ຂົວຂ້າມນ້ຳງື່ມບ້ານ ນາບົງ-ທ່າກົກໄຮ ໄດ້ເປີດນຳໃຊ້ແລ້ວ
ພິທີເປີດນຳໃຊ້ຂົວຂ້າມນ້ຳງື່ມ ທີ່ບ້ານນາບົງຫາບ້ານທ່າກົກໄຮ ເມືອງ ປາກງື່ມ ນະຄອນຫລວງວຽງຈັນ ໄດ້ມີຂຶ້ນໃນວັນທີ 27 ພະຈິກນີ້, ໂດຍການເຂົ້າຮ່ວມຂອງ ພະນະທ່ານ ທອງລຸນ ສີສຸລິດ ນາຍົກລັດຖະມົນຕີ, ພ້ອມດ້ວຍການນຳນະຄອນຫລວງວຽງຈັນ ແລະ ມວນຊົນເຂົ້າຮ່ວມເປັນຈຳນວນຫລາຍ.
ໂຄງການກໍ່ສ້າງຂົວຂ້າມນຳງື່ມບ້ານນາບົງຫາບ້ານທ່າກົກໄຮ ເປັນໂຄງການຊ່ວຍເຫລືອລ້າຂອງທ່ານ ສັກໄຊ ວົມາລາສິດ ຫລື ທ່ານ ປີເຕີຈັນ ປະທານບໍລິສັດ ລາວເວີນ ອະສັງຫາລິມະຊັບ ຈຳກັດ ໃນມູນຄ່າ 105 ຕື້ກີບ ເພື່ອເປັນຂອງຂວັນໃຫ້ແກ່ປະຊາຊົນພາຍໃຕ້ການເຫັນດີຂອງລັດຖະບານລາວ ແລະ ແຜນປະຕິບັດງານຂອງນະຄອນຫລວງວຽງຈັນ ໃນເຂດເມືອງປາກງື່ມ,
ບໍລິສັດ ລາວເວີນ ໃຫ້ຮູ້ວ່າ: ຂົວດັ່ງກ່າວແມ່ນໄດ້ດຳເນີນການກໍ່ສ້າງມາແຕ່ປີ 2015, ເປັນຂົວເບຕົງເສີມເຫລັກ ແລະ ອັດແຮງດ້ວຍລວດສະລິງ ມີຄວາມຍາວ 236 ແມັດ ແລະ ທາງຂຶ້ນຫາຂົວເບື້ອງລະ 30 ແມັດ, ມີໜ້າຂົວກວ້າງ 11 ແມັດ ລວມທັງທາງຍ່າງເບື້ອງລະ 1,5 ແມັດ ແລະ ມີໄຟແສງສະຫວ່າງຕະຫລອດຄວາມຍາວຂອງຂົວ.
ໃນໂອກາດນີ້, ທ່ານ ເຈົ້າຄອງນະຄອນຫລວງວຽງຈັນ ໄດ້ມີຄຳເຫັນວ່າ: ຂົວດັ່ງກ່າວແມ່ນມີຄວາມສຳຄັນຫລາຍ ເພື່ອອຳນວຍຄວາມສະດວກໃຫ້ແກ່ການສັນຈອນໄປມາຂອງປະຊາຊົນສອງບ້ານດັ່ງກ່າວ ພາຍຫລັງເກີດເຫດການເຮືອແພແຕກ ເຮັດໃຫ້ມີນັກຮຽນເສຍຊີວິດຫລາຍຄົນ. ສະນັ້ນ ຈຶ່ງມີການກໍ່ສ້າງຂົວດັ່ງກ່າວຂຶ້ນ ເພື່ອແກ້ໄຂສະພາບການນຳໃຊ້ເຮືອແພຂ້າມຜ່ານໄປມາຢ່າງມີຄວາມສ່ຽງດັ່ງກ່າວ.
