ຈີນ-ອິນເດຍ ສັນຍາຈະເພີ່ມການຮ່ວມມືທະວີພາຄີ
ຈີນ ແລະ ອິນເດຍ ໃຫ້ສັນຍາກັນຢູ່ນະຄອນຫລວງນິວເດລີວ່າ: ຈະຮັດແໜ້ນການຮ່ວມມືສອງຝ່າຍ ໂດຍສະເພາະດ້ານກົດໝາຍ ແລະ ຄວາມໝັ້ນຄົງ.
ນາຍົກລັດຖະມົນຕີ ນາເຣນທຣາ ໂມດີ ຂອງອິນເດຍ ກ່າວລະຫວ່າງພົບປະກັບທ່ານ ເຈົ້າ ເຂີຈື ລັດຖະມົນຕີກະຊວງຄວາມໝັ້ນຄົງຂອງຈີນວ່າ: ອິນເດຍຍິນດີຈະປະສານກັບຈີນໃນການຮັກສາຍຸດທະສາດດ້ານການຄົມມະນາຄົມ, ສົ່ງເສີມຄວາມໄວ້ວາງໃຈກັນທາງການເມືອງ ລວມທັງການຮ່ວມມືດ້ານປະຕິບັດການທາງກົດໝາຍ ແລະ ຄວາມໝັ້ນຄົງ ລວມທັງສົ່ງເສີມການຍົກລະດັບການພົວພັນລະຫວ່າງອິນເດຍກັບຈີນ. ທາງດ້ານລັດຖະມົນຕີຈີນ ກ່າວວ່າ: ຈີນ ແລະ ອິນເດຍ ຄວນສົ່ງເສີມຍຸດທະສາດຄວາມໄວ້ວາງໃຈຮ່ວມກັນ, ການຮ່ວມມືໃນທຸກດ້ານ ລວມທັງກົດໝາຍ ແລະ ຄວາມໝັ້ນຄົງ ໂດຍສະເພາະການຕໍ່ຕ້ານການກໍ່ການຮ້າຍ ແລະ ອາຊະຍາກຳຂ້າມຊາດ. ນອກຈາກນີ້ ທ່ານ ເຈົ້າ ເຂີຈື ຍັງໄດ້ພົບປະກັບເຈົ້າໜ້າທີ່ລະດັບສູງຝ່າຍຄວາມໝັ້ນຄົງແຫ່ງຊາດອິນເດຍ ໂດຍທັງສອງຝ່າຍໄດ້ລົງນາມໃນຂໍ້ຕົກລົງຮ່ວມມືດ້ານກົດໝາຍ ແລະ ຄວາມໝັ້ນຄົງຮ່ວມກັນ.
