ວຽກງານຂົນສົ່ງຄຸນນະພາບແລະລາຄາ ທີ່ຄວນປັບປຸງ

ໂດຍ : ໝຶກບໍ່ແຫ້ງ

ວຽກງານ ຄົມມະນາຄົມຂົນສົ່ງແມ່ນໝາກຫົວໃຈທີ່ສຳຄັນຂອງການພັດທະນາ ແລະເຊື່ອມໂຍງກັບພາກພື້ນ ແຕ່ການສຶກສາເມື່ອບໍ່ດົນມານີ້ ເຫັນວ່າ ວຽກງານຂົນສົ່ງ ຂອງລາວເຮົາຍັງມີຫຼາຍອັນທີ່ຈະຕ້ອງປັບປຸງ.

ຕາມການສຶກສາຂອງທະນາຄານໂລກ ປີ 2018 ກ່ຽວກັບລາຄາ ຂອງວຽກງານຂົນສົ່ງໃນສປປລາວນັ້ນເຫັນວ່າ ຄ່າຂົນສົ່ງໃນສປປລາວ ຍັງສູງກວ່າບັນດາປະເທດອື່ນໆອ້ອມຂ້າງເຮົາ ແລະ ປະສິດພາບກໍຍັງຕໍ່າຫຼາຍ.

ລາຄາຂົນສົ່ງໃນ ສປປລາວນັ້ນ ເຫັນວ່າສູງຫຼາຍ ໂດຍສະເພາະ ການຄິດໄລ່ລາຄາຕາມນໍ້າໜັກ ແທນທີ່ຈະເປັນ ບໍລິມາດຂອງ ພາຫະນະ ເຊິ່ງລາຄາເລີ່ມແຕ່ 882-2.966 ກີບ ຕໍ່ໂຕນ ຕໍ່ກິໂລແມັດ. ແຕ່ໃນຄວາມຈິງແລ້ວ ລາຄາ ກໍອາດແຕກຕ່າງກັນໃນແຕ່ລະທິດທາງ, ຕົວຢ່າງ ລົງໄປທາງໃຕ້ ລາຄາກໍອ່າວຖືກກວ່າ ໄປທາງເໜືອ ເຊິ່ງກໍເນື່ອງຈາກ ສະພາບເສັ້ນທາງ. ພ້ອມນັ້ນ ຖ້າເຄື່ອງໃສ່ລົດເຕັມລາຄາກໍຖືກລົງຄືກັນ.

ເຫດຜົນທີ່ສຳຄັນວ່າ ເປັນຫຍັງ ລາຄາຂົນສົ່ງໃນ ສປປລາວ ຈຶ່ງແພງກວ່າເພິ່ນ ກໍຍ້ອນວ່າ ພາຍ ໃນປະເທດເຮົາມີ ພຽງ 12 ບໍລິສັດໃຫຍ່ຕົ້ນຕໍເທົ່ານັ້ນ (ເຊິ່ງເປັນບໍລິສັດທີ່ມີ ລົດບັນທຸກຫຼາຍກວ່າ 50 ຄັນຂຶ້ນເມືອ) ແລະ ບໍລິສັດນ້ອຍ ຫຼາຍບໍລິສັດ ທີ່ບໍ່ໄດ້ຂຶ້ນທະບຽນເປັນທາງການ.

ເພາະສະນັ້ນ ຈຶ່ງເຮັດໃຫ້ປະສິດທິພາບໃນການຂົນສົ່ງໃນລາວ ຍັງມີປະສິດທິພາບຕໍ່າ, ສະເລ່ຍແລ້ວ ລົດບັນທຸກຄັນໜຶ່ງແລ່ນໄດ້ 55.000 ກິໂລແມັດ ຕໍ່ປີ. ນອກນັ້ນ ທະນາຄານໂລກ ຍັງຊີ້ໃຫ້ເຫັນວ່າ ມາດຕະຖານ ໃນການດຳເນີນງານ ການຂົນສົ່ງໃນລາວກໍຍັງຕໍ່າ ເພາະຄວາມອາດສາມາດ ຂອງບັນດາບໍລິສັດນ້ອຍໆ ຈຳນວນຫຼາຍນັ້ນຍັງຕໍ່າ.  

ນອກນັ້ນ, ການດຳເນີນທຸລະກິດການຂົນສົ່ງໃນລາວ ສ່ວນຫຼາຍຍັງເປັນລັກສະນະຄອບຄົວ ແລະສາຍພົວພັນ ເຊິ່ງບໍ່ມີຄວາມກະຕືລືລົ້ນໃນການແຂ່ງຂັນ, ຊອກເສັ້ນທາງໃໝ່ ແລະເຂົ້າຫາຕະຫຼາດໃໝ່ ເຮັດໃຫ້ ຄຸນນະພາບ ການບໍລິການຕໍ່າ ແຕ່ລາຄາສູງ (ເຊິ່ງກໍຄ້າຍຄືກັນ ກັບການດຳເນີນທຸລະກິດອື່ນໆໃນ ສປປລາວ).

ເຫດຜົນສຳຄັນອີກອັນໜຶ່ງກໍໜີບໍ່ພົ້ນເລື່ອງເສັ້ນທາງ, ພວກເຮົາສັງເກດເຫັນວ່າ ເສັ້ນທາງແຕ່ ນະຄອນຫຼວງວຽງຈັນ ຫາ ດ່ານ ບໍ່ເຕັນ ແຂວງຫຼວງນໍ້າທາ ເຊິ່ງຍັງມີຄວາມຫຍຸ້ງຍາກສົມຄວນ ໂດຍສະເພາະຍາມລະດູຝົນ ທີ່ມັກຈະພົບພໍ້ກັບ ດິນເຈື່ອນ ແລະອື່ນໆ ທີ່ເຮັດໃຫ້ ວຽກງານຂົນສົ່ງມີຄວາມສ່ຽງ ແລະ ຊັກຊ້າ.

ຄຸນນະພາບ ທີ່ຍັງຕໍ່າ ແລະລາຄາສູງຂອງການຄົມມະນາຄົມ ຂົນສົ່ງນັ້ນ ມີຜົນຢ່າງຍິ່ງຕໍ່ ການພັດທະນາເສດຖະກິດຂອງປະເທດ ຕົວຢ່າງ ຄວາມອາດສາມາດແຂ່ງຂັນຂອງ ບັນຫົວໜ່ວຍທຸລະກິດ ກໍຈະຫຼຸດລົງ ເພາະເຂົາເຈົ້າຕ້ອງໄດ້ຈ່າຍຄ່າ ຂົນສົ່ງແພງ ສະນັ້ນ ການຈຳໜ່າຍສິນຄ້າ ກໍຈະແພງໄປນໍາ.

ທີ່ຕັ້ງຂອງ ສປປລາວ ແມ່ນມີທ່າແຮງສູງທີ່ຈະເປັນໃຈກາງຂອງການບໍລິການ ການຂົນສົ່ງໃນພາກພື້ນ, ສະນັ້ນ ພວກເຮົາກໍຕ້ອງໄດ້ປັບປຸງມາດຕະຖານ ລະບົບການຂົນສົ່ງພາຍໃນປະເທດໃຫ້ດີຂຶ້ນ, ແທນທີ່ຈະປົກປ້ອງ ຕະຫຼາດພາຍໃນ ພວກເຮົາຕ້ອງ ປັບໂຕເຂົ້າກັບການປ່ຽນແປງ ຂອງພາກພື້ນ ແລະສາກົນ ເພື່ອນຳຜົນປະໂຫຍດ ຫຼາຍດ້ານ ຕໍ່ກັບການພັດທະນາ ປະເທດ.