ສປ ຈີນ ເພີ່ມທະວີການພົວພັນຮ່ວມມືດ້ານວຽກງານສື່ມວນຊົນ

ກອງປະຊຸມການຮ່ວມມືດ້ານວຽກງານສື່ມວນຊົນ ຕາມຂໍ້ລິເລີ່ມໜຶ່ງແລວໜຶ່ງເສັ້ນທາງ ປະຈຳປີ 2018 ໄຂຂຶ້ນຢ່າງເປັນທາງການໃນວັນທີ 30 ຕຸລານີ້, ທີ່ນະຄອນໂປອ່າວ, ແຂວງໄຫໜານ ສປ ຈີນ, ໂດຍມີທ່ານ ຫລີ ບາວ ເຊີນ (Mr Li Baoshan) ຫົວໜ້າຄະນະບັນນາທິການໃຫຍ່ໜັງສືພິມປະຊາຊົນລາຍວັນຂອງຈີນ, ມີຜູ້ຕາງໜ້າຈາກຄະນະຈັດຕັ້ງສູນກາງພັກກອມມູນິດຈີນ, ພ້ອມດ້ວຍຄະນະບັນນາທິການສື່ສິ່ງພິມ, ສື່ອີເລັກໂຕຣນິກ ແລະ ນັກຂ່າວຈາກທຸກທະວີບເຂົ້າຮ່ວມເປັນຈໍານວນຫລາຍ.

ທ່ານ ຫລີ ບາວ ເຊີນ ໄດ້ລາຍງານໃຫ້ຮູ້ວ່າ: ການຮ່ວມມືດ້ານສື່ມວນຊົນໃນຄັ້ງນີ້, ເປັນການນໍາສະເໜີການພົວພັນຮ່ວມມືດ້ານເສດຖະກິດ, ການຄ້າ-ການລົງທຶນລະຫວ່າງຈີນກັບບັນດາປະເທດເຂດອາຊີໃຕ້ ແລະ ອາຊີຕາເວັນອອກສ່ຽງໃຕ້ ໃນການພັດທະນາປະເທດຂອງປະທານ ສີ ຈິ້ນຜິງ ຕາມຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ໂດຍຢຶດໝັ້ນຫລັກການ “ຮ່ວມປຶກສາ, ຮ່ວມສ້າງ ແລະ ຮ່ວມຊົມໃຊ້” ເຊິ່ງໄດ້ກາຍເປັນຍຸດທະສາດ ແລະ ນະໂຍບາຍໃໝ່ ເພື່ອເປີດປະຕູສູ່ພາຍນອກຂອງຈີນ.

ຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ປະກອບມີການເຊື່ອມໂຍງທາງດ້ານການຄົມມະນາຄົມທາງບົກ ເຊັ່ນ: ທາງລົດ, ທາງລົດໄຟ. ໃນການຂົນສົ່ງສິນຄ້າອອກສູ່ບັນດາປະເທດອາຊຽນ, ບັນດາປະເທດໃນເຂດອາຊີໃຕ້ ເພື່ອອອກໄປສູ່ປະເທດອື່ນໆທົ່ວໂລກ. ນອກນີ້, ຂໍ້ລິເລີ່ມດັ່ງກ່າວ, ຍັງໄດ້ຊຸກຍູ້ໃຫ້ແຂວງໄຫໜານກາຍເປັນເຂດເສດຖະກິດສະເພາະ ກໍຄື ການສ້າງແຂວງດັ່ງກ່າວຕາມ 4 ບາດກ້າວຄື: ສ້າງແຂວງໄຫໜານໃຫ້ເປັນເຂດການຄ້າເສລີ, ເປັນເຂດຂົນສົ່ງສິນຄ້າທາງທະເລ, ເປັນແຂວງທ່ອງທ່ຽວ ແລະ ດຶງດູດການລົງທຶນ ​ແລະ ສ້າງແຂວງໄຫໜານໃຫ້ກາຍເປັນແຂວງເຂດອຸດສາຫະກຳ ແລະ ທັນສະໄໝ.