ລາວ-ຈີນ ເສີມຂະຫຍາຍສາຍພົວພັນຮ່ວມມືດ້ານວຽກງານກາແດງ
ໃນວັນທີ 30 ຕຸລານີ້, ທ່ານ ຄຳຮຸ່ງ ເຮືອງວົງສີ ປະທານອົງການກາແດງລາວ ໄດ້ຕ້ອນຮັບ ທ່ານ ລີ ປາວເຟິງ ຮອງປະທານ ສະພາກາແດງ ສາຂານະຄອນຫລວງປັກກິ່ງ ສປ ຈີນ ພ້ອມດ້ວຍຄະນະ ທີ່ໄດ້ເດີນທາງມາເຮັດຢ້ຽມຢາມ ແລະ ວຽກຢູ່ລາວ ໃນປັດຈຸບັນ ເພື່ອແນ່ໃສ່, ເສີມຂະຫຍາຍສາຍພົວພັນຮ່ວມມື ລະຫວ່າງສອງອົງການກາແດງ ສປປ ລາວ- ສປ ຈີນ ໃຫ້ແໜ້ນແຟ້ນຍິ່ງຂຶ້ນ.
ໃນໂອກາດນີ້ ທ່ານ ປະທານອົງການກາແດງລາວໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ການຢ້ຽມຢາມລາວ ຂອງຄະນະຄັ້ງນີ້ ເຊິ່ງເປັນຂີດໝາຍສໍາຄັນແຫ່ງການເພີ່ມທະວີເສີມຂະຫຍາຍສາຍພົວພັນຮ່ວມມືອັນແໜ້ນແຟ້ນ ລະຫວ່າງສອງພັກສອງລັດ ແລະ ປະຊາຊົນສອງປະເທດ, ເວົ້າສະເພາະກໍແມ່ນສອງ ອົງການກາແດງລາວ ແລະ ຈີນ ທີ່ມີມາແຕ່ດົນນານແລ້ວນັ້ນໃຫ້ກ້າວສູ່ລວງເລິກ ແລະ ແຕກດອອອກຜົນຫງອກງາມຍິ່ງໆຂຶ້ນ, ພ້ອມນີ້, ທ່ານ ຍັງໄດ້ສະເໜີໃຫ້ສະພາກາແດງຈີນ ຊ່ວຍສ້າງສູນກູ້ໄພຢູ່ລາວ ແລະ ອາດສົ່ງພະນັກງານວິຊາການ ມາສຶກສາຄວາມເປັນໄປໄດ້ ເພື່ອເປັນການແລກປ່ຽນບົດຮຽນເຊິ່ງກັນ ແລະ ກັນ, ໃນວຽກງານກາແດງມີປະສິດທິພາບສຸງຂຶ້ນ.
ໃນໂອກາດດຽວກັນທ່ານຮອງປະທານ ສະພາກາແດງ ສາຂານະຄອນຫລວງປັກກິ່ງ ໄດ້ແຈ້ງໃຫ້ຊາບຈຸດປະສົງມາຢ້ຽມຢາມໃນຄັ້ງນີ້ ຊຶ່ງເປັນຂີດໝາຍອັ່ນສຳຄັນໃນການເສີມສ້າງສາຍພົວພັນ ແລະການຮ່ວມມືຂອງສອງອົງການດັ່ງກ່າວ ແລະ ສະແດງຄວາມຍິນດີໃຫ້ມີການສຶກສາຄວາມເປັນໄດ້ໃນການສ້າງສູນ (ກູ້ໄພອະບູລັງ) ແລະ ຈະສືບຕໍ່ໃຫ້ການຊ່ວຍເຫຼືອໃນວຽກງານອື່ນໆອີກ.
