ຮ້ານ ໄຄສີ ຫັດຖະກໍາ ໄດ້ຮັບ 2 ລາງວັນຊ້ອນໃນງານມະຫາກໍາສີມືຫັດຖະກໍາລາວ ຄັ້ງທີ 17
ຮ້ານ ໄຄສີ ຫັດຖະກໍາ ຍາດໄດ້ລາງວັນລັດຖະມົນຕີ ກະຊວງອຸດສາຫະກໍາ ແລະ ການຄ້າ ໃນການປະກວດແຂ່ງຂັນຜະລິດຕະພັນດີເດັ່ນ 2018 ໃນຫົວຂໍ້ “Lao SOZAICONTEST” ດ້ວຍຜະລິດຕະພັນປະເພດຜ້າຕົບແຕ່ງພາຍໃນ (ຮູບແມງກະເບື່ອ) ແລະ ຍາດໄດ້ລາງວັນທີ 1 ຈາກການປະກວດຕົບແຕ່ງຮ້ານວາງສະແດງ ຫັດຖະກໍາທີ່ງົດງາມຕິດພັນກັບການທ່ອງທ່ຽວ ໃນງານມະຫາກໍາສີມືຫັດຖະກໍາລາວ ຄັ້ງນີ້ ທີ່ຈັດຂຶ້ນລະຫວ່າງວັນທີ 27 ຕຸລາ-4 ພະຈິກນີ້ ທີ່ສູນການຄ້າລາວ-ໄອເຕັກ ນະຄອນຫຼວງວຽງຈັນ.
ທ່ານ ນາງ ໄຄສີ ສໍພາບມີໄຊ ອໍານວຍການຂອງຮ້ານ ສີໄຄ ຫັດຖະກໍາ ໃຫ້ຮູ້ວ່າ: ຕົນເອງມີອາຊີບເປັນທະຫານມາກ່ອນ ແລະ ໄດ້ຕັດສິນໃຈລາອອກກໍາລັງປະກອບອາວຸດ ແລ້ວຫັນມາເຮັດທຸລະກິດຫັດຖະກໍານີ້ແທນ ແຕ່ ປີ 2013 ຕາມເງື່ອນໄຂ ແລະ ຄວາມອາດສາມາດທີ່ຕົນມີຢູ່ ເພາະເປັນວຽກທີ່ຕົນເອງຮັກມັກມາແຕ່ນ້ອຍ ແລະ ເປັນການສືບທອດບົດຮຽນມາຈາກມູນເຊື້ອແມ່ເຖົ້າມາຈົນຮອດປັດຈຸບັນ. ຜະລິດຕະພັນຕົ້ນຕໍສະເພາະຮ້ານຂອງຕົນແມ່ນ ສິ້ນໄໝ, ແພບ່ຽງ, ແພຕັດເສື້ອ, ຜ້າຄຸມໄຫຼ່, ຜ້າໂຊວ, ຜ້າພັນຄໍ ແລະ ຜະລິດຕະພັນອື່ນໆ ທີ່ຜະລິດຈາກໄໝມ້ອນອື່ນໆອີກຫຼາຍຢ່າງທີ່ຍ້ອມດ້ວຍສີທໍາມະຊາດ, ສ່ວນແຮງງານຜະລິດຕົ້ນຕໍ ແມ່ນສະມາຊິກພາຍໃນຄອບຄົວເອງ, ຊຶ່ງປັດຈຸບັນມີກີ່ຕໍ່າຜ້າແພທັງໝົດ 16 ກີ່, ໃນແຕ່ລະເດືອນສາມາດຜະລິດ ຜະລິດຕະພັນຕ່າງໆໄດ້ ຫຼາຍຊະນິດ ເພື່ອສົ່ງອອກໄປປະເທດຍີ່ປຸ່ນ ໂດຍສະເພາະແມ່ນປະເພດຜ້າ, ສ່ວນຜະລິດຕະພັນທີ່ຂາຍຢູ່ພາຍໃນ ສ່ວນຫຼາຍແມ່ນຜະລິດຕາມລູກຄ້າສັ່ງ. ລາຄາຜະລິດຕະພັນຂອງຕົນເລີ່ມຕົ້ນແຕ່ 250.000 ກີບ (ປະເພດຜ້າພັນຄໍ) ໄປຮອດລາຄາສູງສຸດປະມານ 30 ລ້ານກີບ (ສິນຄ້າປະເພດ ສິ້ນ ຫຼືຊຸດເຈົ້າສາວ).
ໃນໄລຍະຜ່ານມາຮ້ານ ໄຄສີ ຫັດຖະກໍາ ຍັງໄດ້ສົ່ງຜະລິດຕະພັນຫັດຖະກໍາຂອງຕົນເຂົ້າປະກວດຢູ່ປະເທດຍີ່ປຸ່ນ ແລະ ສາມາດຍາດໄດ້ລາງວັນທີ 1 ຈາກການປະກວດ 4 ປີຊ້ອນ (ປີນີ້ເປັນປີທີ 4). ທ່ານ ນາງ ໄຄສີ ສໍພາບມີໄຊ ໃຫ້ຮູ້ຕື່ມວ່າ: ຫຼັງຈາກຕົນເອງຫັນມາເຮັດອາຊີບນີ້, ໄດ້ຊ່ວຍໃຫ້ຄອບຄົວມີລາຍຮັບເພີ່ມຂຶ້ນ ແລະ ສາມາດນໍາມາປັບປຸງຊີວິດການເປັນຢູ່ຂອງຄອບຄົວດີຂຶ້ນຫຼາຍ ທຽບໃສ່ແຕ່ກ່ອນ ແລະ ສາມາດສົ່ງລູກໄປສຶກສາຕໍ່ຢູ່ຕ່າງປະເທດໄດ້. ຮ້ານ ຫັດຖະກໍາ ແຫ່ງນີ້ ຕັ້ງຢູ່ ບ້ານ ໜອງບົວທອງເໜືອ ເມືອງສີໂຄດຕະບອງ ນະຄອນຫຼວງວຽງຈັນ ໂດຍມີຊື່ວ່າ: “ຮ້ານ ໄຄສີ ຫັດຖະກໍາ” ເບີຕິດຕໍ່ 020 28215575 ແລະ 020 77836463.
