ເປ້ຍ ເຫລົາພັກດີ ສືບຕໍ່ຝຶກຊ້ອມປົກກະຕິ ຫວັງສ້າງຜົນງານເດັ່ນໂດດເດັ່ນຂຶ້ນກວ່າເກົ່າ

ເປ້ຍ ເຫລົາພັກດີ ນັກກິລາຍົກນ້ຳໜັກຄົນພິການທີມຊາດລາວ ຍັງສືບຕໍ່ຝຶກຊ້ອມຢ່າງເປັນປົກກະຕິ ຫລັງສ້າງຜົນງານຍາດໄດ້ຫລຽນຄຳປະຫວັດສາດໃຫ້ກັບ ສປປ ລາວ ໃນງານມະຫາກຳກິລາເອຊຽນ ພາຣາເກມ ຄັ້ງທີ XII ທີ່ປະເທດອິນໂດເນເຊຍ ເປັນເຈົ້າພາບ ເມື່ອບໍ່ດົນມານີ້ ເພື່ອຫວັງສ້າງຜົນງານໃຫ້ໂດດເດັ່ນຂຶ້ນກວ່າເກົ່າ.

ທ່ານ ສຸກທະວີສອນ ຄູນສີປະເສີດ ຫົວໜ້າຄູຝຶກສອນກິລາຍົກນ້ຳໜັກຄົນພິການທີມຊາດລາວ ໃຫ້ສໍາພາດວ່າ: ພາຍຫລັງພວກເຮົາປະສົບຜົນສຳເລັດໃນການຍາດໄດ້ຫລຽນຄຳ ໃນງານມະຫາກຳກິລາ ເອຊຽນ ພາຣາເກມ 2018 ທີ່ນະຄອນຫລວງຈາກາຕາ ປະເທດອິນໂດເນເຊຍ ເປັນເຈົ້າພາບ ເຊິ່ງທ້າວ ເປ້ຍ ເຫລົາພັກດີ ນັກກິລາຍົກນ້ຳໜັກຄົນພິການທີມຊາດລາວ ໃນຮຸ່ນນ້ຳໜັກ 49 ກິໂລກຣາມ ກໍເຮັດໃຫ້ນັກກິລາຄົນພິການລາວເຮົາມີຄວາມຕັ້ງໃຈ ແລະ ຫ້າວຫັນຂຶ້ນ ທີ່ຈະສ້າງຜົນງານຕໍ່ໄປ ເຊິ່ງປັດຈຸບັນນີ້ ພວກເຮົາມີນັກກິລາຍົກນ້ຳໜັກຄົນພິການມາຮ່ວມຝຶກຊ້ອມ 5 ຄົນ, ຍິງ 3 ຄົນ ໂດຍຝຶກຊ້ອມປະຈຳທຸກໆວັນຈັນ, ພຸດ ແລະ ວັນສຸກ ໂດຍໄດ້ຮັບການສະໜັບສະໜູນຈາກໂຄງການ ເອດີດີພີ ຂອງປະເທດຍີ່ປຸ່ນ.

ສຳລັບການຝຶກຊ້ອມ ໄດ້ເລີ່ມມາເປັນອາທິດທີ 2 ແລ້ວ ໂດຍເປົ້າໝາຍຂອງກິລາຍົກນ້ຳໜັກລາວ ແມ່ນພັດທະນາຕໍ່ໄປ ເພື່ອສ້າງຊື່ສຽງໃຫ້ກັບປະເທດຊາດ.