ເດັກນ້ອຍ 85.000 ຄົນ ຢູ່ເຢເມນ ຕາຍຈາກການຂາດສານອາຫານ
ອົງການຊ່ວຍເຫລືອເດັກ (Save the children) ເປີດເຜີຍວ່າ: ມີເດັກນ້ອຍຊາວເຢເມນອາຍຸຕໍ່າກວ່າ 5 ປີ ປະມານ 85.000 ຄົນ ຕ້ອງເສຍຊີວິດຈາກສະພາບຂາດສານອາຫານຢ່າງຮຸນແຮງໃນໄລຍະ 3 ປີ ຂອງສົງຄາມໃນເຢເມນ.
ເດືອນຜ່ານມາ, ອົງການສະຫະປະຊາຊາດ ອອກມາເຕືອນວ່າ: ປະຊາກອນເຢເມນຫລາຍກວ່າ 14 ລ້ານຄົນ ຕົກຢູ່ໃນສະຖານະການສ່ຽງຂອງສະພາບຄວາມອຶດຫິວ ແລະ ຮຽກຮ້ອງໃຫ້ຮື້ຟື້ນການເຈລະຈາ ເພື່ອຢຸດຕິສະພາບສົງຄາມຍາວນານ 3 ປີ ເຊິ່ງຖືໄດ້ວ່າເປັນວິກິດດ້ານມະນຸດສະທຳທີ່ຮ້າຍແຮງທີ່ສຸດໃນໂລກ.
ປະເທດເຢເມນຖືກທຳລາຍລ້າງຄວາມຂັດແຍ່ງ, ການຕໍ່ສູ້ທີ່ຍືດເຍື້ອເລີ່ມຕົ້ນຂຶ້ນໃນປີ 2015 ເມື່ອຝ່າຍພັນທະມິດຂອງລັດຖະບານທີ່ນຳໂດຍອາຣັບບີ ຊາອຸດິດ ເລີ່ມຕົ້ນປະຕິບັດການໂຈມຕີທາງອາກາດກຸ່ມກະບົດຮູທີທີ່ໄດ້ຮັບການສະໜັບສະໜູນຈາກອີຣານ. ຜົນຈາກສົງຄາມນັບແຕ່ນັ້ນມາ ເຮັດໃຫ້ປະທານາທິບໍດີ ອັບດຣັບບູ ມັນຊູ ຮາດີ ຕ້ອງລີ້ໄພອອກນອກປະເທດ.
ຕາມການລາຍງານຂອງອົງການສະຫະປະຊາຊາດ ສົງຄາມເຮັດໃຫ້ມີພົນລະເຮືອນເສຍຊີວິດ 6.800 ຄົນ ແລະ ບາດເຈັບ 10.700 ຄົນ, ການຕໍ່ສູ້ ແລະ ການປິດລ້ອມພື້ນທີ່ຢຶດຄອງຂອງກຸ່ມກະບົດ ໂດຍກອງກຳລັງປະສົມຝ່າຍພັນທະມິດ ເຮັດໃຫ້ມີຜູ້ຈຳເປັນຕ້ອງໄດ້ຮັບການຊ່ວຍເຫລືອທາງມະນຸດສະທຳເຖິງ 22 ລ້ານຄົນ ເຮັດໃຫ້ເກີດສະພາບສຸກເສີນດ້ານຄວາມໝັ້ນຄົງທາງອາຫານໃຫຍ່ທີ່ສຸດໃນໂລກ ນຳໄປສູ່ການລະບາດຂອງພະຍາດອະຫິວາ ເຊິ່ງເຊື່ອວ່າເຮັດໃຫ້ມີຜູ້ໄດ້ຮັບຜົນກະທົບ 1,2 ລ້ານຄົນ.
ຜູ້ອຳນວຍການອົງການຊ່ວຍເຫລືອເດັກປະຈຳເຢເມນ ຍັງເຕືອນວ່າ: ເດັກປະມານ 150.000 ຄົນ ທີ່ຍັງມີຊີວິດຢູ່ກຳລັງຕົກຢູ່ໃນອັນຕະລາຍໃນເມືອງຮູດັດຢາ ຈາກປະຕິບັດການໂຈມຕີທາງອາກາດທີ່ເກີດຂຶ້ນກ່ອນໜ້ານີ້.
