ຍີ່ປຸ່ນອະນຸຍາດໃຫ້ເດັກອະນຸບານຮຽນຟຣີ
ລັດຖະບານຍີ່ປຸ່ນອະນຸມັດໂຄງການເພີ່ມການສະໜັບສະໜູນດ້ານການສຶກສາ ແລະ ການເບິ່ງແຍງເດັກ ເຊິ່ງລວມທັງການໃຫ້ທຶນຮຽນລະດັບຊັ້ນອະນຸບານໃນໂຮງຮຽນລັດຖະບານຟຣີສຳລັບເດັກທຸກຄົນທີ່ມີອາຍຸລະຫວ່າງ 3-5 ປີ ໂດຍມີຜົນບັງຄັບໃຊ້ໃນເດືອນຕຸລາ 2019.
ນະໂຍບາຍດັ່ງກ່າວ ມີຈຸດປະສົງເພື່ອແກ້ໄຂບັນຫາອັດຕາການເກີດທີ່ຫລຸດລົງ. ນອກຈາກນີ້ ລັດຖະບານຈະມອບສະຫວັດດີການເບິ່ງແຍງເດັກເວລາກາງເວັນຟຣີຈົນເຖິງອາຍຸ 2 ປີສຳລັບຄອບຄົວທີ່ມີລາຍຮັບຕໍ່າ ໂດຍຈະເລີ່ມມີຜົນແຕ່ເດືອນຕຸລາ 2019. ອີກທັງຍັງມີໂຄງການມອບທຶນການສຶກສາແກ່ນັກສຶກສາລະດັບມະຫາວິທະຍາໄລທີ່ມາຈາກຄອບຄົວທີ່ມີລາຍຮັບຕໍ່າ ເຊິ່ງຈະເລີ່ມຕົ້ນໃນເດືອນເມສາ 2020.
ສຳນັກຂ່າວກຽວໂຕລາຍງານວ່າ: ນະໂຍບາຍດັ່ງກ່າວຈະເລີ່ມຕົ້ນຂຶ້ນໃນໄລຍະທີ່ລັດຖະບານກຽມປັບເພີ່ມພາສີການບໍລິໂພກຈາກ 8% ເປັນ 10% ໃນເດືອນຕຸລາ 2019 ໂດຍມີການຈັດສັນງົບສ່ວນໜຶ່ງໄປໃຊ້ກັບນະໂຍບາຍດັ່ງກ່າວ.
ທ່ານ ຊິນໂຊ ອາເບະ ນາຍົກລັດຖະມົນຕີຍີ່ປຸ່ນ ເປີດເຜີຍໃນລະຫວ່າງກອງປະຊຸມລັດຖະບານວ່າ: “ຂ້າພະເຈົ້າຈະປ່ຽນລະບົບປະກັນສັງຄົມຂອງປະເທດ ເພື່ອສ້າງຄວາມໝັ້ນໃຈໃຫ້ປະຊາຊົນທຸກເພດໄວ ນັບແຕ່ເຍົາວະຊົນໄປຈົນເຖິງໄວອາຍຸສູງ, ໂຄງການການສຶກສາຟຣີຖືເປັນບາດກ້າວທຳອິດທີ່ສຳຄັນ”.
