ກອງປະຊຸມເອເປັກທີ່ປາປົວນິວກິນີ ບໍ່ມີຖະແຫລງການຮ່ວມ
ກອງປະຊຸມປະຈຳປີຂອງກຸ່ມປະເທດສະມາຊິກເອເປັກຢູ່ປາປົວນິວກິນີໃນປີນີ້ສຳເລັດໂດຍບໍ່ມີ “ການບັນລຸສັນທາມະຕິ” ຫລື ການອອກຖະແຫລງການຮ່ວມກັນເປັນຄັ້ງທຳອິດ ຈາກຄວາມຂັດແຍ່ງຢ່າງໜັກລະຫວ່າງ “ສອງມະຫາອຳນາດ”.
ສຳນັກຂ່າວຕ່າງປະເທດລາຍງານວ່າ: ນາຍົກລັດຖະມົນຕີ ປີເຕີ ໂອນີລ ຜູ້ນຳປາປົວນິວກິນີ ຖະແຫລງພາຍຫລັງສຳເລັດກອງປະຊຸມສຸດຍອດຜູ້ນຳການຮ່ວມມືທາງເສດຖະກິດອາຊີ-ປາຊີຟິກ (ເອເປັກ) ຄັ້ງທີ 30 ຢູ່ປາປົວນິວກິນີວ່າ: ຜູ້ນຳຈາກສະມາຊິກທັງ 21 ປະເທດບໍ່ສາມາດບັນລຸສັນທາມະຕິໃນການອອກປະລິນຍາປະຈຳກອງປະຊຸມປີນີ້ຮ່ວມກັນໄດ້ ເນື່ອງຈາກບາງປະເທດມີຈຸດຢືນທີ່ “ແຕກຕ່າງກັນຫລາຍ” ໃນຫລາຍບັນຫາ.
ເຖິງຢ່າງໃດກໍຕາມ, ທ່ານ ໂອນີລ ກ່າວວ່າ: ປົວປານິວກິນີຈະມີຖະແຫລງການໃນຖານະປະທານກອງປະຊຸມປະຈຳປີນີ້ອີກ, ແຕ່ຍອມຮັບວ່າເປັນຄັ້ງທຳອິດທີ່ຜູ້ນຳ ຫລື ຜູ້ແທນລະດັບສູງຂອງລັດຖະບານສະມາຊິກເອເປັກບໍ່ສາມາດບັນລຸສັນທາມະຕິປະຈຳກອງປະຊຸມຮ່ວມກັນໄດ້ ນັບແຕ່ກອງປະຊຸມຄັ້ງທຳອິດ ໂດຍອົດສະຕຣາລີເປັນເຈົ້າພາບ ຢູ່ນະຄອນແຄນເບີລາ ໃນປີ 1989, ສ່ວນກອງປະຊຸມປະຈຳປີຂອງສະມາຊິກເອເປັກຄັ້ງຕໍ່ໄປຈະເກີດຂຶ້ນຢູ່ຊີເລໃນປີ 2019.
