ລັດຈະເລັ່ງແກ້ໄຂຂໍ້ຄົງຄ້າງ ແລະ ສິ່ງຫຍໍ້ທໍ້ຕ່າງໆໃນສັງຄົມ

ໃນກອງປະຊຸມລັດຖະບານປະຈໍາເດືອນຕຸຸລາ 2018 ຜ່ານມາ, ໂດຍການເປັນປະທານຂອງທ່ານນາຍົກລັດຖະມົນຕີ ທອງລຸນ ສີສຸລິດ ໄດ້ຕົກລົງເປັນເອກະພາບກັນເອົາໃຈໃສ່ແກ້ໄຂບັນດາຂໍ້ຄົງຄ້າງຕ່າງໆ ຄື: ສືບຕໍ່ຮັກສາຄວາມສະຫງົບ ແລະ ເປັນລະບຽບຮຽບຮ້ອຍຂອງສັງຄົມ, ເພີ່ມທະວີຄວາມເອົາໃຈໃສ່ແກ້ໄຂປະກົດການຫຍໍ້ທໍ້, ໂດຍໃຫ້ທົ່ວສັງຄົມມີສ່ວນຮ່ວມຊ່ວຍກັນຕອບຕ້ານ ແລະ ສະກັດກັ້ນທຸກກົນອຸບາຍເລ່ລ່ຽມທີ່ເຄື່ອນໄຫວກໍ່ຄວາມບໍ່ສະຫງົບຂອງສັດຕູ ແລະ ກຸ່ມຄົນບໍ່ດີ, ສືບຕໍ່ບຸກບືນເກັບລາຍຮັບຈາກພາສີທີ່ດິນ, ການນໍາເຂົ້າ-ສົ່ງອອກສີນຄ້າ, ຈາກໜີ້ຄ້າງມອບຄ່າສໍາປະທານທີ່ດິນ, ຄ່າສໍາປະທານຂຸດຂົ້ນແຮ່ທາດຕ່າງໆ, ຄ່າພາກຫລວງ ແລະ ອື່ນໆ. ສືບຕໍ່ຄຸ້ມຄອງ ແລະ ຮັກສາສະຖຽນລະພາບເງິນຕາໃຫ້ມີຄວາມໝັ້ນທ່ຽງ, ຄຸ້ມຄອງອັດຕາແລກປ່ຽນໃຫ້ຢູ່ໃນລະດັບທີ່ກໍານົດໄວ້, ຄຸ້ມຄອງການເຄື່ອນໄຫວຂອງທະນາຄານທຸລະກິດ ແລະ ເພີ່ມທະວີການຕິດຕາມ-ກວດກາສີນເຊື່ອຂອງບັນດາສະຖາບັນການເງິນຈຸລະພາກໃຫ້ເຄື່ອນໄຫວຖືກຕ້ອງຕາມລະບຽບກົດໝາຍ, ເອົາໃຈໃສ່ຄຸ້ມຄອງລາຄາສີນຄ້າໃນທ້ອງຕະຫລາດບໍ່ໃຫ້ມີການສວຍໂອກາດຂຶ້ນລາຄາ ເນື່ອງຈາກລາຄານໍ້າມັນເໜັງຕິງເພື່ອບໍ່ໃຫ້ກະທົບຕໍ່ຊີວິດການເປັນຢູ່ຂອງປະຊາຊົນ. ຄຽງຄູ່ກັນນັ້ນ ກໍຈະສືບຕໍ່ໂຄສະນາຂົນຂວາຍ ເພື່ອດຶງດູດນັກທ່ອງທ່ຽວເຂົ້າມາປະເທດເຮົາໃຫ້ຫລາຍຕາມຕົວເລກກໍານົດໄວ້.

ລັດຖະບານຍອມຮັບວ່າ ບັນດາຂໍ້ຄົງຄ້າງດັ່ງກ່າວກໍບໍ່ແມ່ນບັນຫາໃໝ່, ແຕ່ໃນຜ່ານມາການແກ້ໄຂຍັງມີຂໍ້ຫຍຸ້ງຍາກຫລາຍດ້ານ ຍ້ອນປັດໃຈພາຍໃນ ແລະ ພາຍນອກ ຈຶ່ງສົ່ງຜົນໃຫ້ການປະຕິບັດແຜນພັດທະນາເສດຖະກິດ-ສັງຄົມ ແລະ ຕົວເລກຄາດໝາຍຫລາຍດ້ານທີ່ສະພາແຫ່ງຊາດໄດ້ຮັບຮອງ ບໍ່ສາມາດບັນລຸຕາມແຜນການວາງໄວ້.