ປ໊ອກບາ ກ່າວ ແມນຢູ ຄືບ້ານ ຢຸດຂ່າວລືກັບໄປ ຢູເວນຕຸສ
ປໍ ປ໊ອກບາ ມິດຟິວຄົນເກັ່ງຂອງ ແມນເຊັສເຕີ ຢູໄນເຕັດ ຍັກໃຫຍ່ແຫ່ງ ພຣີເມຍລີກ ອັງກິດ ອອກມາຢຸດຂ່າວລືເລື່ອງການຍ້າຍກັບໄປຫລິ້ນກັບ ຢູເວນຕຸສ ອະດີດຕົ້ນສັງກັດໃນ ກັລໂຊ ເຊເຣຍ ອາ ອີຕາລີ ດ້ວຍການຢືນຢັນວ່າ: ລາວຍັງມຸ່ງໝັ້ນເຕັມສ່ວນກັບການຊ່ວຍທີມ ແມນຢູ ເຊິ່ງລາວລະບຸວ່າ ເປັນສະໂມສອນທີ່ລາວຮູ້ສຶກຄືເປັນເຮືອນຂອງຕົນເອງ.
ປ໊ອກບາ ເຊິ່ງຍ້າຍຈາກ ແມນຢູ ໄປສ້າງຊື່ກັບ ຢູເວ ໃນປີ 2012 ກ່ອນຈະຍ້າຍກັບມາຫລິ້ນໃນຖິ່ນໂອລ ແທຣຟຟອດ ອີກຄັ້ງດ້ວຍຄ່າຕົວ 89 ລ້ານປອນ ໃນປີ 2016 ກ່າວວ່າ: ຕອນຂ້ອຍຍ້າຍກັບມາຢູ່ ແມນເຊັສເຕີ ຢູໄນເຕັດ ມັນເປັນຄວາມຮູ້ສຶກດີທີ່ສຸດຂອງຂ້ອຍ, ຂ້ອຍຝັນຈະໄດ້ຫລິ້ນໃຫ້ ແມນຢູ ມາຕະຫລອດ ຝັນຢາກລົງຫລິ້ນໃຫ້ທີມໄປດົນໆ ແລະ ຍິງປະຕູໃຫ້ທີມໄດ້ຫລາຍໆ ແລະ ຕອນນີ້ມັນຍັງບໍ່ມີຫຍັງປ່ຽນແປງ ຍົກເວັ້ນຜູ້ຫລິ້ນ ແລະ ຜູ້ຈັດການທີມ ແຕ່ທີ່ເຫລືອຍັງຄືເກົ່າທຸກຢ່າງ, ຂ້ອຍຫາກໍຍ້າຍກັບມາເຮືອນ ແລະ ມັນຄືກັບວ່າຂ້ອຍ ບໍ່ເຄີຍຍ້າຍອອກໄປໃສ ການໄດ້ກັບມາເຮືອນມັນເປັນຄວາມຮູ້ສຶກສຸດຍອດແລ້ວ.
