ລາວ-ຍີ່ປຸ່ນ ຫາລືການສົ່ງເສີມການລົງທຶນ
ກອງປະຊຸມປຶກສາຫາລືລະຫວ່າງພາກລັດ ແລະ ເອກະຊົນ ຍີ່ປຸ່ນ–ລາວ ຄັ້ງທີ 12 ໄດ້ຈັດຂຶ້ນໃນວັນທີ 11 ທັນວານີ້ ທີ່ນະຄອນຫລວງວຽງຈັນ, ໂດຍ ການສະໜັບສະໜູນຈາກສະພາອຸດສາຫະກໍາ ແລະ ການຄ້າ ຍີ່ປຸ່ນ ປະຈໍາລາວ (JCCIV), ຫ້ອງການ JBIC ປະຈໍາບາງກອກ, ຫ້ອງການ JETRO ປະຈໍາລາວ, ແລະ ຫ້ອງການ JICA ປະຈໍາລາວ, ໂດຍມີທ່ານ ລັດຖະມົນຕີກະຊວງແຜນການ ແລະ ການລົງທຶນ ສຸພັນ ແກ້ວມີໄຊ ແລະ ທ່ານ ທາເຄຊິ ຮິຄິຮາຣະ ເອກອັກຄະລາຊະ ທູດຍີ່ປຸ່ນ ປະຈໍາລາວ ເຂົ້າຮ່ວມເປັນປະທານ.
ກອງປະຊຸມດັ່ງກ່າວ, ເພື່ອປຶກສາຫາລືກ່ຽວກັບ ສະພາບແວດລ້ອມ, ການດຳເນີນທຸລະກິດຂອງບໍລິສັດຍີ່ປຸ່ນມາລົງທຶນໃນລາວ, ໂດຍສະເພາະແມ່ນຂໍ້ສະດວກ, ຂໍ້ຫຍຸ້ງຍາກຕ່າງໆ ທີ່ນັກລົງທຶນພົບພໍ້ ເພື່ອມີມາດຕະການແກ້ໄຂບັນຫາໃຫ້ດີຂຶ້ນ ແນໃສ່ດຶງດູດນັກລົງທຶນຈາກປະເທດຍີ່ປຸ່ນມາດຳເນີນທຸລະກິດຢູ່ ລາວຫຼາຍຂຶ້ນ.
ໂອກາດນີ້, ລັດຖະບານລາວໄດ້ລາຍງານຄວາມຄືບຫນ້າຂອງແຜນປະຕິບັດດ້ານນະໂຍບາຍທີ່ໄດ້ຮັບການຮ່າງໂດຍລັດຖະບານຍີ່ປຸ່ນ ເພື່ອແກ້ໄຂກ່ຽວກັບ ຄວາມໂປ່ງໃສ, ການປະເມີນຜົນຂອງກົດໝາຍ–ລະບຽບການຕ່າງໆ, ການຂົນສົ່ງ ແລະ ເຂດເສດຖະກິດພິເສດອີກດ້ວຍ. ຍີ່ປຸ່ນເປັນປະເທດໜຶ່ງທີ່ມີ ການລົງທຶນຢ່າງຫ້າວຫັນຢູ່ລາວ, ໂດຍສະເພາະໃນຂະແໜງການອຸດສາຫະກຳ, ການຜະລິດສິນຄ້າເພື່ອສົ່ງອອກ. ມາຮອດປັດຈຸບັນ ມີບໍລິສັດຂອງຍີ່ປຸ່ນມາລົງທຶນຢູ່ລາວແລ້ວ 143 ບໍລິສັດ ອັນໄດ້ປະກອບສ່ວນສ້າງວຽກເຮັດງານທໍາໃຫ້ປະຊາຊົນທ້ອງຖິ່ນໄດ້ເປັນຢ່າງດີໄປຄຽງຄູ່ການແບ່ງປັນຄວາມຮູ້ດ້ານເຕັກນິກການຜະລິດ ແລະ ປະກອບສ່ວນພັດທະນາເສດຖະກິດຂອງປະເທດລາວໃຫ້ເຕີບໃຫຍ່ເຂັ້ມແຂງ.
