ຊາລາ-ມາເນ່-ໂອບາເມຢ໊ອງ ເຂົ້າຊີງ ລາງວັນນັກເຕະດີເດັ່ນອາຟຣິກາ ປີ 2018
ໂມຮາເໝັດ ຊາລາ, ຊາດີໂອ ມາເນ່ ແລະ ປີແອ ເອເມຣິກ ໂອບາເມຢ໊ອງ 3 ຕົວບຸກໃນເວທີພຣີເມຍລີກ ອັງກິດ ເປັນ 3 ຄົນສຸດທ້າຍທີ່ມີລາຍຊື່ເຂົ້າຊີງລາງວັນນັກເຕະຊາຍດີເດັ່ນຂອງທະວີບອາຟຣິກາ (African Footballer of the Year) ປະຈຳປີ 2018 ເປັນ 3 ນັກເຕະໜ້າເກົ່າທີ່ເຂົ້າຊີງໃນປີ 2017.
ໂມຮາເໝັດ ຊາລາ ຕົວເຕັງ ກອງໜ້າທີມຊາດເອຢິບ ໄວ 26 ປີ ຂອງສະໂມສອນລິເວີພູລ ເຈົ້າຂອງລາງວັນນີ້ ໃນປີ 2017 ຜົນງານໃນປີ 2018 ນຳຕົ້ນສັງກັດໄດ້ຮອງແຊ້ມ ຢູຟາ ແຊມປ້ຽນລີກ ຍິງ 46 ປະຕູ ໃນປະຕິທິນປີ 2018, ນຳທີມຊາດເອຢິບ ໄປບານໂລກ 2018 ຄັ້ງທຳອິດໃນຮອບ 28 ປີ, ພ້ອມກັບນຳຕົ້ນສັງກັດລິເວີພູລ ຂຶ້ນນຳໃນພຣີເມຍລີກ ລະດູການນີ້.
ຂະນະທີ່ ຊາດີໂອ ມາເນ່ ອີກໜຶ່ງຕົວບຸກຈາກລເວີພູລ ທີມຊາດເຊເນການ ໄວ 26 ປີ ໄດ້ອັນດັບ 2 ລາງວັນນີ້ ໃນປີ 2017 ຖືວ່າມີອິດທິພົນຕໍ່ເກມບຸກຂອງຫົງແດງໃນທຸກນັດທີ່ລົງສະໜາມ ຍິງ 25 ປະຕູ ໃນປະຕິທິນປີ 2018 ນຳຕົ້ນສັງກັດໄດ້ຮອງແຊ້ມ ຢູຟາ ແຊມປ້ຽນລີກ, ນຳທີມຊາດເຊເນການ ໄປບານໂລກ 2018 ຄັ້ງທຳອິດໃນຮອບ 16 ປີ ແລະ ນຳຕົ້ນສັງກັດລິເວີພູລ ຂຶ້ນນຳໃນພຣີເມຍລີກ ລະດູການນີ້.
ສ່ວນ ປີແອ ເອເມຣິກ ໂອບາເມຢ໊ອງ ກອງໜ້າທີມຊາດກາບ໋ອງ ໄວ 29 ປີ ໄດ້ອັນດັບ 3 ລາງວັນນີ້ ໃນປີ 2017 ເຂົ້າຊີງເປັນປີທີ 4 ຕິດຕໍ່ກັນ ເຄີຍໄດ້ລາງວັນນີ້ໃນປີ 2015 ສະໄຫມຢູ່ກັບ ໂບຣຸສເຊຍ ດອດມຸນ, ໃນປະຕິທິນປີ 2018 ໂອບາເມຢ໊ອງ ຍິງໄດ້ 32 ປະຕູ.
ໂດຍຈະປະກາດຈະມີຂຶ້ນໃນວັນທີ 8 ມັງກອນ 2019 ທີ່ນະຄອນຫລວງດາກ້າ ປະເທດເຊເນການ. ຊາລາ ຫາກໍໄດ້ຮັບລາງວັນນັກເຕະດີເດັ່ນອາຟຣິກາ ປະຈຳປີ 2018 ຈາກການຈັດຂອງສຳນັກຂ່າວ BBC ຂອງອັງກິດ ໃນເດືອນທັນວາ 2018 ຜ່ານມາ ເອົາຊະນະ ເມດີ້ ເບນາເຕຍ, ຄາລີດູ ຄູລີບາລີ້, ຊາດີໂອ ມາເນ່ ແລະ ໂທມາສ ປາຕີ້ ດ້ວຍຄະແນນໂຫວດຈາກແຟນບານເໜືອຄູ່ແຂ່ງ 650.000 ຄະແນນ.
