ງານມະຫາກໍາສີມືຫັດຖະກໍາລາວຄັ້ງທີ 17 ໄດ້ຮັບຄວາມສົນໃຈຈາກມວນຊົນເປັນຢ່າງຍິ່ງ

ງານມະຫາກໍາສີມືຫັດຖະກໍາລາວ ໄດ້ຈັດຂຶ້ນລະຫວ່າງວັນທີ 27 ຕຸລາ-4 ພະຈິກນີ້, ທີ່ສູນການຄ້າລາວ-ໄອເຕັກ ນະອນຫຼວງວຽງຈັນ, ໂດຍການເຂົ້າຮ່ວມເປີດງານຂອງທ່ານນາງ ນາລີ ສີສຸລິດ ພັນລະຍາ ນາຍົກລັດຖະມົນຕີແຫ່ງ ສປປ ລາວ ທີ່ປຶກສາອາວຸໂສ ສະມາຄົມ ຫັດຖະກໍາລາວ, ທ່ານຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ, ຮອງປະທານສະພາການຄ້າ ແລະ ອຸດສາຫະກໍາແຫ່ງຊາດ, ຮອງລັດຖະມົນຕີ ກະຊວງ ຖວທ, ຄະນະບໍລິຫານງານສະພາການຄ້າ ແລະ ອຸດສາຫະກໍາແຫ່ງຊາດ ແລະ ບັນດາເອກອັກຄະລັດຖະທູດ, ຜູ້ຕາງໜ້າອົງການຈັດຕັ້ງສາກົນປະຈໍາລາວເຂົ້າຮ່ວມເປັນຈໍານວນຫຼາຍ.

ທ່ານ ຫານຊະນະ ສີສານ ປະທານສະມາຄົມຫັດຖະກໍາລາວ ໃຫ້ຮູ້ວ່າ: ການຈັດງານຄັ້ງນີ້, ເພື່ອເປັນການສົ່ງເສີມການຕະຫຼາດໃຫ້ແກ່ສິນຄ້າຫັດຖະກໍາ, ພ້ອມທັງເປັນການເຕົ້າໂຮມຄວາມສາມັກຄີໃນໝູ່ຊາວຊ່າງຫັດຖະກໍາທຸກຊົນເຜົ່າຢູ່ທຸກໆທ້ອງຖິ່ນໃນທົ່ວປະເທດເພື່ອພ້ອມກັນອະນຸລັກສີໄມ້ລາຍມືທາງດ້ານຫັດຖະກໍາ, ຂຸດຄົ້ນທ່າແຮງທາງດ້ານຫັດຖະກໍາຢູ່ທຸກທ້ອງຖິ່ນ, ທັງເປັນການເສີມຂະຫຍາຍພູມປັນຍາຂອງຊົນເຜົ່າຕ່າງໆ, ຜະລິດເຄື່ອງຫັດຖະກໍາໃຫ້ມີຄວາມຫຼາກຫຼາຍ, ມີຄວາມສວຍງາມປານີດ, ເປັນເອກະລັກຂອງຊົນເຜົ່າຂອງທ້ອງຖິ່ນ, ນອກນີ້, ຍັງເປັນການສ້າງໂອກາດໃຫ້ຊາວຫັດຖະກໍາໄດ້ມາພົບປະ ແລກປ່ຽນບົດຮຽນ, ປະສົບການທາງດ້ານການຜະລິດຫັດຖະກໍາ, ທັງໄດ້ພົບປະ ແລະຫາຄູ່ຄ້າລາຍໃໝ່, ທີ່ສໍາຄັນຍັງເປັນການສະໜັບສະໜູນປີທ່ອງທ່ຽວລາວ 2018 ແລະ ສ້າງຜະລິດຕະພັນທ່ອງທ່ຽວໃຫ້ມີສິ່ງໃໝ່ຫຼາກຫຼາຍຂຶ້ນຕື່ມອີກ.

ໃນງານປີນີ້, ມີຮ້ານຂາຍເຄື່ອງຫັດຖະກໍາ ປະມານ 200 ກວ່າຮ້ານ ທີ່ີມາຈາກທຸກພາກຂອງປະເທດ, ຊຶ່ງມີຜະລິດຕະພັນຫັດຖະກໍາຜ້າໄໝ, ຜ້າຝ້າຍພື້ນເມືອງ, ເຄື່ອງເງິນ-ວັດຖຸມີຄ່າ, ເຄື່ອງທອງເຫຼືອງ, ເຄື່ອງປັ້ນດິນເຜົາ, ເຄື່ອງຈັກສານຈາກໄມ້ປ້ອງ, ຫວາຍ, ເຄື່ອງຊົນເຜົ່າຕ່າງໆ, ພ້ອມນີ້, ຍັງມີການສາທິດການຜະລິດສິນຄ້າຫັດຖະກໍາລາວດ້ວຍມື, ເດີນແບບຊຸດຊົນເຜົ່າໄຕດໍາ-ໄຕແດງແບບບູຮານ ແລະ ຊົນເຜົ່າກຶມຫມຸ, ສະແດງລະຄອນເວທີ, ການສົນທະນາຫັດຖະກໍາຕິດພັນກັບການທ່ອງທ່ຽວ ແລະ ອື່ນໆ, ມີການສາທິດການລ້ຽງມ້ອນໜາມເປັນມ້ອນປ່າທີ່ກິນໃບມັນຕົ້ນ ເພື່ອເປັນທາງເລືອກໃໝ່ໃຫ້ແກ່ການຜະລິດເສັ້ນໄຍທີ່ນໍາມາຕໍ່າຜ້າ. ນອກນີ້, ຍັງມີການປະກວດຜະລິດຕັນພັນຫັດຖະກໍາສໍາເລັດຮູບ, ກິດຈະກໍາຕ້ອນຮັບປີທ່ອງທ່ຽວລາວ ແລະ ອື່ນໆຢ່າງຫລວງຫລາຍ.