ລາວຈະຊຸກຍູ້ການຜະລິດກະສິກໍາໃຫ້ເປັນລະບົບຄົບຊຸດ
ທ່ານຮອງນາຍົກລັດຖະມົນຕີ ສົມດີ ດວງດີ ໃຫ້ຮູ້ວ່າ: ລັດຖະບານໄດ້ມີນະໂຍບາຍ ແລະ ມາດຕະການ ຊຸກຍູ້ສົ່ງເສີມການຜະລິດກະສິກໍາໃຫ້ເປັນລະບົບຄົບຊຸດແລ້ວ ເພື່ອແນໃສ່ຮັບປະກັນດ້ານສະບຽງອາຫານໃຫ້ພຽງພໍ, ສະອາດ ແລະ ປອດໄພ.
ທ່ານຮອງນາຍົກລັດຖະມົນຕີ ເວົ້າວ່າ: ລັດຖະບານ ໄດ້ມອບໃຫ້ຂະແໜງການກ່ຽວຂ້ອງສືບຕໍ່ສໍາຫລວດທ່າແຮງບົ່ມຊ້ອນດ້ານຊັບພະຍາກອນທີ່ດິນ ເພື່ອກໍານົດ ແລະ ສະຫງວນເຂດປູກເຂດລ້ຽງຢູ່ແຕ່ລະທ້ອງຖິ່ນ ເພື່ອສ້າງເປັນໂຄງການພັດທະນາແຕ່ລະປະເພດຜະລິດຕະພັນທີ່ສົດ, ສະອາດ, ປອດສານພິດ ເພື່ອສົ່ງອອກ ແລະ ບໍລິໂພກພາຍໃນ. ໄປຄຽງຄູ່ກັບການສົ່ງເສີມໃຫ້ຄອບຄົວ, ຫົວໜ່ວຍທຸລະກິດຂະໜາດນ້ອຍ-ກາງ ສາມາດດໍາເນີນການຜະລິດ, ການບໍລິການ ແລະ ພັດທະນາເຕັກໂນໂລຊີທັນສະໄໝເຂົ້າໃນຂະບວນການຜະລິດກະສິກໍາເປັນສີນຄ້າທີ່ມີປະລິມານຫລາຍ, ປະຢັດຕົ້ນທຶນ ແລະ ສ້າງມູນຄ່າເພີ່ມ. ເພີ່ມທຶນຮອນເຂົ້າໃນການຄົ້ນຄວ້າວິທະຍາສາດດ້ານກະສິກໍາ-ປ່າໄມ້ໃຫ້ເປັນລະບົບຕໍ່ເນື່ອງ ເພື່ອຮັບໃຊ້ໃຫ້ແກ່ການຜະລິດ, ຊຸກຍູ້ການຜະລິດຂອງຄອບຄົວປະຊາຊົນເຂົ້າເປັນກຸ່ມ, ຈັດຕັ້ງເປັນສະຫະກອນ, ເປັນຟາມ, ມີລະບົບບໍລິຫານຄຸ້ມຄອງທັນສະໄໝ ແລະ ບັນຫາສໍາຄັນແມ່ນຈະເລັ່ງແກ້ໄຂຂອດອັດຕັນຕ່າງໆ ເພື່ອສ້າງສິ່ງອໍານວຍຄວາມສະດວກໃຫ້ປະຊາຊົນ, ຜູ້ປະກອບການຫົວໜ່ວຍທຸລະກິດ, ນັກລົງທຶນພາຍໃນ ແລະ ຕ່າງປະເທດ ໄດ້ເຂົ້າສູ່ການຜະລິດສີນຄ້າ ແລະ ການບໍລິການໄວຂຶ້ນ. ພ້ອມທັງສ້າງ ແລະ ພັດທະນາຊັບພະຍາກອນມະນຸດໃຂະແໜງກະສິກໍາ-ປ່າໄມ້ຂອງທ້ອງຖິ່ນໃຫ້ມີຄວາມສາມາດໃນການຈັດຕັ້ງປະຕິບັດວຽກງານ ແລະ ຄົ້ນຄວ້າວິທະຍາສາດ, ຮູ້ຈັກເສີມຂະຫຍາຍການຄົ້ນຄວ້າວິທະຍາສາດ, ຮູ້ຈັກດຶງດູດການລົງທຶນ, ຊອກຕະຫລາດ, ຮູ້ສ້າງກົນໄກເພື່ອພັດທະນາຂະແໜງກະສິກໍາປຸງແຕ່ງໃຫ້ໜັກແໜ້ນເຂັ້ມແຂງ.
