ຮອງນາຍົກລັດຖະມົນຕີ ພົບປະໂອ້ລົມຕໍ່ການນຳຫລັກແຫລ່ງແຂວງຜົ້ງສາລີ

ໃນວັນທີ 8 ພະຈິກນີ້, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີໄດ້ເຄື່ອນໄຫວຢ້ຽມຢາມ ແລະ ໃຫ້ກຽດພົບປະໂອ້ລົມຕໍ່ພະນັກງານການນຳຫລັກແຫລ່ງ ຂອງແຂວງຜົ້ງສາລີ ຢູ່ທີ່ຫ້ອງວ່າການປົກຄອງແຂວງດັ່ງກ່າວ, ຊຶ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນສໍາເລັດທີ່ຄະນະພັກ-ຄະນະນຳ ແລະ ປະຊາຊົນແຂວງຜົ້ງສາລີ ສາມາດປະຕິບັດໄດ້ໃນໄລຍະຜ່ານມາ ແລະ ພ້ອມນີ້, ທ່ານຮອງນາຍົກໄດ້ຍົກໃຫ້ເຫັນຜົນສໍາເລັດອັນພົ້ນເດັ່ນໃນການພັດທະນາເສດຖະກິດ-ສັງຄົມແຫ່ງຊາດ, ສະພາບການຂອງພາກພື້ນ ແລະ ສາກົນ, ຄວາມຫຍຸ້ງຍາກ ແລະ ສິ່ງທ້າທາຍຕໍ່ການພັດທະນາວຽກງານດ້ານຕ່າງໆ. ອັນສຳຄັນ ແມ່ນໄດ້ເນັ້ນໃຫ້ການນຳຫລັກແຫລ່ງຂອງແຂວງເອົາໃຈໃສ່ຕື່ມບາງດ້ານໃນການຊ່ວຍເຫລືອປະຊາຊົນທີ່ໄດ້ຮັບຜົນກະທົບຈາກໄພພິບັດທຳມະຊາດໃນໄລຍະຜ່ານມາ ໂດຍສະເພາະການປະຕິບັດນະໂຍບາຍທີ່ເໝາະສົມ, ການສະໜອງປັດໃຈການຜະລິດ ເປັນຕົ້ນແມ່ນແນວພັນໃຫ້ພຽງພໍ, ສືບຕໍ່ຕ້ານ ແລະ ສະກັດກັ້ນປະກົດການຫຍໍ້ທໍ້ຕ່າງໆ, ໂດຍສະເພາະບັນຫາຢາເສບຕິດ, ຫາງສຽງບໍ່ດີຜ່ານສື່ສັງຄົມອອນລາຍ, ຂີ້ລັກ-ງັດແງະ, ການລັກລອບຄ້າຂາຍເຖື່ອນ ແລະ ເອົາໃຈໃສ່ປັບປຸງຂອດບໍລິການ ແລະ ຊຸກຍູ້ສົ່ງເສີມການລົງທຶນ, ການທ່ອງທ່ຽວໃຫ້ມີຄວາມສະດວກ, ວ່ອງໄວ ແລະ ແກ້ໄຂໄດ້ບັນດາສິ່ງກີດຂວາງ, ສ້າງເງື່ອນໄຂໃຫ້ຜູ້ປະກອບການສາມາດເຂົ້າເຖິງແຫລ່ງທຶນ ແລະ ຕະຫລາດຫລາຍຂຶ້ນ, ປະຕິບັດວິໄນແຜນການ-ການເງິນຢ່າງເຂັ້ມງວດ, ໂປ່ງໃສ ແລະ ມີປະສິດທິຜົນ, ສືບຕໍ່ຊຸກຍູ້ສົ່ງເສີມ ແລະ ນໍາໃຊ້ທ່າແຮງຂອງແຂວງເພື່ອສ້າງເສດຖະກິດ ແລະ ຜະລິດເປັນສິນຄ້າໃຫ້ຫລາຍ, ໂດຍສະເພາະແມ່ນທ່າແຮງການປູກຊາ, ໝາກແໜ່ງ, ການປຸກພືດລະດູແລ້ງ ເພື່ອທົດແທນຜົນເສຍຫາຍຈາກໄພພິບັດ, ຕິດຕາມກວດກາ ແລະ ຈັດຕັ້ງປະຕິບັດບັນດານິຕິກຳທີ່ສຳຄັນຂອງລັດຖະບານ ເປັນຕົ້ນ: ຄໍາສັ່ງເລກທີ 15/ນຍ, ຄໍາສັ່ງເລກທີ 12/ນຍ, ຄຳສັ່ງເລກທີ 34/ນຍ, ຄຳສັ່ງເລກທີ 40/ນຍ, ດຳລັດເລກທີ 177/ລບ ແລະ ອື່ນໆໃຫ້ເຂັ້ມງວດ, ໄດ້ຮັບຜົນດີ ແລະ ມີປະສິດທິຜົນ, ສືບຕໍ່ປັບປຸງຊີວິດການເປັນຢູ່ຂອງປະຊາຊົນໃຫ້ນັບດີຂຶ້ນ.

ໂອກາດດັ່ງກ່າວ, ທ່ານເຈົ້າແຂວງກໍໄດ້ລາຍງານໃຫ້ຊາບວ່າ: ທົ່ວແຂວງສືບຕໍ່ມີຄວາມສະຫງົບທາງດ້ານການເມືອງ, ສັງຄົມມີຄວາມເປັນລະບຽບຮຽບຮ້ອຍໂດຍພື້ນຖານ, ເສດຖະກິດຂະຫຍາຍຕົວຢ່າງຕໍ່ເນື່ອງໃນລະດັບ 7,81%, ການປະຕິບັດແຜນເກັບລາຍຮັບໄລຍະ 10 ເດືອນບັນລຸໄດ້ 329,86 ຕື້ກີບ, ເທົ່າກັບ 87% ຂອງແຜນການປີ, ສ່ວນແຜນລາຍຈ່າຍປະຕິບັດໄດ້ 273,58 ຕື້ກີບເທົ່າກັບ 75,77% ຂອງແຜນການປີ, ປັດຈຸບັນແຂວງມີບ້ານພັດທະນາກວມ 16% ແຕ່ຄຽງຄູ່ກັນນັ້ນກໍຍັງມີຄອບຄົວທຸກຍາກ 26%.