2019 ພວກເຮົາບໍ່ລຶມອັດຕະປື
ໂດຍ : ມຶກບໍ່ແຫ້ງ
ທ່າມກາງຄວາມດີງາມທີ່ພວກເຮົາໄດ້ເຫັນໃນປີ 2018 ນັ້ນ, ເຫດການສະເທືອນຂວັນ ເຂື່ອນແຕກຢູ່ ເມືອງສະໜາມໄຊ ແຂວງອັດຕະປື ຍັງຈະຢູ່ໃນຄວາມຊົງຈຳທີ່ລຶມບໍ່ລົງ.
ເຫດການສັນເຂື່ອນ ເຊປຽນ-ເຊນໍ້ານ້ອຍແຕກ ໂດຍຄົນລາວບໍ່ເຄີຍຄາດຄິດໄດ້ເກີດຂຶ້ນໃນວັນທີ 23 ກໍລະກົດ 2018 ເຊິ່ງໄດ້ກາຍເປັນຫົວຂໍ້ຂ່າວໂດ່ງດັງໄປທົ່ວໂລກໃນຊົ່ວພິບຕາ. ຮູບພາບຂອງຜູ້ຄົນ ງອຍເທິງຫຼັງຄາ, ບາງຜ່ອງກໍ ກຳລັງຂີ່ເຮືອໜີເອົາຕົວຫຼອດ, ອີກບາງຜ່ອງພັດ ຮ້ອງໄຫ້ດ້ວຍຄວາມວາດພະຫວາ ເວດທະນາ ເນື່ອງຈາກ ພັດພາກຈາກຄົນຮັກ ທີ່ໄຫຼໄປນໍາກະແສນໍ້າ ໄດ້ເຮັດໃຫ້ຊາວລາວ ແລະຊາວໂລກຕົກຕະລຶງ ເຖິງຜົນກະທົບ ທີ່ເກີດຂຶ້ນຕໍ່ປະຊາຊົນຈຳນວນຫຼວງຫຼາຍດັ່ງກ່າວ ຊຶ່ງເນື່ອງຈາກມວນນໍ້າ ມະຫາສານໄດ້ທະລຸລົງໃສ່ບັນດາໝູ່ບ້ານທີ່ຢູ່ໃຕ້ເຂື່ອນຢ່າງກະທັນຫັນຂອງ ຄໍ່າຄືນວັນທີ 23 ກໍລະກົດ 2018 ນັ້ນ ເຮັດໃຫ້ ປະຊາຊົນ ເອົາຕົວລົບໜີບໍ່ທັນ ເປັນຈຳນວນຫຼາຍ.
ເຫດການຄັ້ງນີ້ ເຮັດໃຫ້ 19 ບ້ານໄດ້ຜົນກະທົບ ທັນທີ ມີພົນລະເມືອງ 14,440 ຄົນ ໃນນັ້ນ ໄດ້ຮັບຜົນກະທົບໜັກ 4,568 ຄົນ ທີ່ຕ້ອງການຄວາມຊ່ວຍເຫຼືອໂດຍດ່ວນ, ມີຜູ້ເສຍຊີວິດ 40 ຄົນ, ຫາຍສາບສູນອີກຈຳນວນ 65 ຄົນ (ພົບແລ້ວ 34 ຄົນ), ພ້ອມນັ້ນ ມູນຄ່າຄວາມເສຍຫາຍທາງດ້ານ ພື້ນຖານໂຄງລ່າງ, ສັງຄົມ-ສິ່ງແວດລ້ອມ ແມ່ນບໍ່ສາມາດປະເມີນຄ່າໄດ້ (ຂໍ້ມູນຈາກ ຄະນະສະເພາະກິດແກ້ໄຂໄພພິບັດແຫ່ງຊາດ ທີ່ເຜີຍແຜ່ຜ່ານ ເວັບໄຊ໌ ຂອງລັດຖະບານ (http://www.laogov.gov.la) ເມື່ອເດືອນ ຕຸລາ 2018 ແລະກໍຍັງມີຜູ້ເປັນກຳພ້າ, ກຳພອຍຫຼາຍສິບຄົນ.
ຈາກມະຫາໄພພິບັດຄັ້ງນີ້ ໄດ້ມີການຊ່ວຍເຫຼືອກຈາກພາຍໃນ ແລະຕ່າງປະເທດຢ່າງຫຼວງຫຼາຍ ທັງເປັນເງິນສົດ ແລະເຄື່ອງຂອງ ອຸປະໂພກ ແລະບໍລິໂພກ. ອີງຕາມບົດລາຍງານຂອງທ່ານ ສຸພັນ ແກ້ວມີໄຊ ລັດຖະມົນຕີ ກະຊວງແຜນການ ແລະ ການລົງທຶນ ຕໍ່ກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດຊຸດທີ VIII ຄັ້ງວັນທີ 27 ພະຈິກ 2018, ໃຫ້ຮູ້ວ່າ ການຊ່ວຍເຫຼືອຂອງສາກົນໃນວຽກງານແກ້ໄຂໄພພິບັດຢູ່ລາວເຮົາ ແຕ່ວັນທີ 24 ກໍລະກົດ-18 ພະຈິກ 2018 ມີມູນຄ່າຢ່າງມະຫາສານຄື: ມີ 20 ຕື້ກີບ, 93 ລ້ານບາດ (ສະກຸນເງິນໄທ) ແລະ 14 ລ້ານໂດລາສະຫະລັດ ແລະ ໃນກອງປະຊຸມພົບປະເຈລະຈາສອງຝ່າຍລາວ-ເຢຍລະມັນ ເມື່ອເດືອນກັນຍາ ຜ່ານມາຊຶ່ງຝ່າຍເຢຍລະມັນກໍໄດ້ປະກາດຈະໃຫ້ການຊ່ວຍເຫຼືອຟື້ນຟູຫຼັງໄພພິບັດຕື່ມອີກ 10 ລ້ານເອີໂຣ.
ລັດຖະບານໄດ້ ຈັດຕັ້ງຄະນະສະເພາະກິດເພື່ອແກ້ໄຂຂອງ ໄພພິບັດຄັ້ງນີ້ ທັງຍັງມີຄະນະສະເພາະກິດ ກວດສອບບຸກຄົນທີ່ກ່ຽວຂ້ອງກັບການອະນຸຍາດສ້າງເຂື່ອນດັ່ງກ່າວ, ພ້ອມເຮັດວຽກກັບຊ່ຽວຊານສາກົນ ເພື່ອກວດສອບສາເຫດເຂື່ອນແຕກຢ່າງຈິງຈັງ ແລະ ນຳມາເຊິ່ງການກວດສອບຄວາມປອດໄພ ເຂື່ອນທັງໝົດໃນລາວ. ລັດຖະບານຍັງໄດ້ສຸມຄວາມພະຍາຍາມ ຟື້ນຟູຊີວິດການເປັນຢູ່ຂອງປະຊາຊົນ ຜູ້ໄດ້ຮັບຜົນກະທົບ ໂດຍການສ້າງສູນພັກເຊົາ ຊົ່ວຄາວ, ມອບເງິນອຸດໜູນ ແລະອື່ນໆ.
ມາຮອດປັດຈຸບັນ ກ້າວສູ່ 2019 ກໍນັບວ່າ ເກືອບເຄິ່ງປີ ພໍດີ ພາຍຫຼັງເຫດການອັນໜ້າຢ້ານກົວນີ້ໄດ້ເກີດຂຶ້ນ ພວກເຮົາ ກໍອາດຍັງບໍ່ລຶມ ແລະມີຄຳຖາມໃນໃຈວ່າ ພວກເຂົາເຈົ້າ ທີ່ໄດ້ຮັບຜົນກະທົບ ອັນຮ້າຍແຮງໃຫ້ນີ້ ມີຊີວິດດີຂຶ້ນແລ້ວບໍ່? ມັນອາດເປັນໄປໄດ້ທັງສອງຄຳຕອບຄື “ດີຂຶ້ນ ຫຼື ຍັງເທື່ອ” ແຕ່ ພວກເຮົາໄດ້ເຫັນຄວາມພະຍາຍາມຂອງລັດຖະບານ ໃນການຊ່ວຍເຫຼືອດ້ານຕ່າງໆ ແລະ ເຊື່ອໝັ້ນວ່າ ພວກເຮົາຈະໄດ້ເຫັນ ການຟື້ນຟູຊີວິດຂອງປະຊາຊົນເຫຼົ່ານັ້ນດີຂຶ້ນຕາມລຳດັບ ໂດຍໝູນໃຊ້ທຶນຮອນທີ່ມີ ຢ່າງມີປະສິດທິຜົນ ແລະລາຍງານຄວາມຄືບໜ້າຕໍ່ສາທາລະນະຢ່າງຕໍ່ເນື່ອງ.
