ລາວເພີ່ມທະວີການມີຄວາມປອດໄພ ແລະ ສຸຂະພາບທີ່ດີຂອງຜູ້ອອກແຮງງານ
ວຽກຄວາມປອດໄພ ແລະ ສຸຂະພາບແຮງງານ ແມ່ນກິດຈະກຳຮ່ວມລະຫວ່າງຜູ້ໃຊ້ແຮງງານ ແລະ ຜູ້ອອກແຮງງານ ໃນການຮັບປະກັນຄວາມປອດໄພ ແລະ ສຸຂະພາບແຮງງານໃນສະຖານທີ່ເຮັດວຽກ, ເຊິ່ງການມີຄວາມປອດໄພ ແລະ ມີສຸຂະພາບທີ່ດີຂອງຜູ້ອອກແຮງງານ ແມ່ນມີຄວາມຈຳເປັນ ທີ່ລັດຖະບານ ແລະ ຜູ້ໃຊ້ແຮງງານ ຕ້ອງໄດ້ເອົາໃຈໃສ່, ຊຶ່ງກອງປະຊຸມຄວບຄຸມຄວາມປອດໄພດັ່ງກ່າວໄດ້ຈັດຂຶ້ນ, ໂດຍມີຜູ້ອຳນວຍການອົງການແຮງງານສາກົນຮັບຜິດຊອບປະເທດໄທ, ກຳປູເຈຍ ແລະ ສປປ ລາວ, ຜູ້ຈັດການກອງທຶນວີເຊີນເຊໂລຟັນ ແລະ ພາກສ່ວນກ່ຽວຂ້ອງຂອງ ສປປ ລາວເຂົ້າຮ່ວມ. ເພື່ອຮັບຟັງລາຍງານຄວາມຄືບໜ້າຂອງໂຄງການ ແລະ ຜົນການສຳຫລວດຂໍ້ມູນ ແລະ ປະເມີນຄວາມປອດໄພ ແລະ ສຸຂະພາບແຮງງານໃນການຜະລິດກາເຟຂອງລາວ, ພ້ອມທັງປຶກສາຫາລືກ່ຽວກັບວິທີການ, ໄລຍະຈັດຕັ້ງປະຕິບັດ ແລະ ກິດຈະກຳໃນຕໍ່ໜ້າ.
ແລະ ໃນໂອກາດດຽວກັນ, ກໍໄດ້ມີພິທີເຊັນບົດບັນທຶກຂໍ້ຕົກລົງການຮ່ວມມືລະຫວ່າງກະຊວງແຮງງານ ແລະ ສະຫວັດດີການສັງຄົມ ແລະ ອົງການແຮງງານສາກົນກ່ຽວກັບໂຄງການດັ່ງກ່າວອີກດ້ວຍ ເພື່ອເພີ່ມທະວີຄວບຄຸມຄວາມປອດໄພຂອງຜູ້ອອກແຮງງານໃນລາວໃຫ້ດີຂຶ້ນກວ່າເກົ່າ ດັ່ງທ່ານບຸນຄົງ ຫລ້າສຸກັນ ຮອງລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ ກ່າວວ່າ: ຄວາມປອດໄພ ແລະ ສຸຂະພາບແຮງງານ ແມ່ນປັດໄຈໜຶ່ງທີ່ສຳຄັນ ໃຫ້ແກ່ການດຳເນີນການຜະລິດຂອງບັນດາຫົວໜ່ວຍທຸລະກິດ ໂດຍສະເພາະແມ່ນການສ້າງຄວາມປອດໄພ ແລະ ສຸຂະ ພາບທີ່ດີຂອງຜູ້ອອກແຮງງານ ຫລື ກຳລັງການຜະລິດຂອງປະເທດ ແມ່ນຄວາມຈຳເປັນຂອງລັດຖະ ບານ ທີ່ຈະຕ້ອງໄດ້ເອົາໃຈໃສ່ ສ້າງໃຫ້ມີນະໂຍບາຍ ແລະ ນິຕິກຳທີ່ເໝາະສົມ ເພື່ອຫລຸດຜ່ອນອຸບັດ ເຫດແຮງງານ ແລະ ພະຍາດອາຊີບ, ທັງເປັນການປ້ອງກັນ ແລະ ຄວບຄຸມຄວາມສ່ຽງອັນຕະລາຍທີ່ອາດຈະເກີດຂຶ້ນຢູ່ໃນສະຖານທີ່ເຮັດວຽກ, ເຊິ່ງປັດຈຸບັນ ຮ່າງດຳລັດວ່າດ້ວຍຄວາມປອດໄພ ແລະ ສຸຂະພາບແຮງງານ ກໍໄດ້ຜ່ານກອງປະຊຸມລັດຖະບານສະໄໝສາມັນ ປະຈຳເດືອນຕຸລາ 2018 ນີ້ແລ້ວ.
