ໄມໂຄຣຊອບຕຳນິລັດຖະບານອາເມລິກາ ເປັນສາເຫດໂຈມຕີທາງໄຊເບີ
ບັນດາບໍລິສັດ ແລະ ອົງການຕ່າງໆທົ່ວໂລກ ຕ່າງກໍເລັ່ງກຽມພ້ອມຮັບມືການໂຈມຕີເທື່ອໃໝ່ຂອງມັລແວຣ໌ເອີ້ນຄ່າໄຖ່ WannaCry ເຊິ່ງເຊື່ອວ່າພວມມີການແກ້ໄຂລະຫັດໃຫ້ເປັນແບບໃໝ່ ເພື່ອໃຫ້ແຜ່ກະຈາຍໄປຕາມເຄືອຂ່າຍຄອມພິວເຕີຕ່າງໆທົ່ວໂລກໄດ້ອີກເທື່ອໜຶ່ງ ໂດຍຜູ້ຊ່ຽວຊານຄາດວ່າຈະເກີດການໂຈມຕີຂອງມັລແວຣ໌ດັ່ງກ່າວພາຍໃນອາທິດນີ້.
ທ່ານນາງ ເບັດກີ້ ພິງຄາຣ໌ດ ຈາກບໍລິສັດດີຈີຕອນ ແຊໂດສ໌ ຂອງສະຫະຣາຊະອານາຈັກ ບອກວ່າ: ເປັນເລື່ອງງ່າຍທີ່ຜູ້ຄວບຄຸມມັລແວຣ໌ WannaCry ຫລື ຜູ້ຂຽນໂປຣແກຣມຮຽນແບບຄົນອື່ນໆ ຈະເຂົ້າໄປແກ້ໄຂລະຫັດມັລແວຣ໌ທີ່ປັດຈຸບັນຖືກນັກວິໄຈຊາວອັງກິດຢຸດການແຜ່ລະບາດໄວ້ ເພື່ອໃຫ້ມັລແວຣ໌ເຮັດສຳເນົາ ແລະ ແຜ່ກະຈາຍເອງອອກໄປໄດ້ອີກເທື່ອໜຶ່ງ ແລະ ເທື່ອນີ້ຈະບໍ່ສາມາດຢຸດການແຜ່ລະບາດໄດ້ຈາກວິທີເກົ່າ.
+ ນັກວິໄຈອັງກິດປົດສະນວນມັລແວຣ໌ເອີ້ນຄ່າໄຖ່ຢຸດການແຜ່ລະບາດທົ່ວໂລກ
+ ໄວຣັດ WannaCry ເອີ້ນຄ່າໄຖ່ໂຈມຕີຄອມພີວເຕີ້ໄປແລ້ວ 99 ປະເທດ
ທັງນີ້, ທ້າຍອາທິດຜ່ານມາ ມັລແວຣ໌ເອີ້ນຄ່າໄຖ່ WannaCry ໄດ້ສ້າງຄວາມເສຍຫາຍໃຫ້ແກ່ລະບົບຄອມພິວເຕີເຖິງ 200.000 ລະບົບ ໃນ 150 ປະເທດ.
ທ່ານ ຄອສຕິນ ຣີອາວ ຜູ້ຊ່ຽວຊານຈາກບໍລິສັດແຄສເປີສກີ ເຊິ່ງແຈ້ງວ່າພົບມັລແວຣ໌ WannaCry 2.0 ທີ່ເປັນແບບໃໝ່ ແລະ ບໍ່ມີລະຫັດທຳລາຍຕົນເອງ (Kill switch) ໄດ້ອອກມາແກ້ຂ່າວວ່າລາຍງານດັ່ງກ່າວບໍ່ແມ່ນຄວາມຈິງ ໂດຍການກວດສອບເທື່ອຫລັງສຸດຍັງບໍ່ພົບມັລແວຣ໌ WannaCry ຮູບແບບໃດທີ່ມີລັກສະນະແບບນີ້, ແຕ່ເຊື່ອວ່າກຸ່ມເຈາະຂໍ້ມູນຜູ້ຢູ່ເບື້ອງຫລັງການໂຈມຕີທາງໄຊເບີເທື່ອໃຫຍ່ໃນທ້າຍອາທິດຜ່ານມາ ຈະຕ້ອງປ່ອຍມັລແວຣ໌ຮູບແບບໃໝ່ອອກໂຈມຕີອີກແນ່ນອນ.
ທ່ານ ແບຣດ ສະມິດ ປະທານເຈົ້າໜ້າທີ່ຝ່າຍກົດໝາຍຂອງບໍລິສັດໄມໂຄຣຊອບ ໄດ້ອອກຖະແຫລງການຕຳນິໜ່ວຍງານຕ່າງໆຂອງລັດຖະບານອາເມລິກາເຊັ່ນ: ສຳນັກງານຂ່າວກາງ (CIA) ແລະ ສຳນັກງານຄວາມໝັ້ນຄົງແຫ່ງຊາດ (NSA) ວ່າເປັນສາເຫດເຮັດໃຫ້ເກີດການໂຈມຕີທາງໄຊເບີເທື່ອໃຫຍ່ ເນື່ອງຈາກປ່ອຍໃຫ້ຂໍ້ມູນຊ່ອງຫວ່າງຄວາມປອດໄພຂອງລະບົບປະຕິບັດການຄອມພິວເຕີຕ່າງໆທີ່ເກັບສະສົມໄວ້ຮົ່ວໄຫລອອກໄປ ຈົນຮອດມືອາດຊະຍາກຳ ແລະ ມີການນຳໄປເຜີຍແຜ່ໃນເວັບໄຊ ຄືວິກິລິກ.
ເຖິງຢ່າງໃດກໍຕາມ, ຜູ້ຊ່ຽວຊານໃຫ້ຄຳແນະນຳວ່າ: ຄອມພິວເຕີສ່ວນບຸກຄົນທີ່ໃຊ້ວຽກທົ່ວໄປ ມີຄວາມສ່ຽງຕໍ່າຈະຖືກໂຈມຕີຈາກມັລແວຣ໌ເອີ້ນຄ່າໄຖ່ WannaCry ຮູບແບບທີ່ມີການກວດພົບໃນປັດຈຸບັນ ໂດຍຜູ້ທີ່ບໍ່ໄດ້ໃຊ້ລະບົບປະຕິບັດການວິນໂດສບໍ່ມີຄວາມສ່ຽງຖືກໂຈມຕີຈາກມັລແວຣ໌, ສ່ວນຜູ້ທີ່ໃຊ້ລະບົບປະຕິບັດການວິນໂດສຄວນມີການອັບເດດ ເພື່ອອັດຊ່ອງຫວ່າງຄວາມປອດໄພ ແລະ ສຳຮອງຂໍ້ມູນໄວ້ລ່ວງໜ້າ.
ຜູ້ຊ່ຽວຊານຍັງແນະນຳໃຫ້ຜູ້ໃຊ້ທີ່ຖືກໂຈມຕີລ໊ອກລະບົບດ້ວຍມັລແວຣ໌ແລ້ວ, ຢ່າຈ່າຍເງິນຄ່າໄຖ່ຕາມທີ່ມີການຮຽກຮ້ອງ ເພາະບໍ່ສາມາດຮັບປະກັນໄດ້ວ່າລະບົບຈະໄດ້ຮັບການປົດລ໊ອກ ຖ້າຈ່າຍເງິນຄ່າໄຖ່ໄປໃຫ້ອາດຊະຍາກຳ.
