ອາເມລິກາຮຽກຮ້ອງກຳປູເຈຍ ຟື້ນຟູເສລີພາບສື່ມວນຊົນ
ສະຖານເອກອັກຄະລາຊະທູດອາເມລິກາຫລຸດຜ່ອນມາດຕະການຄວບຄຸມການເຮັດວຽກຂອງສື່ມວນຊົນ ແລະ ການຄືນສິດໃຫ້ແກ່ນັກການເມືອງຝ່າຍກົງຂ້າມລັດຖະບານ, ຫລັງສະພາແຫ່ງຊາດກຳລັງພິຈາລະນາເລື່ອງນີ້ ທ່າມກາງຄຳຂູ່ຂວ້ຳບາດທາງການຄ້າຂອງ EU.
ສຳນັກຂ່າວຕ່າງປະເທດລາຍງານວ່າ: ສະຖານເອກອັກຄະລາຊະທູດອາເມລິກາປະຈຳນະຄອນຫລວງພະນົມເປັນ ອອກຖະແຫລງການໃນວັນທີ 6 ທັນວາ ເນັ້ນການຮຽກຮ້ອງໃຫ້ລັດຖະບານຂອງສົມເດັດ ຮຸນແຊນ ຟື້ນຟູເສລີພາບສື່ມວນຊົນ ໂດຍການຫລຸດຜ່ອນຄວາມເຂັ້ມງວດໃນການເຮັດວຽກຂອງນັກຂ່າວ, ການຖອນຟ້ອງທ່ານ ເກິມ ສຸຂາ ຜູ້ນຳຝ່າຍຄ້ານ ເຊິ່ງເປັນອະດີດພັກກູ້ຊາດກຳປູເຈຍ (CNRP) ທີ່ສານອາຍາສັ່ງຍຸບໄປໃນເດືອນພະຈິກປີຜ່ານມາ ຕະຫລອດຮອດເພີ່ມການປ່ອຍຕົວນັກໂທດການເມືອງ ແລະ ຍົກເລີກການຫ້າມຈັດກິດຈະກຳການເມືອງຂອງຝ່າຍກົງກັນຂ້າມລັດຖະບານ ເຊິ່ງປັດຈຸບັນຢູ່ພາຍໃຕ້ການປົກຄອງໂດຍພັກປະຊາຊົນກຳປູເຈຍ (CPP).
ຖະແຫລງການດັ່ງກ່າວຂອງສະຖານເອກອັກຄະລາຊະທູດອາເມລິກາເກີດຂຶ້ນພຽງບໍ່ເທົ່າໃດວັນ ຫລັງກະຊວງປ້ອງກັນປະເທດຂອງກຳປູເຈຍປະກາດຄືນໃບອະນຸຍາດໃຫ້ສະຖານີວິທະຍຸເສລີ (RFA) ແລະ ວອຍອອຟອາເມລິກາ (VOA) ພາກພາສາຂະເມນ.
