ປີໃໝ່ສື່ເຮົາຕ້ອງບັນລຸ 8 ຄາດໝາຍ

        ໃນໂອກາດ ສົ່ງທ້າຍປີເກົ່າຕ້ອນຮັບປີໃໝ່ຜ່ານມານີ້ ທ່ານ ບໍ່ແສງຄຳ ວົງດາລາ ລັດຖະມົນຕີກະຊວງ ຖວທ ໄດ້ໃຫ້ກຽດໂອ້ລົມຕໍ່ບັນດາສື່ມວນຊົນໃນພິທີມອບລາງວັນຜະລິດຕະພັນສື່ ແລະພິມຈຳໜ່າຍດີເດັ່ນ ໃນວັນທີ 31 ທັນວ່າ 2018 ທີ່ຜ່ານມາ ໂດຍໄດ້ຮຽກຮ້ອງໃຫ້ຫົວໜ່ວຍສື່ທັງໝົດເອົາໃຈໃສ່ຕໍ່ວຽກງານຂອງຕົນ ເພື່ອບັນລຸ 8 ຄາດໝາຍດັ່ງນີ້:

        1. ເອົາໃຈໃສ່ເພີ່ມທະວີທາງດ້ານການເມືອງແນວຄິດໃຫ້ເອກະພາບກັບແນວທາງ ນະໂຍບາຍຂອງພັກລັດທີ່ວາງອອກ ແລະ ມີຄວາມເປັນເອກະພາບພາຍໃນໃຫ້ໜັກແໜ້ນ, ມີຄວາມສາມັກຄີປຸ້ມລຸມທີ່ແໜ້ນແກ່ນ, ຮູ້ຈໍາແນກມິດສັດຕູຢ່າງຈະແຈ້ງເພື່ອຕີຕ້ານກົນອຸບາຍມ້າງເພທໍາລາຍຂອງອິດທິກໍາລັງປໍລະປັກ ຊິ່ງຍາມໃດພວກມັນກໍບໍ່ໄດ້ລົດລະໃນການແບ່ງແຍກ ຄວາມສາມັກຄີດ້ວຍຫລາຍວິທີ,ຫລາຍຮູບແບບ ແລະ ຫລາຍຊ່ອງທາງ.

        2. ຄົ້ນຄວ້າ ແລະປັບປຸງລະບົບກົງຈັກການຈັດຕັ້ງ ໃຫ້ສອດຄ່ອງກັບວຽກງານຕົວຈິງໃນໄລຍະໃໝ່, ໃຫ້ມີການກວດກາຕີລາຄາ, ຊັ່ງຊາຈຸດດີ-ຈຸດອ່ອນ. ພ້ອມນັ້ນ, ກໍ່ຕ້ອງແບ່ງພາລະບົດບາດໜ້າທີ່ຄວາມຮັບຜິດຊອບລະຫວ່າງສາຍຕັ້ງ ແລະ ສາຍຂວາງຢູ່ສູນກາງ ແລະ ທ້ອງຖິ່ນ, ພາກລັດ ແລະ ພາກເອກະຊົນໃຫ້ຈະແຈ້ງ, ພາວະວິໄສ ເພື່ອອໍານວຍຄວາມສະດວກ, ເປັນບ່ອນອີງໃນການປະຕິບັດໜ້າທີ່ໃຫ້ມີຄວາມຄ່ອງ ເຊິ່ງຈະເປັນການສ້າງບັນຍາກາດໃນການເຮັດວຽກຮ່ວມກັນດ້ວຍບັນຍາກາດທີ່ມ່ວນຊື່ນຟົດຟື້ນ.

        3. ເອົາໃຈໃສ່ໃນການຈັດວາງສັບຊ້ອນພະນັກງານ ແລະ ກໍ່ສ້າງບຸກຄະລາກອນ ໃຫ້ມີຄວາມໜຣັກແໜ້ນທາງດ້ານການເມືອງ, ມີຄວາມຮູ້ຄວາມສາມາດທາງດ້ານວິຊາສະເພາະ ແລະ ແທດເຫມາະກັບຄວາມຮູ້ຄວາມສາມາດພອນສະຫວັນຂອງແຕ່ລະບຸກຄົນ ສາມາດຕອບສະໜອງໄດ້ຕາມຄວາມຮຽກຮ້ອງຕ້ອງການຂອງວຽກງານໃນໄລຍະໃໝ່.

        4. ຕ້ອງພະຍາຍາມຫັນການຄຸ້ມຄອງບໍລິຫານວຽກງານໄປສູ່ການຊົມໃຊ້ເຕັກໂນໂລຊີທີ່ທັນສະໄໝ ເພື່ອຄວາມສະດວກໃນການຄຸ້ມຄອງວຽກງານໃຫ້ເປັນລະບົບ, ສາມາດຕິດຕໍ່ປະສານງານມີຄວາມວ່ອງໄວ, ໂປ່ງໃສ, ສາມາດກວດສອບໄດ້.         5. ເອົາໃຈໃສ່ແກ້ໄຂຄວາມຜິດພາດດ້ານເນື້ອໃນ ແລະ ຮູບການໃນປີທີ່ຜ່ານມາໃຫ້ໄດ້ ດ້ວຍການຍົກສູງຄວາມຮັບຜິດຊອບໃນການບັນນາທິການຕາມທິດຫັນໄປສູ່ຄຸນນະພາບ ແລະ ທັນສະໄໝ, ວ່ອງໄວ, ຊັດເຈນ ແລະ ທັນການ, ສ້າງຄວາມເຂັ້ມແຂງ ແລະ ກຸ້ມຕົນເອງເທື່ອລະກ້າວ ແລະໃຫ້ມີຫລາຍຮູບແບບ, ຫລາຍສີສັນ, ຮັບປະກັນການນໍາເອົາແນວທາງນະໂຍບາຍ, ກົດໝາຍ, ລະບຽບການ, ສາລະຫນ້າຮູ້, ຊີວິດ, ວັດທະນະທໍາ-ສັງຄົມ ທັງຢູ່ພາຍໃນ ແລະ ປະເທດຕ່າງໆໃນໂລກ, ໃຫ້ສາມາດເວົ້າໄດ້ວ່າ:

ສື່ສານມວນຊົນເປັນກະບອກສຽງອັນແຫຼມຄົມຂອງພັກ ແລະ ລັດຢ່າງແທ້ຈິງ.

        6. ເອົາໃຈໃສ່ສູ້ຊົນປະຕິບັດໂຄງການຫັນເປັນດີຈີຕອນທົ່ວປະເທດ, ຂະຫຍາຍໂທລະໂຄ່ງໃຫ້ໄດ້ 350 ບ້ານ ໃນປີ 2019  ແລະ ເອົາໃຈໃສ່ເຮັດໜ້າທີ່ ໃນການໂຄສະນາປີທ່ອງທ່ຽວລາວ-ຈີນໃຫ້ໃຫ້ມີຫລາຍຮູບແບບ, ຫລາຍສີສັນ ແລະ ມີຫລາຍກິດຈະກໍາໃຫ້ມີຄວາມພົດຟື້ນ ເພື່ອດຶງດູດນັກທ່ອງທ່ຽວເຂົ້າມາທ່ຽວລາວໃຫ້ໄດ້ຕາມແຜນການ ທີ່ກໍານົດໄວ້ໃນປີ 2019 ຄື: ບໍ່ໃຫ້ຫລຸດ 4,5 ລ້ານເທື່ອຄົນ, ສ້າງລາຍຮັບໃຫ້ໄດ້ຫລາຍກວ່າ 700 ລ້ານໂດລາສະຫະລັດ.

        7. ຕ້ອງຮູ້ໝູນໃຊ້ສື່ສັງຄົມອອນລາຍເຂົ້າຮັບໃຊ້ວຽກງານຂອງຕົນຢ່າງມີປະສິດທິຜົນ, ເປັນຊ່ອງທາງໃນການເຜີຍແຜ່ຂໍ້ມູນຂ່າວສານຂອງຕົນ ໃຫ້ວ່ອງໄວທັນກັບສະພາບການຄວາມນິຍົມຊົມໃຊ້ຕົວຈິງຂອງສັງຄົມ..

        8. ສືບຕໍ່ດໍາເນີນການຈັດການແຂ່ງຂັນດ້ານວິຊາສະເພາະໃຫ້ເປັນຂະບວນການທີ່ກວ້າງຂວາງໃນຂອບເຂດທົ່ວປະເທດ, ສາມາດຊອກເຫັນໄດ້ບຸກຄົນຫ້າວຫັນ, ບຸກຄົນດີເດັ່ນ, ບົດ, ຂ່າວ, ຮູບພາບທີ່ໂດດເດັ່ນໃຫ້ຫລາຍ ແລະ ຕັ້ງນາມມະຍົດໃຫ້ສົມກຽດ, ມອບລາງວັນໃຫ້ ເໝາະສົມກ່ວາເກົ່າ ເພື່ອເປັນການກະຕຸກຊຸກຍູ້ວຽກງານໃຫ້ມີ ຄວາມຄຶກຄື້ນ, ມີການພັດທະນາຢ່າງຕັ້ງຫນ້າ ແລະ ວ່ອງໄວທັນສະໄໝ, ກະກຽມຕ້ອນຮັບສະເຫລີມສະຫລອງວັນສ້າງຕັ້ງສື່ມວນຊົນລາວ ແລະ ວັນພິມຈໍາໜ່າຍລາວ ຄົບຮອບ 70 ປີ ໃນ ປີ 2020 ທີ່ຈະມາເຖິງໃຫ້ມີບັນຍາກາດທີ່ຄຶກຄື້ນ.