ໂມດຣິກ ຄົນທຳອິດຂອງໂຄຣເອເຊຍ ຄວ້າລາງວັນບັນລົງດໍ 2018
ລູກ້າ ໂມດຣິກ ກອງກາງສະໂມສອນ ຣີລ ມາດຣິດ ແລະ ທີມຊາດໂຄຣເອເຊຍ ອາຍຸ 33 ປີ ຄວ້າລາງວັນບັນລົງດໍ 2018 ຫລື ນັກເຕະຊາຍດີເດັ່ນແຫ່ງປີ ຈາກການຈັດຂອງວາລະສານ France Football ວາລະສານກິລາບານເຕະຊື່ດັງລະດັບໂລກ. ລູກ້າ ໂມດຣິກ ໄດ້ຮັບຄະແນນສຽງຈາກນັກຂ່າວສາຍກິລາບານເຕະທົ່ວໂລກ ລວມ 753 ຄະແນນ ເອົາຊະນະ ຄຣິສເຕຍໂນ ໂຣນັລໂດ້ ແລະ ອ໋ອງຕວນ ຄຣິສມັນ ທີ່ໄດ້ 478 ຄະແນນ ແລະ 414 ຄະແນນຕາມລຳດັບ.
ລູກ້າ ໂມດຣິກ ກາຍເປັນນັກເຕະຊາວໂຄຣເອເຊຍຄົນທໍາອິດ ທີ່ໄດ້ຮັບລາງວັນນີ້. ສໍາລັບຜົນງານຂອງ ໂມດຣິກ ໃນລະດູການຜ່ານມາ ນຳສະໂມສອນຕົ້ນສັງກັດ ຣີລ ມາດຣິດ ຄວ້າແຊ້ມຢູຟາ ແຊມປ້ຽນລີກ 3 ສະໄໝຕິດຕໍ່ກັນ ແລະ ນຳທີມຊາດໂຄຣເອເຊຍໄດ້ຮອງແຊ້ມໂລກ 2018 ເປັນຄັ້ງທຳອິດ ພ້ອມກັບຄວ້າລາງວັນນັກເຕະດີເດັ່ນປະຈຳການແຂ່ງຂັນ. ການຄວ້າລາງວັນຄັ້ງນີ້ຂອງ ໂມດຣິກ ປິດຮົ່ມເງົາຂອງ ໂຣນັລໂດ້ ແລະ ເມສຊີ ໃນຮອບ 1 ທົດສະວັດ. ສ່ວນ ເມສຊີ ໄດ້ອັນດັບທີ 5 ມີ 280 ຄະແນນ, ທີ 4 ຄີລຽນ ເອັມບັບເປ 347 ຄະແນນ.
ຂະນະທີ່ ລາງວັນອັນດັບ 2 ນັກເຕະໄວໜຸ່ມຊາຍດີເດັ່ນ ຫລື Kopa Trophy ເປັນຂອງ ຄີລຽນ ເອັມບັບເປ ກອງໜ້າທີມຊາດຝຣັ່ງ ຈາກສະໂມສອນ PSG ໄດ້ຄະແນນສຽງ 110 ຄະແນນ, ທີ 2 ຄຣິສຕຽນ ປູລີຊິກ ກອງກາງທີມຊາດສະຫະລັດອາເມລິກາ ຈາກດ໋ອດມຸນ ໄດ້ 31 ຄະແນນ, ທີ 3 ຈັສຕິນ ໄຄເວີດ ປີກທີມຊາດເນເທີແລນ ຈາກໂຣມາ (ຜົນງານດີກັບສັງກັດເກົ່າ ອາແຈັກ) ໄດ້ 18 ຄະແນນ.
