ອາເມລິກາຢືນຢັນ ໃຫ້ຄວາມສຳຄັນກັບອາຊຽນ
ຮອງປະທານາທິບໍດີອາເມລິກາຢືນຢັນລັດຖະບານວໍຊິງຕັນມີ “ພັນທະສັນຍາທີ່ໝັ້ນຄົງ” ຕໍ່ພາກພື້ນອິນໂດ-ປາຊີຟິກ ລວມທັງອາຊີຕາເວັນອອກສຽງໃຕ້.
ສຳນັກຂ່າວຕ່າງປະເທດລາຍງານວ່າ: ຮອງປະທານາທິບໍດີ ໄມ ເພັນ ກ່າວຕໍ່ກອງປະຊຸມ ອາຊຽນ-ອາເມລິກາ ຄັ້ງທີ 6 ເຊິ່ງເປັນໜຶ່ງໃນກອງປະຊຸມລະຫວ່າງສະມາຄົມປະຊາຊາດແຫ່ງອາຊີຕາເວັນອອກສຽງໃຕ້ (ອາຊຽນ) ກັບຄູ່ເຈລະຈາ ຢູ່ສິງກະໂປ ໃນວັນທີ 15 ພະຈິກວ່າ: ລັດຖະບານວໍຊິງຕັນມີຈຸດຢືນທີ່ໜັກແໜ້ນ ແລະ “ພັນທະສັນຍາທີ່ໝັ້ນຄົງ” ຕໍ່ພາກພື້ນອິນໂດ-ປາຊີຟິກ ເຊິ່ງລວມທັງອາຊຽນ.
ຂະນະດຽວກັນ, ຮອງຜູ້ນຳອາເມລິກາ ເຊິ່ງເຂົ້າຮ່ວມກອງປະຊຸມສຸດຍອດຜູ້ນຳອາຊຽນຄັ້ງນີ້ແທນປະທານາທິບໍດີ ໂດນັລ ທຣຳ ກ່າວອີກວ່າ: ການຂະຫຍາຍອິດທິພົນ ໂດຍ “ການຮຸກຮານ ແລະ ສ້າງອານາຈັກ” ເປັນສິ່ງທີ່ຕ້ອງບໍ່ເກີດຂຶ້ນອີກຕໍ່ໄປໃນພາກພື້ນແຫ່ງນີ້ ໂດຍໂຄງການທີ່ອາເມລິກາຈະສະໜັບສະໜູນໃນອະນາຄົດ ເພື່ອໃຫ້ເປັນໄປຕາມຄຳໝັ້ນສັນຍາ ແລະ ຄວາມມຸ່ງຫວັງຂອງອາເມລິກາ ໃນການຮ່ວມພັດທະນາແຜນຍຸດທະສາດຄວາມໝັ້ນຄົງໃນພາກພື້ນອິນໂດ-ປາຊີຟິກ ຄືການຈັດຕັ້ງກອງທຶນໃໝ່ດ້ວຍງົບປະມານເກືອບ 300 ລ້ານໂດລາສະຫະລັດ ເພື່ອສົ່ງເສີມເຄືອຂ່າຍການຮ່ວມມືດ້ານຄວາມໝັ້ນຄົງລະຫວ່າງລັດຖະບານວໍຊິງຕັນກັບທຸກປະເທດໃນພາກພື້ນອິນໂດ-ປາຊີຟິກ.
