UN ເຕືອນບັນຫາຂາດເຂີນອາຫານໃນເຢເມນ
ຜູ້ອຳນວຍການໂຄງການດ້ານມະນຸດສະທຳສະຫະປະຊາຊາດ ຖະແຫລງວ່າ: ຄວາມຂັດແຍ່ງໃນເຢເມນເຮັດໃຫ້ປະຊາຊົນຫລາຍລ້ານຄົນຈຳເປັນຕ້ອງໄດ້ຮັບການຊ່ວຍເຫລືອທາງອາຫານຢ່າງຮີບດ່ວນ ເຊິ່ງກຳລັງສ່ຽງຕໍ່ວິກິດອຶດຫິວຄັ້ງຮຸນແຮງ.
ທ່ານ ມາກ ໂລຄ໊ອກ ຜູ້ອຳນວຍການດ້ານມະນຸດສະທຳ UN ກ່າວເຕືອນວ່າ: ເກືອບເຄິ່ງຂອງປະຊາກອນໃນເຢເມນ ຫລື ປະມານ 14 ລ້ານຄົນ ສ່ຽງຕໍ່ສະພາບອຶດຫິວ. ລາຍງານທີ່ມີຕໍ່ສະພາຄວາມໝັ້ນຄົງ UN ລະບຸວ່າ: ຊາວເຢເມນ 3 ລ້ານຄົນຢູ່ໃນສະພາບໂພຊະນາການອ່ອນ ເຊິ່ງລວມທັງແມ່ຍິງຖືພາ 1,1 ລ້ານຄົນ ແລະ ເດັກຫລາຍກວ່າ 400.000 ຄົນ. ສົງຄາມຄວາມຂັດແຍ່ງໃນເຢເມນ ເຊິ່ງເປັນປະເທດທີ່ທຸກຍາກທີ່ສຸດໃນກຸ່ມອາຣັບເລີ່ມາແຕ່ປີ 2014 ທີ່ກຸ່ມຊາວຮູທີ ເຊິ່ງເປັນອິດສະລາມຊີອະເຂົ້າໂຄ່ນລົ້ມລັດຖະບານເຢເມນນິກາຍສຸນີ ເຮັດໃຫ້ອາຣັບບີ ຊາອຸດິດ ນຳກອງກຳລັງພັນທະມິດອາຣັບນິກາຍສຸນີເຂົ້າຮ່ວມກັບລັດຖະບານເຢເມນສູ້ຮົບກັບກຸ່ມຊາວຮູທີມາແຕ່ປີ 2015 ຈົນລຸກລາມ ເຮັດໃຫ້ມີຜູ້ເສຍຊີວິດຫລາຍກວ່າ 10.000 ຄົນ ລວມທັງຍັງນຳໄປສູ່ພະຍາດອະຫິວາລະບາດ ແລະ ວິກິດມະນຸດສະທຳ.
