ສະຫລອງວັນມໍລະດົກພາບ-ສຽງໂລກ ຄົບຮອບ 38 ປີ
ພິທີສະເຫຼີມສະຫລອງວັນມໍລະດົກພາບ-ສຽງໂລກ 27 ຕຸລາ ຄົບຮອບ 38 ປີ ພາຍໃຕ້ຫົວຂໍ້ “ເລື່ອງຂອງທ່ານກຳລັງມີການເຄື່ອນໄຫວຢູ່” ໄດ້ຈັດຂຶ້ນໃນວັນທີ 26 ຕຸລານີ້, ທີ່ກົມຮູບເງົາ ນະຄອນຫລວງວຽງຈັນ.
ໃນໂອກາດດັ່ງກ່າວ, ທ່ານ ວິທູນ ສູນດາຣາ ຫົວໜ້າກົມຮູບເງົາ ໄດ້ກ່າວວ່າ: ມະຕິກອງປະຊຸມໃຫຍ່ ອົງການອຸຍແນັສໂກ ສະໄໝທີ 33 ໃນປີ 1980 ໄດ້ຮັບຮອງ ແລະ ປະກາດເອົາວັນທີ 27 ຕຸລາ ເປັນວັນວັນມໍລະດົກພາບ-ສຽງໂລກ ເພື່ອສ້າງຄວາມຮັບຮູ້ຂອງມວນຊົນ ເຖິງຄວາມຈຳເປັນໃນການປົກປັກຮັກສາມໍລະດົກພາບ-ສຽງ, ເນັ້ນໃນການເຂົ້າເຖິງການສຳເນົາພາບ-ສຽງ, ດຶງດູດສື່ມວນຊົນໃຫ້ເຫັນຄວາມສຳຄັນຂອງມໍລະດົກ, ຍົກສູງສະຖານະພາບຂອງ ມໍລະດົກພາບ-ສຽງດ້ານວັດທະນະທຳ ແລະ ເນັ້ນໃຫ້ເຫັນມໍລະດົກພາບ-ສຽງ ທີ່ຢູ່ໃນພາວະອັນຕະລາຍ ທີ່ຈະເສື່ອມເສຍ.
ສໍາລັບ ສປປ ລາວ ໃນຖານະທີ່ເປັນສະມາຊິກ ສະມາຄົມສຳເນົາພາບ-ສຽງອາຊີຕາເວັນອອກສ່ຽງໃຕ້ ແລະ ປາຊີຟິກ, ພັກ, ລັດ ໂດຍສະເພາະ ກະຊວງຖະແຫລງຂ່າວ ວັດທະນະທຳ ແລະ ທ່ອງທ່ຽວ ແມ່ນເຫັນເຖິງຄວາມສຳຄັນ ກ່ຽວກັບວຽກງານສຳເນົາພາບ-ສຽງ ທີ່ໄດ້ບັນທຶກເຫດການທາງປະຫວັດສາດ ແຫ່ງການຕໍ່ສູ້ປົດປ່ອຍຊາດ, ວິຖີຊີວິດ ແລະ ວັດທະນະທຳ-ຮີດຄອງປະເພນີ ອັນດີງາມຂອງຊາດ ໃຫ້ຍັງຄົງຮັກສາໄວ້ຢ່າງຍຶນຍົງ ເພື່ອໃຫ້ຄົນຮຸ້ນຫລັງໄດ້ສຶກສາ, ຄົ້ນຄວ້າ ແລະ ຮໍ່າຮຽນ ຄວາມເປັນມາຂອງຊາດລາວ ກໍຄືຮາກເຫງົ້າແຫ່ງວິຖີຊີວິດ ແລະ ວັດທະນະທຳຂອງຄົນລາວ ທີ່ມີຢູ່ໃນມ້ວນຟິມ, ແຜ່ນສຽງ, ກະແຊັດວິດີໂອ, ກະແຊັດສຽງ ແລະ ເຄື່ອງບັນທຶກປະເພດອື່ນໆ.
ໃນໂອກາດດຽວກັນນີ້, ທ່ານ ວິທູນ ສູນດາຣາ ກໍໄດ້ຕາງໜ້າມອບລາງວັນ SEAPAVAA Fellow ໃຫ້ ທ່ານ ບຸນເຈົ້າ ພິຈິດ ຜູ້ອຳນວຍການໂທລະພາບແຫ່ງຊາດລາວ, ອາດີດຫົວໜ້າກົມຮູບເງົາ ທັງເປັນອາດີດອຳນວຍການສູນສຳເນົາຟິມຮູບເງົາ ແລະ ວິດີໂອແຫ່ງຊາດ ແລະ ອາດີດຄະນະບໍລິຫານງານຊີປາວາ ເນື່ອງຈາກວ່າທ່ານ ບຸນເຈົ້າ ພິຈິດ ເປັນບຸກຄົນດີເດັ່ນ ຜູ້ທີ່ມີຜົນງານໃນການນຳພາ ແລະ ປະກອບສ່ວນສຳຄັນ ເຂົ້າໃນວຽກງານສຳເນົາ, ໄດ້ອຸທິດກຳລັງກາຍ ໃນວຽກງານສຳເນົາຮູບເງົາເປັນເວລາ 30 ປີ ເຊິ່ງເພິ່ນໄດ້ເປັນຜູ້ລິເລີ່ມ, ກໍ່ຕັ້ງ, ນຳພາ ແລະ ພັດທະນາວຽກງານສຳເນົາຟິມຮູບເງົາ ຢູ່ລາວ ແລະ ທ່ານໄດ້ນຳໃຊ້ຄວາມຮູ້, ຄວາມສາມາດ ແລະ ປະສົບການຂອງຕົນ ເຂົ້າໃນການປົກປັກຮັກສາຟິມຮູບເງົາປະຫວັດສາດໃຫ້ຍືນຍົງ ແລະ ຄົງຕົວ ເພື່ອເຮັດໃຫ້ຟິມຮູບເງົາເຫລົ່ານັ້ນ ກາຍເປັນມໍລະດົກ, ເປັນຂໍ້ມູນທີ່ລໍ້າຄ່າ ສຳລັບຄົນຮຸ້ນຫລັງ ໄດ້ສຶກສາຄົ້ນຄວ້າຮໍ່າຮຽນຈາກຜົນງານດັ່ງກ່າວນັ້ນ, ໃນກອງປະຊຸມໃຫຍ່ ຊີປາວາ ຄັ້ງທີ 22 ທີ່ຈັດຂຶ້ນໃນລະຫວ່າງວັນທີ 6-12 ເມສາ 2018 ທີ່ນະຄອນຫລວງບາງກອກ ປະເທດໄທ ໄດ້ຕົກລົງມອບລາງວັນ SEAPAVAA Fellow ໃຫ້ທ່ານ ບຸນເຈົ້າ ພິຈິດ.
