ຄະນະປະຈໍາສະແຫ່ງຊາດ ສະເໜີໃຫ້ລັດຖະບານສືບຕໍ່ປະຕິບັດບັນດາມາດຕະການກະຕຸ້ນເສດຖະກິດ ທີ່ຍັງບໍ່ສາມາດບັນລຸຕາມຄາດໝາຍ

ໃນວາລະດໍາເນີນກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ VIII, ທ່ານ ບຸນປອນ ບຸດຕະນຸວົງ ຮອງປະທານສະພາແຫ່ງຊາດ ໄດ້ສະເໜີໃຫ້ລັດຖະບານສືບຕໍ່ຊຸກຍູ້ພາກສ່ວນກ່ຽວຂ້ອງ ປະຕິບັດບັນດາມາດຕະການທີ່ຍັງບໍ່ສາມາດບັນລຸໄດ້ຕາມຄາດໝາຍ ເປັນຕົ້ນແມ່ນ ມາດຕະການທີ 1 ກ່ຽວກັບການຄຸ້ມຄອງມະຫາພາກ: ການຂະຫຍາຍຕົວຂອງປະລິມານເງິນ M2 ເຂົ້າສູ່ຂອດຈໍລະຈອນປະຕິບັດໄດ້ໃນລະດັບ 9,89% ຕໍ່າກວ່າການຮັບຮອງ ຂອງສະພາແຫ່ງຊາດ (ບໍ່ເກີນ 25%) ເຮັດໃຫ້ການປ່ອຍສິນເຊື່ອເຂົ້າສູ່ພາກການຜະລິດ-ທຸລະກິດ ມີຄວາມຈໍາກັດ; ຄັງສໍາຮອງເງິນຕາຕ່າງປະເທດບໍ່ສາມາດບັນລຸຄາດໝາຍ ກຸ້ມການນໍາເຂົ້າ 5 ເດືອນ ຕາມມະຕິຂອງສະພາແຫ່ງຊາດ. ມາດຕະການທີ 2 ກ່ຽວກັບການປັບປຸງສະພາບແວດລ້ອມ ແລະ ການດໍາເນີນທຸລະກິດ ໂດຍສະເພາະການສ້າງຕັ້ງຫ້ອງການບໍລິການລົງທຶນຜ່ານປະຕູດຽວ ແລະ ການສ້າງຄະນະກໍາມະການຄຸ້ມຄອງ ແລະ ສົ່ງເສີມການລົງທຶນ ໃນການປະຕິບັດຕົວຈິງຍັງບໍ່ເອກະພາບກັນຢູ່ຂັ້ນສູນກາງ ແລະ ທ້ອງຖິ່ນ, ດັ່ງນັ້ນ, ຈຶ່ງສະເໜີໃຫ້ລັດຖະບານ ຊີ້ນໍາບັນດາກະຊວງ, ອົງການ ແລະ ອົງການປົກຄອງທ້ອງຖິ່ນ ຮີບຮ້ອນປະຕິບັດຕາມກົດໝາຍ ແລະ ລະບຽບການ ທີ່ກ່ຽວຂ້ອງ ໃນການຊຸກຍູ້ສົ່ງເສີມການລົງທຶນຢ່າງເປັນຮູບປະທໍາໃນຂອບເຂດທົ່ວປະເທດ. ສ່ວນມາດຕະການທີ 5 ກ່ຽວກັບການສົ່ງເສີມ ວິສາຫະກິດຂະໜາດກາງ ແລະ ຂະໜາດນ້ອຍ SMEs ຮອດປັດຈຸບັນກວດອັດຕາສ່ວນ 97% ຂອງຂະແໜງການວິສາຫະກິດ ປະກອບສ່ວນ 16% ຂອງ GDP ແລະ ໄດ້ສ້າງວຽກເຮັດງານທໍາໄດ້ 63% ຂອງຜູ້ອອກແຮງງານທົ່ວປະເທດ, ແຕ່ການສະໜອງສິນເຊື່ອໃຫ້ແກ່ວິສະຫະກິດດັ່ງກ່າວ ມີພຽງແຕ່ 12%, ສະນັ້ນ, ການສ້າງຕັ້ງກອງທຶນສົ່ງເສີມ SMEs ຈຶ່ງມີຄວາມຈໍາເປັນ ໂດຍນໍາໃຊ້ເງິນຈາກງົບປະມານຂອງລັດ 200 ຕື້ກີບ ແລະ ຈາກການລະດົມທຶນຈາກພາຍນອກ ຈໍານວນ 300 ລ້ານໂດລາສະຫະລັດ ຕາມມະຕິເລກທີ 082/ສພຊ ຍັງບໍ່ໄດ້ຮັບການຈັດຕັ້ງປະຕິບັດ.