວດ, ຊຸກຍູ້ການຫັນເປັນທັນສະໄໝ, ເພີ່ມທະວີການປະຢັດນໍາໃຊ້ງົບປະມານລັດ, ຍົກສູງວິໄນແຜນການ-ການເງິນແລະມີຄວາມພະຍາຍາມສູງໃນການປັບປຸງກົນໄກແລະລະບຽບາການຕ່າງໆເພື່ອຄຸ້ມຄອງການລົງທຶນ, ປັບປຸງບັນຍາກາດການດໍາເນີນທຸລະກິດແລະການລົງທຶນຢູ່ປະເທດເຮົາໃຫ້ດີຂຶ້ນແລະໃນຕໍ່ໜ້ານີ້, ຂໍໃຫ້ພະນັກງານລັດຖະກອນໃນຂົງເຂດວຽກງານດັ່ງກ່າວຕ້ອງຍົກສູງຄວາມຮັບພິຊອບໜ້າທີ່ການເມືອງຂອງຕົນໃນພາລະກິດສ້າງເສດຖະກິດ-ສັງຄົມຂອງຊາດໃຫ້ມີຄວາມເຂັ້ມແຂງແລະໜັກແໜ້ນ, ມີຈິດໃຈຮັກຊາດ, ເສຍສະຫລະເພື່ອສ່ວນລວມ, ສັດຊື່ບໍລິສຸດ, ພ້ອມກັນຈັດຕັ້ງປະຕິບັດບັນດາມາດຕະການຕ່າງໆຢ່າງຈິງຈັງປຽບດັ່ງນັກຮົບປະຕິວັດທີ່ຕໍ່ສູ້ໃນສະໜາມຮົບ, ເນື່ອງຈາກເສດຖະກິດຂອງປະເທດເຮົາໃນປັດຈຸບັນຢູ່ໃນສະພາບມີຄວາມຫຍຸ້ງຍາກແລະມີຄວາມສ່ຽງຫລາຍດ້ານ, ດັ່ງນັ້ນພວກເຮົາຕ້ອງໄດ້ເອົາໃຈໃສ່ສຶກສາຄົ້ນຄວ້າ, ຊອກວິທີທາງອອກຈາກສະພາບຄວາມສ່ຽງດັ່ງກ່າວໂດຍໄວແລະບັນຫາສໍາຄັນແມ່ນຈະຕ້ອງມີຄວາມເຂົ້າໃຈ, ເປີດໃຈແລະຮ່ວມຈິດຮ່ວມໃຈສາມັກຄີເປັນນໍ້າໜຶ່ງໃຈດຽວສູ້ຊົນເຮັດໃຫ້ບັນດາຄາດໝາຍຕ່າງໆບັນລຸຄາດໝາຍວາງໄວ້.
ທ່ານນາຍົກລັດຖະມົນຕີກ່າວວ່າ: ໃນປີ 2019 ນີ້, ຈະເອົາໃຈໃສ່ວຽກງານສໍາຄັນຄື: (1) ຜັນຂະຫຍາຍມະຕິກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດຊຸດທີ VIII ແລະດໍາລັດວ່າດ້ວຍການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດແລະແຜນງົບປະມານແຫ່ງລັດໃຫ້ເປັນຮູບປະທໍາ. (2) ລັດຖະບານຈະແຕ່ງຕັ້ງຄະນະຕິດຕາມ, ກວດກາແລະຊຸກຍູ້ການຈັດຕັ້ງປະຕິບັດວຽກງານຈຸດສຸມຕົ້ນຕໍຂອງລັດຖະບານໂດຍມອບໃຫ້ບັນດາຮອງນາຍົກລັດຖະມົນຕີເປັນຫົວໜ້າຄະນະເພື່ອລົງເລິກຊີ້ນໍາໃນແຕ່ລະຂົງເຂດວຽກງານຈຸດສຸມ, ພ້ອມທັງສະຫລຸບລາຍງານຄວາມຄືບໜ້າແລະຜົນການຈັດຕັ້ງປະຕິບັດທຸກໆ 3 ເດືອນ.(3) ທຸກຂະແໜງການແລະທ້ອງຖິ່ນຕ້ອງເອົາໃຈໃສ່ປະຕິບັດ 8 ມາດຕະການຊຸກຍູ້ເສດຖະກິດໃຫ້ມີຄວາມຄືບໜ້າເປັນຮູບປະທໍາແລະລາຍງານລັດຖະບານເປັນແຕ່ລະໄລຍະ. (4) ເລັ່ງປະຕິຮູບວຽກງານການເງິນຢ່າງຮອບດ້ານເພື່ອຮັບປະກັນການເກັບລາຍຮັບໃຫ້ໄດ້ຕາມແຜນ. (5) ປະຕິຮູບລະບົບການລົງທຶນຂອງລັດໃຫ້ມີການຫັນປ່ຽນ, ສອດຄ່ອງຕາມລະບຽບກົດໝາຍ, ມີຈຸດສຸມ, ມີປະສິດທິພາບ, ເໝາະສົມຕາມງົບປະມານເພື່ອບໍ່ໃຫ້ມີໜີ້ສີນເພີ່ມ. (6) ສືບຕໍ່ປັບປຸງລັດວິສາຫະກິດ. (7) ຍູ້ແຮງການລົງທຶນເອກະຊົນພາຍໃນແລະຕ່າງປະເທດໂດຍການປັບປຸງບັນດາລະບຽບການແລະກົນໄກຕ່າງໆ ທີ່ຕິດພັນກັບ 10 ຕົວຊີ້ວັດຄວາມສະດວກໃນການດໍາເນີນທຸລະກິດ. (8) ພັດທະນາເຂດເສດຖະກິດພິເສດໃຫ້ກາຍເປັນທ່າແຮງທີ່ສໍາຄັນໃນການດຶງດູດການລົງທຶນຂອງພາກເອກະຊົນ. (9) ການປະເມີນຜົນໂຄງການລົງທຶນຂອງລັດຕ້ອງປະຕິບັດຢ່າງເຂັ້ມງວດ, ຖືກຕ້ອງຕາມຫລັກວິຊາການແລະສອດຄ່ອງຕາມລະບຽບກົດໝາຍແລະ (10) ແມ່ນເອົາໃຈໃສ່ສຶກສາອົບຮົບການເມືອງ-ແນວຄິດໃຫ້ພະນັກງານລັດຖະກອນ, ໂດຍສະເພາະໃນຂົງເຂດເສດຖະກິດໃຫ້ມີຄວາມຈົ່ງຮັກພັກດີ, ມີຈັນຍາບັນ, ປະຕິບັດວິໄນທາງດ້ານແຜນການ-ການເງິນຢ່າງເຄັ່ງຄັດ, ຖືເອົາຜົນປະໂຫຍດຂອງປະເທດຊາດເປັນຫລັກເພື່ອຫລຸດຜ່ອນປາກົດການຫຍໍ້ທໍ້ໃຫ້ຂາດໂຕ, ຖ້າມີປາກົດການເກີດຂຶ້ນແມ່ນຕ້ອງປະຕິບັດຕາມລະບຽບກົດໝາຍຢ່າງເຂັ້ມງວດ.
