ໂຮງແຮມ ວັນແສງ ບູຕິກ ເປີດໃຫ້ບໍລິການແລ້ວ

ພິທີເປີດໃຫ້ບໍລິການຂອງໂຮງແຮມວັນແສງບູຕິກ ທີ່ຕັ້ງຢູ່ບ້ານໜອງດ້ວງ, ເມືອງຈັນທະບູລີນະຄອນຫລວງວຽງຈັນ, ໄດ້ມີຂຶ້ນໃນວັນທີ 13 ພະຈິກນີ້, ໂດຍມີ ທ່ານ ສີຫຸນ ສິດທິລືໄຊ, ທ່ານ ແກ້ວພິລາວັນ ອາໄພລາດ ຮອງເຈົ້າຄອງນະຄອນຫລວງວຽງຈັນ, ມີທ່ານ ນາງ ວັນແສງ ສີສົງຄາມ ເຈົ້າຂອງໂຮງແຮມດັ່ງກ່າວ, ພ້ອມດ້ວຍແຂກເຂົ້າຮ່ວມເປັນຈໍານວນຫລາຍ.

ເຈົ້າຂອງໂຮງແຮມດັ່ງກ່າວ ໄດ້ລາຍງານວ່າ: ໂດຍເຫັນໄດ້ນະໂຍບາຍອັນຖືກຕ້ອງສອດຄ່ອງຂອງພັກ-ລັດຖະບານ ກໍຄືນະຄອນຫລວງວຽງຈັນໃນການຊຸກຍູ້ສົ່ງເສີມຂະແໜງການທ່ອງທ່ຽວ ແລະ ການບໍລິການໃຫ້ນັບມື້ຂະຫຍາຍຕົວເຂັ້ມແຂງເທື່ອລະກ້າວ, ໂຮງແຮມແຫ່ງນີ້ຈຶ່ງໄດ້ຖືກກໍ່ສ້າງຂຶ້ນໃນໃຈກາງຕົວເມືອງເພື່ອຮອງຮັບການເຕີບໃຫຍ່ຂະຫຍາຍຕົວຂອງການທ່ອງທ່ຽວເວົ້າລວມເວົ້າສະເພາະແມ່ນການບໍລິການພັກແຮມ. ໂຮງແຮມ ວັນແສງ ສູງ 12 ຊັ້ນ, ມີຫ້ອງພັກທັງໝົດ 80 ຫ້ອງ, ອາຄານມີຄວາມສວຍງາມໂດດເດັ່ນ ແລະ ມີມາດຕະຖານລະດັບສາກົນ, ຊຶ່ງລວມມີມູນຄ່າກໍ່ສ້າງທັງໝົດ 7,6 ລ້ານໂດລາສະຫະລັດ. ແລະ ໃນອະນາຄົດຕໍ່ຫນ້າທາງໂຮງແຮມພວກເຮົາຈະເສີມສ້າງການບໍລິການໃໝ່ໃຫ້ມີຄວາມຫລາກຫລາຍ, ທັນສະໄຫມ, ສະດວກສະບາຍເພື່ອໃຫ້ປະທັບໃຈແກ່ລູກຄ້າທີ່ມາພັກເຊົາ.

ໃນໂອກາດນີ້, ທ່ານ ສີຫຸນ ສິດທິລືໄຊ ໄດ້ໃຫ້ກຽດມີຄໍາເຫັນຕໍ່ພິທີວ່າ: ໂຮງແຮມແຫ່ງນີ້, ເປີດໃຫ້ບໍລິການໃນທ່າມກາງທີ່ປະເທດເຮົາພວມເປີດປີທ່ອງທ່ຽວ 2018 ດ້ວຍບັນຍາກາດອັນຟົດຟື້ນ, ທັງເປັນການປະ ກອບສ່ວນສ້າງພື້ນຖານການບໍລິການທ່ອງທ່ຽວຢູ່ນະຄອນຫລວງວຽງຈັນໃຫ້ດີຂຶ້ນ, ແນໃສ່ຮອງຮັບດ້ານທີ່ພັກໃຫ້ແກ່ນັກທ່ອງທ່ຽວທັງພາຍໃນ ແລະ ຕ່າງປະເທດທີ່ມາທ່ອງທ່ຽວນະຄອນຫລວງວຽງຈັນໄດ້ພຽງພໍ, ເຊິ່ງໃນປີທ່ອງທ່ຽວລາວ 2018 ນີ້, ນະຄອນຫລວງວຽງຈັນຕັ້ງເປົ້າດຶງດູດນັກທ່ອງທ່ຽວໃຫ້ໄດ້ຫລາຍກວ່າ 2 ລ້ານເທື່ອຄົນ.