ສະຖາບັນບຸນເກີດສຶກສາເປັນສູນກາງການພັດທະນາຢ່າງມືອາຊີບ
ສະຖາບັນບຸນເກີດສຶກສາ ເປັນໂຮງຮຽນພາກເອກະຊົນເເຫ່ງໜຶ່ງທີ່ເນັ້ນການພັດທະນາການຮຽນ-ການສອນສາຍສາມັນສຶກສາຈົນກາຍມາເປັນວິທະຍາ ໄລເຕັກນິກ ເຕັກໂນໂລຊີ ບີເອັສວີ, ທີ່ໄດ້ສ້າງຕັ້ງຂຶ້ນໃນປີ 2007 ຢູ່ບ້ານໄຊມຸງຄຸນ ເມືອງນາຊາຍທອງ ນະຄອນຫລວງວຽງຈັນ. ສະຖາບັນບຸນເກີດສຶກສາ ເປັນສູນການສຶກສາຢ່າງມືອາຊີບ ນັບເເຕ່ຊັ້ນລ້ຽງເດັກ, ອະນຸບານ, ປະຖົມ-ມັດທະຍົມສຶກສາ ແລະ ສາຍວິທະຍາໄລ ທີ່ໄດ້ຮັບອະນຸຍາດໃຫ້ເປີດການຮຽນ-ການສອນ ຈາກກະຊວງສຶກສາທິການ ແລະ ກິລາ ມາເປັນເວລາ 12 ປີແລ້ວ ແລະ ສາມາດຕອບສະໜອງຄວາມຕ້ອງການທາງດ້ານການສຶກສາໃຫ້ເເກ່ສັງຄົມໄດ້ເປັນຢ່າງດີຕະຫລອດມາ, ໄປຄຽງຄູ່ກັບການພັດທະນາພື້ນຖານໂຄງລ່າງ ແລະ ການສົ່ງຄວາມຮູ້ສໍາລັບສາຍສາມັນສຶກສາ ໃຫ້ສອດຄ່ອງກັບ 5 ຫລັກມູນການສຶກສາ ຂອງກະຊວງສຶກສາທິການ ແລະ ກິລາ ວາງອອກຢ່າງເຂັ້ມງວດ ເພື່ອໃຫ້ສາມາດເຊື່ອມໂຍງກັບພາກພື້ນ ແລະ ສາກົນເທື່ອລະກ້າວ.
ທ່ານ ບຸນເກີດ ສີສຸພັນທອງ ປະທານສະຖາບັນບຸນເກີດສຶກສາ ໃຫ້ຮູ້ວ່າ: ການພັດທະນາຊັບພະຍາກອນມະນຸດ ແມ່ນບຸລິມະສິດໜຶ່ງໃນຍຸດທະສາດລຶບລ້າງຄວາມທຸກຍາກຂອງພັກ-ລັດຖະບານ ໂດຍກະຊວງສຶກສາທິການ ແລະ ກິ ລາ ໄດ້ເນັ້ນໃສ່ການປັບປຸງຄຸນນະພາບການສຶກສາຕາມທິດປະຕິຮູບຄຸນນະພາບການສຶກສາ. ດັ່ງນັ້ນ, ຈຶ່ງໄດ້ມີການສຳຫລວດສະພາບການສຶກສາ ແລະ ຄວາມຕ້ອງການດ້ານບໍລິຫານການສຶກສາຢູ່ຊານເມືອງຕ່າງໆ ດັ່ງຢູ່ເຂດເມືອງນາຊາຍທອງ ແລະ ສ່ວນໜຶ່ງຂອງເມືອງສີໂຄດຕະບອງ, ເຊິ່ງຜ່ານການສຳຫລວດພົບເຫັນວ່າທ່າອ່ຽງຂອງການຂະຫຍາຍຕົວເສດຖະກິດ-ສັງຄົມ ພວມຂະຫຍາຍໄປສູ່ເຂດຊານເມືອງຢ່າງແຂງແຮງ ແລະ ວ່ອງໄວ, ໃນນັ້ນສະຖາບັນບຸນເກີດກໍເປັນໜຶ່ງໃນທ່າແຮງດັ່ງກ່າວ ເຊິ່ງປະກອບມີໂຮງຮຽນລ້ຽງເດັກ, ອະນຸບານ, ຊັ້ນປະຖົມ, ມັດທະຍົມ ແລະ ໄດ້ຂະຫຍາຍຕາໜ່າງການສຶກສາຕື່ມອີກບາດກ້າວໜຶ່ງຄື: ໂຮງຮຽນເຕັກນິກ-ວິຊາຊີບ ບີເອັສວີ (BSV) ໃນຂະແໜງນາຍຊ່າງສີມືຕ່າງໆ ເພື່ອຕອບສະໜອງຄວາມຕ້ອງການຂອງຜູ້ມີຄວາມສົນໃຈຢາກເຂົ້າຮຽນວິຊາຊີບຫລາຍຂະແໜງການ ແລະ ຫລາຍລະດັບ ເຊັ່ນ: ຫລັກສູດໄລຍະສັ້ນ 3 ເດືອນ 6 ເດືອນຄື: ຊ່າງເດີນສາຍໄຟອາຄານ, ຊ່າງຈອດໂລຫະ-ອົກຊີ, ຊ່າງຕິດຕັ້ງແອເຢັນອາຄານ ແລະ ຮຽນຫຼັກສູດໄລຍະຍາວ 3 ປີ ຊັ້ນສູງ ເຊັ່ນ: ຂະແໜງການໂຮງແຮມ-ທ່ອງທ່ຽວ, ບໍລິຫານທຸລະກິດ-ບັນຊີ, ໄຟຟ້າເອເລັກໂຕຣນິກ, ຄອມພິວເຕີ-ພາສາອັງກິດທຸລະກິດ ແລະ ຂະແໜງອາຫານ-ການໂຮງແຮມ ເພື່ອແນໃສ່ບັນດາກຸ່ມຊາວໜຸ່ມ-ເຍົາວະຊົນທີ່ປະລະການຮຽນ ຫຼື ຜູ້ທີ່ຮຽນຈົບຊັ້ນປະຖົມ ມັດທະຍົມຕົ້ນ ແລະ ມັດທະຍົມປາຍ ຜູ້ທີ່ບໍ່ມີເງື່ອນໄຂຮຽນຕໍ່ໃນລະດັບທີ່ສູງກວ່າ ໄດ້ມີໂອກາດຮຽນວິຊາຊີບ, ມີວຽກເຮັດງານທຳ ແລະ ສາມາດຊ່ວຍສ້າງລາຍຮັບໃຫ້ແກ່ຕົນເອງ ແລະ ຄອບຄົວ, ປະກອບສ່ວນເຂົ້າໃນການແກ້ໄຂໄພວ່າງງານຢູ່ໃນສັງຄົມໃຫ້ຫລຸດໜ້ອຍຖອຍລົງ ນອກຈາກນີ້, ຍັງມີໂຮງຮຽນກິນນອນນັບແຕ່ຊັ້ນ ມ1-ມ7 ໃຫ້ສໍາລັບນັກຮຽນຜູ້ຢູ່ຫ່າງໄກນັບທັງໃນນະຄອນຫລວງ ຫລື ຕ່າງແຂວງອີກດ້ວຍ; ສ່ວນສາຍວິທະຍາໄລ ມີນະໂຍບາຍສໍາລັບນັກຮຽນຈົບຊັ້ນ ມ7 ຈະບໍ່ໄດ້ເສັງເຂົ້າມີແຕ່ເອົາໃບນໍາສົ່ງຈາກໂຮງຮຽນທີ່ຕົນຈົບອອກມາກໍ່ສາມາດເຂົ້າຮຽນໄດ້ເລີຍ. ພ້ອມນັ້ນ, ຍັງເປີດໂອກາດໃຫ້ ພະນັກງານຈົບຊັ້ນກາງຢາກມາຍົກລະດັບຕາມສາຍວິຊາຊີບດັ່ງກ່າວກໍຈະຮັບເຂົ້າຮຽນເລີຍ ແລະ ມີນະໂຍບາຍພິເສດສໍາລັບນັກຮຽນທີ່ຍັງບໍ່ມີເງື່ອນໄຂ ແລະ ຄວາມພ້ອມຈ່າຍຄ່າຮຽນ, ນັກຮຽນເກັ່ງ ແລະ ນັກກິລາມີຕົ້ນສັງກັດກໍໄດ້ຮັບນະໂຍບາຍເປັນພິເສດ ແລະ ມີຫໍພັກພ້ອມນະໂຍບາຍອື່ນໆອີກເພື່ອຄວາມສະດວກໃນການສຶກສາຮໍ່າຮຽນຂອງນັກຮຽນ-ນັກສຶກສາຜູ້ທີ່ເຂົ້າມາສຶກສາຢູ່ສະຖາບັນການສຶກສາແຫ່ງນີ້.
ທ່ານ ບຸນເກີດ ສີສຸພັນທອງ ໃຫ້ຮູ້ຕື່ມວ່າ: ຈຸດເດັ່ນຂອງສະຖາບັນບຸນເກີດສຶກສາ ທີ່ພໍ່ແມ່ຜູ້ປົກຄອງໄວ້ເນື້ອເຊື້ອໃຈ ຍ້ອນວ່າມີສະຖານທີ່ກວ້າງຂວາງ, ເອື້ອອໍານວຍຄວາມສະດວກການໄປສົ່ງ-ຮັບນັກຮຽນ ແລະ ທາງໂຮງຮຽນມີກິດຈະກໍາ ຕອບສະໜອງໃຫ້ນັກຮຽນ-ນັກສຶກສາ, ມີເດີ່ນ ແລະ ສະໂມສອນກິລາໃນຮົ່ມ, ເດີ່ນຫຍ້າທຽມ, ສະລອຍນໍ້າ, ສວນຊີວະພາບ, ສະໜາມຕັ້ງຄ້າຍ ພ້ອມທັງໃຫ້ນັກຮຽນລົງປະຕິບັດຕົວຈິງຕາມຂະແໜງການຕ່າງໆໄດ້, ມີຫ້ອງຮຽນທີ່ທັນສະໄໝ, ມີຫ້ອງປະຖົມພະຍາບານ, ຫ້ອງທົດລອງ, ຫ້ອງມູນເຊື້ອ, ຫ້ອງສະຫມຸດ, ຫ້ອງອາຫານ, ຫ້ອງສີລະປະດົນຕີ ໃຫ້ນັກຮຽນໄດ້ ສຶກສາຮຽນຮູ້ ແລະ ສໍາຜັດດ້ວຍຕົນເອງ, ກ້າຄິດ, ກ້າສະແດງອອກ ແລະ ທ່ານ ບຸນເກີດເວົ້າຢໍ້າວ່າ: ໃນຕໍ່ໜ້ານີ້ ສະຖາບັນຂອງຕົນຈະສຸມໃສ່ພັດທະນາໃຫ້ກາຍເປັນສະຖາບັນການສຶກສາແບບຄົບວົງຈອນຂອງນະຄອນຫລວງວຽງຈັນ, ພັດທະນາການຮຽນ-ການສອນທາງອອນລາຍ ແລະ ພັດທະນາໃຫ້ມີປໍ້າເຕີມນໍ້າມັນແບບຢອດຫລຽນ, ທະນະຄານ, ຊຸບເປີມາກເກັດ, ບໍລິການຊັກ-ລິດ ເພື່ອສາມາດຮອງຮັບຄວາມຈະເລີນກ້າວໜ້າ ແລະ ເປັນທາງເລືອກໜຶ່ງຂອງສັງຄົມ.
