ແມນຢູ ກຽມຕັ້ງ ໂອເລ ກຸນນາຣ໌ ໂຊລຊາ ເປັນຜູ້ຈັດການທີມຊົ່ວຄາວ
ເດິ ມິເຣີ ລາຍງານຂ່າວ ແມນເຊັສເຕີ ຢູໄນເຕັດ ເລັ່ງຈະແຕ່ງຕັ້ງ ໂອເລ່ ກຸນນາຣ໌ ໂຊລຊາ ອະດີດຫົວຫອກຂວັນໃຈແຟນ ແມນຢູ ເຂົ້າມາເຮັດໜ້າທີ່ຄຸມ ແມນເຊັສເຕີ ຢູໄນເຕັດ ຊົ່ວຄາວຈົນຈົບລະດູການນີ້ ໂດຍໄດ້ມີການຕິດຕໍ່ໄປແລ້ວ ແລະ ຕອນນີ້ຕ້ອງລຸ້ນວ່າລາວສົນໃຈກອບກູ້ວິກິດທີມ ຫລື ບໍ່.
ໂອເລ່ ກຸນນາຣ໌ ໂຊລຊາ ຕຳນານຫົວຫອກຊຸບເປີຊັບຂອງ ແມນເຊັສເຕີ ຢູໄນເຕັດ ກາຍເປັນຕົວເລືອກສຳຄັນທີ່ຈະໄດ້ດຳລົງຕຳແໜ່ງຄຸມທີມ ແມນເຊັສເຕີ ຢູໄນເຕັດ ຊົ່ວຄາວໃນໄລຍະເວລາທີ່ເຫລືອຂອງລະດູການນີ້ ຫລັງສະໂມສອນໄລ່ ໂຊເຊ ມູຣິນໂຢ ຜູ້ຈັດການທີມຊາວໂປຣຕຸເກດ ອອກຈາກຕຳແໜ່ງ ຍ້ອນຜົນງານບໍ່ດີໃນໄລຍະຜ່ານມາ.
ການກະທຳດັ່ງກ່າວຂອງຜູ້ບໍລິຫານເກີດຂຶ້ນຫລັງເກມທີ່ ມູຣິນໂຢ ອອກໄປຖືກ ລິເວີພູລ ຫລິ້ນງານ 1-3 ທີ່ສະໜາມແອນຟິລ ໃນທ້າຍອາທິດຜ່ານມາ ແລະ ການເສຍໄຊໃນນັດນີ້ເຮັດໃຫ້ທີມຢູ່ອັນດັບ 6 ມີຄະແນນຕາມຫລັງ ລິເວີພູລ ຜູ້ນຳຝູງເຖິງ 19 ຄະແນນ.
ສຳລັບເວລານີ້ ແມນເຊັສເຕີ ຢູໄນເຕັດ ພະຍາຍາມຈະຫາຜູ້ຈັດການທີມຄົນໃໝ່ເຂົ້າມາເຮັດວຽກຊົ່ວຄາວໄປກ່ອນໃນໄລຍະທີ່ເຫລືອຂອງລະດູການນີ້ ໂດຍມີຊື່ຂອງ ໂລຣ໊ອງ ບລ໊ອງ, ໄມເຄິລ ຄາຣິກ ແລະ ໂຊລຊາ.
ເຖິງຢ່າງໃດກໍຕາມ ອະດີດກອງໜ້າທີມຊາດນໍເວ ເຊິ່ງໄດ້ຊື່ວ່າເປັນສຸດຍອດຊຸບເປີຊັບຂອງ ແມນເຊັສເຕີ ຢູໄນເຕັດ ເພາະມັກຈະຖືກສົ່ງລົງມາເປັນຕົວສຳຮອງ ແລະ ຍິງປະຕູສຳຄັນໄດ້ຫລາຍເກມ. ທັງນີ້ ແມນເຊັສເຕີ ຢູໄນເຕັດ ຕ້ອງການຕົວເລືອກທີ່ມີປະສົບການ ເພື່ອເຂົ້າມາຮັບໜ້າທີ່ໃນເວລາທີ່ເຫລືອຂອງລະດູການ 2018-19 ກ່ອນຈະມີການແຕ່ງຕັ້ງຜູ້ຈັດການທີມຖາວອນໃນຊ່ວງຊຳເມີ້ນີ້.
