ເສດຖະກິດຈີນເຕີບໃຫຍ່ສົ່ງຜົນຕໍ່ ວົງການສະນຸກເກີແນວໃດ ?
ໃນຍຸກປັດຈຸບັນນີ້ ປະຕິເສດບໍ່ໄດ້ວ່າຈີນກາຍເປັນປະເທດມະຫາອຳນາດທາງເສດຖະກິດຂອງໂລກອີກ 1 ປະເທດ ຈົນຂຶ້ນມາເປັນປະເທດຜູ້ນຳທາງການຄ້າອັນດັບຕົ້ນໆຂອງໂລກ, ຂະນະທີ່ປະເທດມະຫາອຳນາດອັນດັບ 1 ຂອງໂລກ ຄືອາເມລິກາ ຍັງຕ້ອງສະເທືອນ.
ຜູ້ຊ່ຽວຊານທາງເສດຖະກິດທ່ານໜຶ່ງເຄີຍວິເຄາະວ່າ: ເສດຖະກິດຈີນເປັນເສດຖະກິດແບບຕະຫລາດສັງຄົມນິຍົມ, ເປັນເສດຖະກິດໃຫຍ່ທີ່ສຸດອັນດັບສອງຂອງໂລກ ຕາມ GDP ລາຄາຕະຫລາດ ແລະ ເປັນເສດຖະກິດໃຫຍ່ທີ່ສຸດຂອງໂລກ ຕາມຄວາມເທົ່າທຽມຂອງອຳນາດຊື້. ຈາກການອ້າງອີງໂດຍຂໍ້ມູນຂອງກອງທຶນການເງິນສາກົນ ຈຶ່ງມີຫລາຍຄົນທວາຍວ່າ: ໃນອີກບໍ່ດົນ ຈີນຈະແຊງອາເມລິກາຂຶ້ນໄປເປັນປະເທດມະຫາອຳນາດອັນດັບ 1 ຂອງໂລກ ທາງເສດຖະກິດໄດ້ຢ່າງແນ່ນອນ.
ຈາກການຈະເລີນເຕີບໃຫຍ່ທາງເສດຖະກິດທີ່ວ່ອງໄວ ເຮັດໃຫ້ໄລຍະ 10 ປີມານີ້ ຈີນເລີ່ມເປັນເຈົ້າພາບຈັດການແຂ່ງຂັນກິລາລາຍການສຳຄັນຫລາຍຂຶ້ນ ນັບແຕ່ເປັນເຈົ້າພາບໂອແລມປິກເກມ ລະດູຮ້ອນ ໃນປີ 2008.
ເຊັ່ນດຽວກັບວົງການສະນຸກເກີ ທີ່ຈີນເລີ່ມດຶງການແຂ່ງຂັນລາຍການສຳຄັນລະດັບໂລກມາຈັດເອງເພີ່ມຂຶ້ນເລື້ອຍໆ ແລະ ແຕ່ລະລາຍການຍັງມີການຊີງເງິນລາງວັນຈຳນວນມະຫາສານນຳອີກ. ຕົວຢ່າງການແຂ່ງຂັນສະນຸກເກີອາຊີບໂລກໃນລະດູການປັດຈຸບັນ (2018-19) ຈີນເປັນເຈົ້າພາບຈັດການແຂ່ງຂັນເຖິງ 6 ລາຍການ ປະກອບມີ: ໄຫ່ໜິງ ໂອເພັນ, ເວິລ ໂອເພັນ, ຊຽງໄຮ້ ມາສເຕີ, ໄຊນ່າ ແຊມປ້ຽນຊິນ, ອິນເຕີເນຊັນແນລ ແຊມປ້ຽນຊິບ ແລະ ໄຊນ່າ ໂອເພັນ ໂດຍລາຍການ ໄຊນ່າ ໂອເພັນ ເຖິງວ່າຈະບໍ່ແມ່ນ 3 ລາຍການໃຫຍ່ໃນທຣິບເປິລ ຄຣາວ, ແຕ່ມີເງິນລາງວັນລວມໃຫ້ຊີງສູງເຖິງ 1 ລ້ານປອນ ຖືເປັນລາຍການທີ່ຊີງເງິນລາງວັນລວມຫລາຍທີ່ສຸດເປັນອັນດັບ 2 ຮອງຈາກການຊີງແຊ້ມໂລກພຽງລາຍການດຽວເທົ່ານັ້ນ ໂດຍລາຍການຊີງແຊ້ງໂລກ ຊີງເງິນລາງວັນລວມ 2.231.000 ປອນ.
ນີ້ຄືຜົນພວງມາຈາກເສດຖະກິດຂອງຈີນທີ່ເຕີບໃຫຍ່ແບບກ້າວກະໂດດໄກ ຈົນສົ່ງຜົນໃຫ້ດິນແດນມັງກອນກາຍເປັນເຈົ້າພາບຈັດການແຂ່ງຂັນສະນຸກເກີລາຍການສຳຄັນຫລາຍຂຶ້ນ ແລະ ຫລັງຈາກນີ້ ເສດຖະກິດຂອງຈີນຍັງຮຸ່ງເຮືອງຂຶ້ນໄປເລື້ອຍໆອີກ ແຟນສະນຸກເກີອາດຈະເຫັນສະນຸກເກີລາຍການດີໆມາຈັດຢູ່ປະເທດຈີນຫລາຍຂຶ້ນ ແລະ ສຳຄັນເງິນລາງວັນອາດຈະເພີ່ມຂຶ້ນໄປນຳ.
ເຖິງຢ່າງໃດກໍຕາມ, ອັງກິດທີ່ເປັນປະເທດຕົ້ນກຳເນີດກິລາສະນຸກເກີ ຄົງບໍ່ຍອມງ່າຍໆທີ່ຈະໃຫ້ຈີນກາຍເປັນປະເທດຫລັກໃນການຈັດການແຂ່ງຂັນສະນຸກເກີອາຊີບໂລກໃນອະນາຄົດ ໂດຍກ່ອນໜ້ານີ້ປີ 2017 ສະມາຄົມບິລລຽດ ແລະ ສະນຸກເກີອາຊີບໂລກ (WPBSA) ທີ່ມີທ່ານ ເຈສັນ ເຟີກູສັນ ຊາຍໄວກາງຄົນຊາວອັງກິດເປັນປະທານ ໄດ້ຕໍ່ສັນຍາຢ່າງເປັນທາງການໃຫ້ໂຮງລະຄອນຄຣູຊິເບິລ ເມືອງເຊບຟິລ ປະເທດອັງກິດ ເປັນເຈົ້າພາບສະນຸກເກີຊີງແຊ້ມໂລກອອກໄປອີກ 10 ປີ ຫລື ຮອດປີ 2027 ເພື່ອປ້ອງກັນບໍ່ໃຫ້ຈີນນຳສະນຸກເກີລາຍການໃຫຍ່ທີ່ສຸດໃນໂລກໄປຈັດຢູ່ຈີນ.
