ເປີດນຳໃຊ້ສະຖານນີຖ່າຍທອດຕໍ່ລາຍການວິທະຍຸ ແລະ ໂທລະພາບເຂດພາກກາງ
ພິທີມອບ-ຮັບ
ແລະ ເປີດນຳໃຊ້ສະຖານນີຖ່າຍທອດຕໍ່ລາຍການວິທະຍຸ ແລະ ໂທລະພາບເຂດພາກກາງ, ຊຶ່ງຕັ້ງຢູ່ບ້ານໂພໄຊ ເມືອງພະລານໄຊ, ແຂວງສະຫວັນນະເຂດ ໄດ້ຈັດຂຶ້ນໃນວັນທີ 24 ທັນວານີ້. ພາຍຫລັງດຳເນີນການກໍ່ສ້າງມາເປັນເວລາ 3 ປີ, ໂດຍການຊ່ວຍເຫລືອຂອງ ສສ ຫວຽດນາມ ເຂົ້າຮ່ວມພິທີດັ່ງກ່າວມີທ່ານ ສະຫວັນຄອນ ລາຊະມຸນຕີ
ຮອງລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ທ່ານ ຫງວຽນ ວັນ ຈິ ຮອງຫົວໜ້າກົມແຜນການ-ການເງິນ, ສະຖານນີວິທະຍຸກະຈາຍສຽງຫວຽດນາມ, ທ່ານ ທ່ອນແກ້ວ ພຸດທະໄກຍະລາດ ຮອງເຈົ້າແຂວງສະຫວັນນະເຂດ.
ທ່ານ ສະຫວັນຄອນ ລາຊະມຸນຕີ ໄດ້ມີຄໍາເຫັນໃນພິທີວ່າ: ໂຄງການກໍ່ສ້າງສະຖານນີແຫ່ງນີ້, ເປັນໂຄງການທີ 4 ຂອງການຮ່ວມມືຊ່ວຍເຫລືອຂອງລັດຖະບານຫວຽດນາມ ຖັດຈາກສະຖານີຕັ້ງຢູ່ແຂວງຈໍາປາສັກ, ຫລວງພະບາງ ແລະ ອຸດົມໄຊ, ເຊິ່ງທັງ 3 ແຫ່ງດັ່ງກ່າວໄດ້ເປີດນໍາໃຊ້ຢ່າງເປັນທາງການແລ້ວ.
ສະຖານນີແຫ່ງນີ້, ຈະຊ່ວຍໃຫ້ການແຜ່ກະຈາຍຄື້ນວິທະຍຸແຫ່ງຊາດສາມາດກວມເອົາທັງໝົດຂອງແຂວງສະຫວັນນະເຂດ, ສ່ວນໜຶ່ງຂອງແຂວງຄຳມ່ວນ ແລະ ແຂວງໃກ້ຄຽງອື່ນໆ ເມື່ອປະສານກັບວິທະຍຸເຂດທີ່ປາກຊ່ອງ ເຫັນວ່າ ວິທະຍຸແຫ່ງຊາດຄື້ນ 103,7 ເມກາເຮີດ ແມ່ນສາມາດກະຈາຍສັນຍານກວມເອົາ 100% ຂອງເຂດພາກໃຕ້ ແລະ ສັນຍານໂທລະພາບກວມປະມານ 75% ຂອງແຂວງສະຫວັນນະເຂດ. ໃນຂະນະດຽວກັນ, ກໍຈະຊ່ວຍໃຫ້ການພັດທະນາວົງການສື່ມວນຊົນລາວກ້າວໜ້າທັນສະໄໝ ແລະ ຈະນຳເອົາຂໍ້ມູນຂ່າວສານຕ່າງໆລົງສູ່ພື້ນຖານປະຊາຊົນລາວບັນດາເຜົ່າໄດ້ກວ້າງຂວາງ ແລະ ທົ່ວເຖິງ, ທັງເປັນເວທີເສີມຂະຫຍາຍສາຍພົວພັນມິດຕະພາບແບບພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ ອັນເປັນມູນເຊື້ອມາແຕ່ດົນນານແລ້ວນັ້ນໃຫ້ນັບມື້ນັບແຕກດອກອອກຜົນຂຶ້ນໄປເລື້ອຍໆ.
ໂຄງການນີ້ໄດ້ວາງສີລາລຶກໃນເດືອນທັນວາ 2015 ກວມເນື້ອທີ່ກວ້າງ 10.972 ຕາແມັດ, ເຊິ່ງມີມູນຄ່າການກໍ່ສ້າງທັງໝົດຫລາຍກວ່າ 115 ຕື້ດົງ ຫລື ປະມານ 42 ຕື້ກີບ. ໄດ້ຕິດຕັ້ງເຄື່ອງສົ່ງໂທລະພາບດີຈີຕອນຂະໜາດ 5 ກິໂລວັດ, ເຄື່ອງສົ່ງວິທະຍຸ 20 ກິໂລວັດ.
ມາຮອດປັດຈຸບັນ, ວິທະຍຸແຫ່ງຊາດຄື້ນ 103,7 ເມກາເຮີດ ສາມາດກະຈາຍສັນຍານກວມປະມານ 90% ຂອງພື້ນທີ່ທົ່ວປະເທດ ແລະ ສັນຍານໂທລະພາບກວມປະມານ 65% ຂອງພື້ນທີ່ທົ່ວປະເທດ.
