ສຳເລັດການຍົກລະດັບວິທີຂຽນຂ່າວອອນລາຍໃຫ້ສື່ມວນຊົນລາວ
ຊຸດອົບຮົມການຂຽນຂ່າວທາງອອນລາຍ ເພື່ອສ້າງຄວາມເຂົ້າໃຈໃນການນຳໃຊ້ສື່ອອນລາຍ ໂດຍສະເພາະແມ່ນຄວາມຈຳເປັນ ແລະ ເຄັດລັບການນໍາໃຊ້ສື່ສັງຄົມອອນລາຍ, ທັກສະໃນການວາງຮູບແບບ, ການເລົ່າເລື່ອງ, ທັກສະການສຳພາດ ດ້ວຍການນຳໃຊ້ໂທລະສັບມືຖື ເພື່ອເຮັດວິດີໂອ, ພາບສະໄລໂຊແລະ ອື່ນໆ ເຊິ່ງເປັນວຽກງານໜຶ່ງທີ່ສຳຄັນ, ແຕ່ການນຳໃຊ້ສື່ອອນລາຍນີ້ ເໝືອນດັ່ງມີດສອງຄົມ ມີທັງຂໍ້ດີ ແລະ ຂໍ້ເສຍ, ຂໍ້ດີ ມີຄວາມສະດວກໃນການເຜີຍແຜ່, ການເຂົ້າເຖິງຂໍ້ມູນຂ່າວສານທີ່ເປັນປະໂຫຍດ, ຂະນະດຽວກັນກໍງ່າຍທີ່ຈະເຜີຍແຜ່ບາງຂໍ້ມູນທີ່ມີລັກສະນະຫລອກລວງ ແລະ ອື່ນໆ.
ຊຸດຝຶກອົບຮົມດັ່ງກ່າວໄດ້ສຳເລັດລົງໃນບ່າຍວັນທີ 30 ພະຈິກນີ້ ພາຍຫລັງດຳເນີນມາເປັນເວລາ 4 ວັນ ໂດຍສະຖາບັນສື່ມວນຊົນ ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ຮ່ວມກັບ ສະຖາບັນສື່ມວນຊົນໂຟໂຈ ໂດຍການສະໜັບສະໜູນຈາກສະຖານທູດສະວີເດັນ ປະຈຳບາງກອກ.
ຂ່າວໃຫ້ຮູ້ອີກວ່າ: ໃນວັນທີ 29-30 ພະຈິກນີ້, ອົງການກາແດງລາວ ກໍໄດ້ຈັດຊຸດອົບຮົມວຽກງານຂ່າວສານ ແລະ ວິທີຖ່າຍຮູບໃຫ້ພະນັກງານອົງການຂອງຕົນໃນຂອບເຂດທົ່ວປະເທດຂຶ້ນທີ່ນະຄອນຫລວງວຽງຈັນ ເພື່ອຍົກລະດັບຄວາມຮູ້ພື້ນຖານດ້ານການຂຽນບົດ, ຂຽນຂ່າວ ແລະ ວິທີການຖ່າຍຮູບໃຫ້ມີຄວາມຖືກຕ້ອງ ແລະ ແມ້ນຢຳ ໂດຍການສະໜັບສະໜູນຈາກອົງການກາແດງສາກົນ.
