ຈີນພົບເຊື້ອອະຫິວາໝູອາຟຣິກາ ໃນອາຫານລ້ຽງສັດ
ຜູ້ຜະລິດອາຫານສັດລາຍໃຫຍ່ແຫ່ງໜຶ່ງຂອງຈີນແຈ້ງວ່າ: ອາຫານສັດທີ່ຜະລິດໂດຍບໍລິສັດສາຂາປົນເປື້ອນເຊື້ອອະຫິວາໝູອາຟຣິກາ. ຖືເປັນເທື່ອທຳອິດທີ່ພົບເຊື້ອນີ້ໃນອາຫານສັດ ຈຸດກະແສກັງວົນວ່າເຊື້ອໄດ້ລະບາດໄປທົ່ວປະເທດຈີນແລ້ວ ຫລື ບໍ່.
ຖັງເຫລິນເສິນກຣຸບ ເຊິ່ງມີສາຂາປະມານ 40 ແຫ່ງມີໜັງສືແຈ້ງຕໍ່ຕະຫລາດຫລັກຊັບເຊິນເຈິ້ນວ່າ: ພົບເຊື້ອອະຫິວາໝູອາຟຣິກາໃນຕົວຢ່າງອາຫານສັດຂອງບໍລິສັດສາຂາແຫ່ງໜຶ່ງທີ່ບໍລິສັດຖືຫຸ້ນຢູ່ 51% ຍັງບໍ່ຮູ້ຕົ້ນຕໍຂອງເຊື້ອ ແລະ ກຳລັງສືບຫາຢູ່. ບໍລິສັດນີ້ມີລາຍໄດ້ຫລັກຈາກການຜະລິດອາຫານສັດ, ປີຜ່ານມາສ້າງລາຍໄດ້ສູງເຖິງ 12.600 ລ້ານຢວນ ຫາກໍຂະຫຍາຍກິດຈະການໄປຫາທຸລະກິດລ້ຽງ ແລະ ແປຮູບໝູຄືບໍລິສັດຜະລິດອາຫານສັດອື່ນໆຢູ່ຈີນ.
ຈີນລ້ຽງໝູປີລະເກືອບ 700 ລ້ານໂຕ ຫລື ເຄິ່ງໜຶ່ງຂອງທົ່ວໂລກ. ທາງການແຂວງອານຮຸຍ ທາງຕາເວັນອອກຂອງປະເທດຫາກໍພົບເຊື້ອອະຫິວາໝູອາຟຣິກາລະບາດໃນຟາມແຫ່ງໜຶ່ງຢູ່ເທສະບານແຂວງຊິງຢາງ ໃນທ້າຍອາທິດ ຫລັງຈາກຍົກເລີກຂໍ້ຈຳກັດໃນ 4 ເມືອງ ເພາະບໍ່ພົບການລະບາດໃໝ່ໃນໄລຍະ 6 ອາທິດຜ່ານມາ. ທາງການສັນນິຖານວ່າ: ການລະບາດກ່ອນໜ້ານີ້ເປັນຍ້ອນກະສິກອນນຳອາຫານເຫລືອໃນຄອບຄົວໃຫ້ໝູກິນ ເຊິ່ງອາດປົນເປື້ອນເຊື້ອ, ແຕ່ຜູ້ຊ່ຽວຊານສັນນິຖານມາໄລຍະໜຶ່ງແລ້ວວ່າ: ຕົ້ນຕໍເຊື້ອອາດຈະມາຈາກອາຫານລ້ຽງສັດຫລາຍກວ່າ.
