ຄະນະຜູ້ແທນລາວເຂົ້າຮ່ວມງານວາງສະແດງທ່ອງທ່ຽວຈີນ-ອາຊຽນ

ງານວາງສະແດງທ່ອງທ່ຽວຈີນ-ອາຊຽນ (China-ASEAN EXPO Tourism Exhibition) ໄດ້ຈັດຂື້ນທີ່ ກຸຍຫລິນ ສປຈີນ ໃນລະຫວ່າງວັນທີ 25-28 ຕຸລານີ້, ໂດຍມີຫົວໜ່ວຍທຸລະກິດທ່ອງທ່ຽວ ສປຈີນ-ອາຊຽນ ກໍຄືຜູ້ຊື້-ຂາຍຈາກທົ່ວໂລກຫລາຍກວ່າ 800 ຫົວໜ່ວຍເຂົ້າຮ່ວມ.

ຄະນະຜູ້ແທນລາວນຳໂດຍທ່ານ ອຸ່ນທວງ ຂາວພັນ ຮອງລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແລະ ໄດ້ຮັບກຽດຂື້ນກ່າວມີຄໍາເຫັນວ່າ: ພັກ-ລັດຖະບານ, ໄດ້ຖືເອົາວຽກງາານທ່ອງທ່ຽວເປັນບຸລິມະສິດສຳຄັນປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງຊາດ, ສປປ ລາວ ໄດ້ປະກາດປີ 2018 ເປັນປີທ່ອງທ່ຽວລາວ ແລະ ມີນັກທ່ອງທ່ຽວໄດ້ເພິ່ມຂື້ນໃນ 6 ເດືອນຕົ້ນປີນີ້ 2 ລ້ານກວ່າຄົນ, ໃນນັ້ນນັກທ່ອງທ່ຽວຈາກຈີນມີຫລາຍກວ່າ 4 ແສນຄົນ ເພີ່ມຂື້ນ 50% ຖ້າທຽບໃສ່ໄລຍະດຽວກັນຂອງປີ 2017 ແລະ ຕັ້ງເປົ້າໝາຍວ່າຮອດປີ 2019 ຈະດຶງດູດນັກທ່ອງທ່ຽວຈາກຈີນເຂົ້າມາທ່ຽວລາວໃຫ້ໄດ້ປະມານ 1 ລ້ານຄົນ.

ໃນໂອກາດນີ້, ຄະນະຜູ້ແທນລາວຍັງໄດ້ເຂົ້າຮ່ວມກອງປະຊຸມຫົວຂໍ້: “ອານາຄົດຂອງການທ່ອງທ່ຽວໄປສູ່ປີ 2030 (The Future of Tourism Road to 2030)” ໂດຍເນັ້ນໃສ່ການພັດທະນາຜະລິດຕະພັນທ່ອງທ່ຽວທີ່ມີຄຸນນະພາບ, ເປັນມິດຕໍ່ສິ່ງແວດລ້ອມ, ບຸກຄະລາກອນການທ່ອງທ່ຽວມີມາດຕະຖານ ແລະ ການນໍາໃຊ້ເທັກໂນໂລຊີເຂົ້າໃນການວຽກງານການທ່ອງທ່ຽວ.