6 ສັບພະຄຸນທີ່ໜ້າສົນໃຈຂອງນຳ້ມັນຫອມລະເຫີຍດອກກຸຫລາບ

ນຳ້ມັນຫອມລະເຫີຍດອກ ກຸຫລາບ (rose essential oil) ນອກຈາກມີກິ່ນຫອມສະເພາະໂຕເປັນເອກະລັກເດັ່ນແລ້ວ ຍັງມີສັບພະຄຸນອີກຫລາຍຢ່າງດັ່ງຕໍ່ໄປນີ້ :

1. ຫລຸດອາການຊຶມເສົ້າຂອງແມ່ລູກອ່ອນ : ອາການຊຶມເສົ້າແມ່ນອາການປ່ວຍທີ່ເກີດຂຶ້ນໄດ້ກັບຜູ້ຄົນທຸກເພດໄວຈາກສາເຫດສານເຄມີໃນສະໝອງທີ່ເຮັດວຽກຜິດປົກກະຕິ ການປິ່ນປົວໃນເບື້ອງຕົ້ນໄດ້ແກ່ : ການກິນຢາຢ່າງເຄັ່ງຄັດ, ແຕ່ນອກຈາກຢາແຜນປະຈຸບັນແລ້ວ ຍັງມີສະໝຸນໄພບາງຊະນິດທີ່ສາມາດຊ່ວຍຫລຸດຜ່ອນອາການດັ່ງກ່າວໄດ້ ເຊິ່ງກໍແມ່ນນຳ້ມັນຫອມລະເຫີຍສະກັດຈາກດອກກຸຫລາບ. ຜົນການທົດລອງພົບວ່າຫລັງຈາກແມ່ລູກອ່ອນໃຊ້ນຳ້ມັນຫອມລະເຫີຍແລ້ວ ອາການຊຶມເສົ້າຫລັງເກີດລູກຫລຸດລົງ ແລະ ຄວາມເຄັ່ງຄຽດກໍຄ່ອຍໆຫາຍໄປ ພຽງແຕ່ໃຊ້ນຳ້ມັນຫອມລະເຫີຍກິ່ນດອກກຸຫລາບ 1 ຢອດ ປະສົມລົງໃນອ່າງອາບນຳ້ ແລະ ແຊ່ໂຕຢູ່ໃນນັ້ນກໍຈະຮູ້ສຶກຜ່ອນຄາຍໄດ້ດີ.
2. ປິ່ນປົວຜິວທີ່ມີບັນຫາສິວ : ນຳ້ມັນຫອມລະເຫີຍກິ່ນດອກກຸຫລາບເປັນໂຕຊ່ວຍໜຶ່ງທີ່ດີ ເນື່ອງຈາກມີສານຕໍ່ຕ້ານເຊື້ອແບັກທີເຣຍທີ່ສາມາດຊ່ວຍຂ້າເຊື້ອສິວໄດ້ຢ່າງມີປະສິດທິພາບ. ໃນການໃຊ້ນຳ້ມັນຫອມລະເຫີຍປິ່ນປົວສິວນັ້ນກໍພຽງແຕ່ທາໃສ່ເທິງຫົວສິວ 1 – 2 ຢອດ ມື້ລະ 3 ເທື່ອ ພຽງເທົ່ານີ້ສິວກໍຈະຄ່ອຍໆຍຸບລົງ ທັງຍັງເປັນການຜ່ອນຄາຍ ແລະ ຊ່ວຍບຳລຸງສຸຂະພາບຜິວໄປພ້ອມໆກັນ.
3. ຮັກສາຄວາມດຸ່ນດ່ຽງຮໍໂມນ : ເພາະບາງເທື່ອສາເຫດຂອງຮໍໂມນບໍ່ດຸ່ນດ່ຽງກໍມາຈາກຄວາມເຄັ່ງຄຽດນັ້ນເອງ ແລະ ນອກຈາກຈະຊ່ວຍຮັກສາຄວາມດຸ່ນດ່ຽງຂອງຮໍໂມນແລ້ວ ນຳ້ມັນຫອມລະເຫີຍກິ່ນດອກກຸຫລາບຍັງມີລິດຊ່ວຍເພີ່ມອາລົມທາງເພດໄດ້ນຳ ພຽງແຕ່ໃຊ້ນຳ້ມັນນວດລົງຄໍ 2 – 3 ຢອດກ່ອນເຂົ້ານອນ ກິ່ນຫອມໆຂອງກຸຫລາບຈະຊ່ວຍໃຫ້ຮູ້ສຶກຜ່ອນຄາຍໄດ້ດີ.
4. ຫລຸດອາການອັກເສບ : ນຳ້ມັນກຸຫລາບມີລິດຊ່ວຍຫລຸດອາການອັກເສບ ເຊິ່ງສາມາດເອົາມາໃຊ້ປິ່ນປົວອາການປ່ວຍໄດ້ຫລາກຫລາຍ ບໍ່ວ່າຈະແມ່ນອາການເຈັບຫົວຈາກໄຂ້ຫວັດ, ອາການເຈັບທ້ອງຈາກອາຫານບໍ່ຍ່ອຍ ແລະ ອາການປວດຕາມກ້າມຊີ້ນທີ່ເກີດຈາກການປວດຂໍ້ ແລະ ປະດົງຂໍ້ ພຽງແຕ່ເອົານຳ້ມັນຫອມລະເຫີຍກຸຫລາບປະສົມກັບນຳ້ ແລະ ໃຊ້ອາບຕາມປົກກະຕິ, ແຕ່ບໍ່ຄວນປະສົມໃນນຳ້ຮ້ອນ ຄວນເປັນນຳ້ທຳມະດາ ຫລື ນຳ້ເຢັນຈະດີກ່ວາ.
5. ຫລຸດອາການປວດປະຈຳເດືອນ : ນຳ້ມັນຫອມລະເຫີຍກິ່ນກຸຫລາບເປັນວັດຖຸດິບຈາກທຳມະຊາດທີ່ມະຫັດສະຈັນ ເພາະມີລິດຊ່ວຍຄາຍການຫົດໂຕຂອງກ້າມຊີ້ນ ທ່ານໃດທີ່ມີອາການປວດປະຈຳເດືອນເປັນປະຈຳສາມາດໃຊ້ນຳ້ມັນຫອມລະເຫີຍກິ່ນນີ້ບັນເທົາອາການປວດໄດ້ ນອກຈາກນີ້ຍັງຫລຸດອາການວິນຫົວປຸ້ນທ້ອງປວດຮາກໄປພ້ອມໆກັນ ພຽງແຕ່ໃຊ້ນຳ້ມັນກຸຫລາບ 1 – 2 ຢອດ ປະສົມກັບນຳ້ ແລະ ອາບຕາມປົກກະຕິ ອາການປວດກໍຈະຄ່ອຍໆຫາຍໄປ ແລະ ຮູ້ສຶກຜ່ອນຄາຍຂຶ້ນ.
6. ປ້ອງກັນເຊື້ອໄວຣັສ : ນອກຈາກຈະມີລິດຂ້າເຊື້ອແບັກທີເຣຍແລ້ວ ນຳ້ມັນກິ່ນກຸຫລາບຍັງສາມາດຂ້າເຊື້ອໄວຣັສໄດ້ນຳ ແລະ ເຊື້ອໄວຣັສທີ່ຢູ່ໃນອາກາດອາດເປັນໂຕການທີ່ເຮັດໃຫ້ເຮົາເຈັບປ່ວຍໂດຍບໍ່ຮູ້ໂຕ ຫາກທ່ານກຳລັງຊອກຫາສະເປຣສີດເຮືອນແບບໃໝ່ຢູ່ ກໍລອງໃຊ້ນຳ້ມັນຫອມລະເຫີຍກິ່ນດອກກຸຫລາບສີດຕາມຝາເຮືອນ, ໂຊຟາ, ເຟີນິເຈີ ຫລື ໃນອາກາດທົດແທນສະເປຣແບບເກົ່າທີ່ເຄີຍໃຊ້ ຮັບຮອງວ່າເຮືອນຂອງທ່ານຈະສະອາດຂຶ້ນອີກຫລາຍລະດັບ ແລະ ລະບົບພູມຕ້ານທານໃນຮ່າງກາຍກໍຈະເຮັດວຽກໄດ້ຢ່າງມີປະສິດທິພາບຍິ່ງຂຶ້ນແນ່ນອນ.

     – ສຳລັບການໃຊ້ນຳ້ມັນຫອມລະເຫີຍຈາກກຸຫລາບໃຫ້ໄດ້ຜົນທີ່ສຸດ ທ່ານຄວນໃຊ້ປະສົມໃນການອາບນຳ້ ແລະ ສີດສະເປຣຕາມບໍລິເວນຕ່າງໆ ທັງຍັງຄວນເອົາໄປປະສົມກັບນຳ້ມັນຊະນິດອື່ນເພື່ອເຈືອຈາງຄວາມເຂັ້ມຂຸ້ນ ບໍ່ໃຫ້ອອກລິດແຮງຈົນເກີນໄປ, ຄວນທົດສອບອາການແພ້ກ່ອນໃຊ້ທຸກເທື່ອ ຫາກບໍ່ໝັ້ນໃຈຄວນປຶກສາແພດຢ່າງລະອຽດ ແລະ ແມ່ຍິງຖືພາບໍ່ຄວນໃຊ້ ເພາະອາດຈະເພີ່ມໂອກາດໃຫ້ຫລຸລູກໄດ້ໃນບາງຄົນ.