ລັດຖະບານສະໜອງງົບ 35 ຕື້ກີບ ສ້ອມແປງຊົນລະປະທານໃຫ້ທວງທັນການຜະລິດລະດູແລ້ງນີ້
ຫົວໜ້າກົມຊົນລະປະທານ ກະຊວງກະສິກໍາ ແລະ ປ່າໄມ້ ໃຫ້ຮູ້ວ່າ: ເນື່ອງຈາກປີນີ້ທົ່ວປະເທດໄດ້ຮັບຜົນກະທົບໜັກຈາກໄພພິບັດທໍາມະຊາດ ໂດຍສະເພາະໄພນໍ້າຖ້ວມໄດ້ສ້າງຄວາມເສຍຫາຍໃຫ້ແກ່ພື້ນຖານໂຄງລ່າງດ້ານຊົນລະປະທານ ຈໍານວນ 650 ແຫ່ງ ປະເມີນມູນຄ່າຄາດວ່າຈະຕ້ອງໃຊ້ງົບເຂົ້າໃນການສ້ອມແປງ ປະມານ 238 ຕື້ກີບ. ເປັນຕົ້ນແມ່ນລະບົບຫົວງານ (ອ່າງເກັບນໍ້າ, ຝ່າຍນໍ້າລົ້ນ, ປະຕູນໍ້າ, ຈັກສູບນໍ້າ) ແລະ ລະບົບຄອງເໝືອງ. ດັ່ງນັ້ນໄດ້ແບ່ງອອກເປັນ 2 ບ້ວງງົບປະມານຄື: ງົບປະມານ 70 ຕື້ກີບ ມີ 336 ໂຄງການ ແລະ ງົບປະມານ 94 ຕື້ກວ່າກີບ ມີ 410 ໂຄງການ ແລະ ໄດ້ສະເໜີຂັ້ນເທິງອະນຸມັນໃນເບື້ອງແລ້ວ ຈໍານວນ 35 ຕື້ກີບ ເພື່ອນໍາໄປສົມທົບກັບການປະກອບສ່ວນຂອງປະຊາຊົນ, ຜູ້ປະກອບການ ແລະ ພາກສ່ວນຕ່າງໆ ເພື່ອຟື້ນຟູ-ສ້ອມແປງສຸກເສີນ ຊົນລະປະທານ ຈໍານວນ 242 ໂຄງການໃຫ້ທັນຮັບໃຊ້ເຂົ້າໃນການຜະລິດໃນລະດູແລ້ງນີ້, ລວມມີ 11 ແຂວງ, ໃນນີ້, ມີ 4 ແຂວງພາກເໜືອຄື: ບໍ່ແກ້ວ, ໄຊຍະບູລີ, ຫຼວງພະບາງ ແລະ ແຂວງຫົວພັນ, 5 ແຂວງພາກກາງ: ນະຄອນຫຼວງວຽງຈັນ, ແຂວງວຽງຈັນ, ບໍລິຄໍາໄຊ, ຄໍາມ່ວນ ແລະ ແຂວງສະຫວັນນະເຂດ ແລະ 2 ແຂວງພາກໃຕ້ມີ: ສະລະວັນ ແລະ ຈໍາປາສັກ, ສ່ວນບັນດາໂຄງການທີ່ເຫຼືອແມ່ນສະເໜີໃຫ້ຂຶ້ນແຜນການຟື້ນຟູ-ສ້ອມແປງປົກກະຕິໃນປີຕໍ່ໄປ.
ຈຸດສຸມການຜະລິດສະບຽງອາຫານ ຕົ້ນຕໍແມ່ນແນໃສ່ບັນດາແຂວງທີ່ນອນໃນ 7 ທົ່ງພຽງໃຫຍ່ຄື: ແຂວງວຽງຈັນ, ນະຄອນຫຼວງ, ບໍລິຄໍາໄຊ, ຄໍາມ່ວນ, ສະຫວັນນະເຂດ, ສາລະວັນ ແລະ ຈໍາປາສັກ, ສ່ວນປູກເຂົ້ານາແຊງແມ່ນຈະສຸມໃສ່ 4 ແຂວງຕົ້ນຕໍຄື: ສະຫວັນນະເຂດ, ຄໍາມ່ວນ, ຈໍາປາສັກ ແລະ ແຂວງວຽງຈັນ. ສ່ວນການປູກພືດແມ່ນແນໃສ່ທຸກແຂວງໃນຂອບເຂດທົ່ວປະເທດ ໂດຍສະເພາະບັນດາແຂວງຊາຍແດນຕິດຈອດກັບຕ່າງປະເທດທີ່ມີເງື່ອນໄຂ ແລະ ການຕະຫຼາດເພື່ອສະດວກໃນການສົ່ງອອກ.
