ຕ້ອງການງົບປະມານຫລາຍກວ່າ 4 ພັນຕື້ກີບຟື້ນຟູໄພພິບັດທໍາມະຊາດ
ລັດຖະບານລາວຕ້ອງການງົບປະມານຫລາຍກວ່າ 4.400 ຕື້ກີບ ເພື່ອຟື້ນຟູຜົນກະທົບຈາກໄພພິບັດທໍາມະຊາດທັງໄລຍະສັ້ນ ແລະ ໄລຍະຍາວ, ຊຶ່ງ ຂໍ້ມູນດັ່ງກ່າວໄດ້ລາຍງານຢູ່ກອງປະຊຸມຖອດຖອນບົດຮຽນການແກ້ໄຂໄພພິບັດໃນຂອບເຂດທົ່ວປະເທດຮ່ວມກັບສາກົນທີ່ຈັດຂຶ້ນໃນວັນທີ 26 ພະຈິກນີ້, ທີ່ນະຄອນຫລວງວຽງຈັນ, ໂດຍການເປັນປະທານຂອງທ່ານຮອງນາຍົກລັດຖະມົນຕີ ປະທານຄະນະກໍາມະການສະເພາະກິດແກ້ໄຂໄພພິບັດລະດັບຊາດ ສອນໄຊ ສີພັນດອນ ເພື່ອສະຫລຸບສະພາບຜົນກະທົບ, ການໃຫ້ການຊ່ວຍເຫລືອສຸກເສີນ ແລະ ແຜນຟື້ນຟູບູລະນະຫລັງໄພພິບັດ ເພື່ອຖອດຖອນບົດຮຽນດ້ານດີ ແລະ ຂໍ້ຄົງຄ້າງ ໃນການປະຕິບັດກົນໄກ ແລະ ການປະສານງານໃຫ້ການຊ່ວຍເຫລືອສຸກເສີນ.
ທ່ານ ສອນໄຊ ສີພັນດອນ ກ່າວວ່າ: ຜົນກະທົບ ແລະ ຄວາມເສຍຫາຍຈາກໄພນ້ຳຖ້ວມໃນປີ 2018 ຖືວ່າມີຄວາມຮຸນແຮງເປັນປະຫວັດສາດຢູ່ປະເທດເຮົາ, ເນື່ອງຈາກສະພາບອາກາດປະຈໍາລະດູການ ແລະ ມີລົມພາຍຸເຂດຮ້ອນພັດຜ່ານ ເຊັ່ນ: ລົມພາຍຸໄຕ້ຝຸ່ນເຊິນຕີນ ແລະ ເບີບີນກາ ເຮັດໃຫ້ບັນດາແຂວງໃນທົ່ວປະເທດ ລວມທັງນະຄອນຫລວງວຽງຈັນໄດ້ຮັບຜົນກະທົບຈາກໄພພິບັດນ້ຳຖ້ວມ, ສົ່ງຜົນກະທົບໂດຍກົງຕໍ່ປະຊາຊົນຢູ່ 124 ເມືອງ, 2.382 ບ້ານ, 126.619 ຄອບຄົວ, ມີຜູ້ເສຍຊີວິດ 60 ຄົນ ແລະ ສູນຫາຍອີກ 30 ຄົນ, ສ້າງຄວາມເສຍຫາຍຕໍ່ທີ່ຢູ່ອາໃສຂອງປະຊາຊົນ, ພື້ນຖານໂຄງລ່າງເສດຖະກິດ, ສັງຄົມ ແລະ ສິ່ງແວດລ້ອມ ຄິດເປັນມູນຄ່າເສຍຫາຍຫລາຍກວ່າ 3.000 ຕື້ກີບ. ຂະແໜງການທີ່ເສຍຫາຍຫລາຍກວ່າໝູ່ແມ່ນ ໂຍທາທິການ ແລະ ຂົນສົ່ງ ມີເຖິງ 1,6 ຕື້ກີບ ແລະ ຮອງລົງມາແມ່ນຂະແໜງກະສິກຳ ແລະ ປ່າໄມ້ 1,2 ຕື້ກີບ.
ກອງປະຊຸມຄັ້ງນີ້, ຈະເປັນການຮັບປະກັນໃຫ້ການຈັດຕັ້ງປະຕິບັດວຽກງານປ້ອງກັນ ແລະ ຄວບຄຸມໄພພິບັດ ທີ່ແນໃສ່ຫລຸດຜ່ອນຜົນກະທົບ, ຄວາມເສຍຫາຍ ແລະ ການສູນເສຍຕໍ່ຊີວິດ ແລະ ຊັບສິນ ຂອງປະຊາຊົນ ແລະ ລວມໝູ່, ລວມທັງຮັບປະກັນໃຫ້ແກ່ການຈັດຕັ້ງ, ປະສານງານໃຫ້ການຊ່ວຍເຫລືອທັງໄລຍະສຸກເສີນ ແລະ ຟື້ນຟູຫລັງໄພພິບັດມີປະສິດທິພາບ ແລະ ປະສິດທິຜົນສູງ.
