ຫ້ອງການປະກັນສັງຄົມແຫ່ງຊາດ ຈັດກອງປະຊຸມປະຈໍາປີ 2018
ໃນລະຫວ່າງວັນທີ 20-21 ທັນວານີ້, ຫ້ອງການກອງທຶນປະກັນສັງຄົມແຫ່ງຊາດ ໄດ້ຈັດກອງປະຊຸມປະຈໍາປີ 2018 ຂຶ້ນທີ່ນະຄອນປາກເຊ ແຂວງຈຳປາສັກ ໂດຍການເປັນປະທານຂອງ ທ່ານ ຄໍາແກ້ວ ສານບຸນຄູນໄຊ ຮອງລັດຖະມົນຕີກະຊວງແຮງງານ ແລະ ສະ ຫວັດດີການສັງຄົມ, ມີອຳນວຍການຫ້ອງການກອງທຶນປະກັນສັງຄົມແຫ່ງຊາດ ແລະ ສູນບໍລິການກອງທຶນປະກັນສັງຄົມ (ສກປສ) ທົ່ວປະເທດເຂົ້າຮ່ວມນຳດ້ວຍ.
ກອງປະຊຸມໄດ້ຮັບຟັງລາຍງານດໍາເນີນງານຂອງກອງທຶນດັ່ງກ່າວໃນໜຶ່ງປີຜ່ານມາ ແລະ ກໍານົດແຜນການປະຈໍາປີ 2019 ແລະ ບັນດາຜູ້ເຂົ້າຮ່ວມໄດ້ປະກອບຄຳຄິດຄຳເຫັນໃສ່ແຕ່ລະບັນຫາ ເພື່ອຮັບປະກັນໃນການດໍາເນີນງານຂອງຕົນ, ຈາກນັ້ນ ທ່ານ ຮອງລັດຖະມົນຕີໄດ້ໂອ້ລົມແນະນໍາບັນຫາຕ່າງໆ ເຊິ່ງຫ້ອງການກອງທຶນປະກັນສັງຄົມແຫ່ງຊາດ ນັບແຕ່ສູນກາງລົງ ຮອດທ້ອງຖິ່ນຈະຕ້ອງໄດ້ພ້ອມກັນປັບປຸງແກ້ໄຂມີດັ່ງນີ້: 1. ຕ້ອງໄດ້ເພີ່ມທະວີການສຶກສາອົບຮົມການເມືອງແນວຄິດໃຫ້ພະນັກງານຂອງຕົນໃຫ້ມີຄວາມຮັບຜິດ ຊອບ ແລະ ເປັນເຈົ້າການໃນການຈັດຕັ້ງປະຕິບັດພັນທະ ແລະ ໜ້າທີ່ການເມືອງຂອງຕົນ, ມີຄວາມສັດຊື່ບໍລິສຸດ, ຮັກອາຊີບ ບໍ່ສວຍໃຊ້ສິດ ແລະ ໜ້າທີ່ຂອງຕົນໄປໃນທາງບໍ່ຖືກຕ້ອງ. 2. ເອົາໃຈໃສ່ປັບປຸງແບບແຜນວິທີເຮັດວຽກທີ່ດີ ແລະ ແກ້ໄຂບັນດາຂໍ້ຄົງຄ້າງຕ່າງໆໃຫ້ຂາດຕົວ. 3. ສົ່ງເສີມການພັດທະນາວິຊາການປະກັນສັງຄົມໃຫ້ກ້າວໜ້າທັນສະໄໝທຽບເທົ່າສາກົນ.
