ກະຊວງສຶກສາຄັດເລືອກຄູເຝິກຫຼັກແຫຼ່ງ ແລະ ຄູເຝິກປະຈໍາແຂວງ ສໍາລັບວຽກງານບໍາລຸງຄູປະຈໍາການ
ກົມສ້າງຄູ ກະຊວງສຶກສາທິການ ແລະ ກິລາ ໄດ້ຈັດກອງປະຊຸມຄັດເລືອກຄູເຝິກຫຼັກແຫຼ່ງ ແລະ ຄູເຝິກປະຈໍາແຂວງ ສໍາລັບວຽກງານບໍາລຸງຄູປະຈໍາການ, ຂຶ້ນໃນວັນທີ 30 ຕຸລາ-2 ພະຈິກນີ້, ທີ່ສະຖາບັນຄົ້ນຄວ້າວິທະຍາສາດ ການສຶກສາ ໃນນະຄອນຫຼວງວຽງຈັນ, ໂດຍການເຂົ້າຮ່ວມຂອງທ່ານ ເກດ ພັນລັກ ວ່າການຫົວໜ້າກົມສ້າງຄູ ກະຊວງສຶກສາທິການ ແລະ ກິລາ, ມີຜູ້ຕາງໜ້າພະແນກສຶກສາທິການ ແລະ ກິລາ 17 ແຂວງ ແລະ ຜູ້ຕາງໜ້າຈາກວິທະຍາໄລຄູ 8 ແຫ່ງໃນທົ່ວປະເທດເຂົ້າຮ່ວມຢ່າງພ້ອມພຽງ ເພື່ອໃຫ້ມີຄວາມຮູ້ ແລະ ເຂົ້າໃຈເປັນເອກະພາບກັນກ່ຽວກັບ ການພັດທະນາ ແລະ ການຈັດຕັ້ງປະຕິບັດຫຼັກສູດປະຖົມສຶກສາ ສະບັບປັບປຸງໃໝ່ ແລະ ທົບທວນຄືນມາດຕະຖານການສະໝັກເປັນຄູເຝິກຫຼັກແຫຼ່ງ ແລະ ຄູເຝິກປະຈໍາແຂວງ, ການປະເມີນແບບຟອມສະໝັກທັງໝົດຂອງຜູ້ສະໝັກ ແລະ ການຄັດເລືອກຄູເຝິກແຕ່ລະຂັ້ນ ໂດຍອີງຕາມມາດຕະຖານ ແລະ ເງື່ອນໄຂທີ່ວາງໄວ້. ນອກນີ້, ປະຊຸມຍັງໄດ້ເຜີຍແຜ່ແບບຟອມການສະໝັກເປັນຄູເຝິກຫຼັກແຫຼ່ງ ແລະ ຄູເຝິກປະຈໍາແຂວງ ທີ່ໄດ້ຈັດຂຶ້ນໃນໄລຍະເດືອນສິງຫາ ແລະ ກັນຍາ 2018. ໂດຍຈະມີການຄັດເລືອກເອົາຄູເຝິກຫຼັກແຫຼ່ງ 45 ຄົນ ແລະ ຄູເຝິກຂັ້ນແຂວງ 450 ຄົນ, ຊຶ່ງຄູທີ່ຜ່ານການຄັດເລືອກ ຈະໄດ້ຮັບການຊັບຊ້ອນໄປເຮັດວຽກໃນເດືອນກໍລະກົດ ແລະ ເດືອນສິງຫາ 2019 ເພື່ອໄປເຝິກອົບຮົມໃຫ້ແກ່ຄູສອນ ປ1 ຄູເຝິກທີ່ມີຄວາມຊໍານິຊໍານານງານ ແມ່ນສ່ວນໜຶ່ງທີ່ສໍາຄັນ ໃນການພັດທະນາຄູສອນໃຫ້ມີຄຸນນະພາບ.
