ທະນາຄານໂລກ ຊີ້ ສປປ ລາວ ຄວນປັບປຸງລະບົບອຳນວຍຄວາມສະດວກການດຳເນີນທຸລະກິດ
ໃນບົດລາຍງານ ຂອງທະນາຄານໂລກ Doing Business 2019, ເຊິ່ງຜົນການສຶກສາຄວາມງ່າຍດາຍໃນການເນີນທຸລະກິດຈໍານວນ 190 ປະເທດ ຊີ້ໃຫ້ເຫັນວ່າ: ສປປ ລາວ ຍັງຄົງຢູ່ໃນອັນດັບຕໍ່າທີ່ສຸດໃນພາກພື້ນອາຊີຕາເວັນອອກ ແລະ ເຂດປາຊີຟິກ, ຄືພຽງແຕ່ຖືກຈັດໃນອັນດັບດີກວ່າ ສ ມຽນມາ (171) ແລະ ຕີມໍເລສເຕ້ (178). ແຕ່ເມືອທຽບໃສ່ປະເທດເພື່ອນບ້ານອາຊຽນ ແລະ ປະເທດຄູ່ແຂ່ງໃນພາກພື້ນເຊັ່ນ: ກໍາປູເຈຍ (138), ສສ ຫວຽດນາມ (69), ຣຊ ໄທ (27), ມາເລເຊຍ (15) ເຊິ່ງ ສປປ ລາວ ຖືກຈັດຢູ່ໃນອັນດັບທີ 154. ດັ່ງນັ້ນ, ບັນດາຂະແໜງການກ່ຽວຂ້ອງ ຍັງມີຫຼາຍບັນຫາທີ່ຈະຕ້ອງໄດ້ບຸກທະລຸ ເພື່ອສືບຕໍ່ປັບປຸງສະພາບແວດລ້ອມຂອງການດຳເນີນທຸລະກິດໃນ ສປປ ລາວ ໃຫ້ນັບມື້ດີຂື້ນ ໃຫ້ເປັນທີ່ດຶງດູດນັກລົງທຶນທີ່ມີຄຸນນະພາບທັງພາຍໃນ ແລະ ຕ່າງປະເທດ ເຂົ້າມາລົງທຶນໃນ ສປປ ລາວ ໃຫ້ຫຼາຍຂື້ນ.
ຈາກບົດລາຍງານຂອງທະນາຄານໂລກ ເມື່ອບໍ່ດົນມານີ້ ພົບວ່າ: ສປປ ລາວ ສືບຕໍ່ເອົາໃຈໃສ່ດີຂຶ້ນໃນການປັບປຸງກົນໄກການບໍລິຫານງານຂອງບັນດາຂະແໜງການກ່ຽວຂ້ອງ, ໃນການດໍາເນີນທຸລະກິດຂອງ ສປປ ລາວ ລວມເຖິງສະພາບແວດລ້ອມ ເພື່ອຈະຊ່ວຍສ້າງວຽກເຮັດງານທໍາໃຫ້ປະຊາຊົນມີລາຍຮັບທີ່ໝັ້ນຄົງກ້າວໄປສູ່ການຫຼຸດພົ້ນຈາກຖານະເປັນປະເທດດ້ອຍພັດທະນາໃນປີ 2024 ໃຫ້ສໍາເລັດ.
ເຖິງຢ່າງໃດກໍຕາມ, ສປປ ລາວ ກໍຍັງມີບາງໝວດຕົວຊີ້ວັດ ແມ່ນມີລໍາດັບດີຂື້ນຕາມລໍາລັບ ເປັນຕົ້ນແມ່ນການຄ້າຂ້າມແດນ, ປັບປຸງຂັ້ນຕອນການແຈ້ງພາສີ ແລະ ຄ່າໃຊ້ຈ່າຍໃນການປະກອບເອກະສານນຳເຂົ້າ ແລະ ສົ່ງອອກ, ຂັ້ນຕອນຢູ່ດ່ານຂ້າມແດນ ແລະ ການຂົນສົ່ງພາຍໃນ ທີ່ມີຄວາມລ່າຊ້າ.
ກະຊວງ ອຸດສາຫະກຳ ແລະ ການຄ້າ ໃຫ້ຮູ້ວ່າ: ໃນໄລຍະຜ່ານມາ, ລັດຖະບານໄດ້ອອກມາດຕະການ ແລະ ກົນໄກຫຼາຍຮູບການ ເພື່ອປະຕິຮູບສະພາບແວດລ້ອມຂອງການດໍາເນີນທຸລະກິດໃນ ສປປ ລາວ, ໃຫ້ຢູ່ໃນລໍາດັບທີ່ດີຂື້ນ ເປັນຕົ້ນແມ່ນ ຄໍາສັ່ງ ວ່າດ້ວຍການປັບປຸງບັນດາລະບຽບການ ແລະ ກົນໄກການປະສານງານໃນການດໍາເນີນທຸລະກິດຂອງນາຍົກລັດຖະມົນຕີ ແລະ ແຜນດໍາເນີນງານວຽກງານອໍານວຍຄວາມສະດວກທາງດ້ານການຄ້າ ປີ 2017-2022 ແລະ ອື່ນໆ. ແຕ່ບົດລາຍງານຂອງທະຄານໂລກຍັງຊີ້ໃຫ້ເຫັນວ່າ: ພວກເຮົາຍັງປະຕິບັດບໍ່ໄດ້ດີເທົ່າທີ່ຄວນ, ສົ່ງຜົນເຮັດໃຫ້ ສ ປປ ລາວ ຖືກຈັດຢູ່ໃນອັນດັບທີ 154 ໃນຈໍານວນ 190, ທີ່ມີຄວາມສະດວກໃນການດຳເນີນທຸລະກິດ.
