ສິ່ງທີ່ຄວນຮູ້ກ່ອນທ່ານຈະຕັດສິນໃຈໄປດັດແຂ້ວ

ການເບິ່ງແຍງສຸຂະພາບຜົ້ງປາກ ແລະ ແຂ້ວ ປັດຈຸບັນໄດ້ຮັບຄວາມນິຍົມຈົນກາຍເປັນແຟຊັ່ນ ເຊິ່ງມັນມາພ້ອມກັບອັນຕະລາຍທີ່ຫລາຍທ່ານຍັງບໍ່ຮູ້. ການດັດແຂ້ວແຟຊັ້ນບໍ່ແມ່ນການປິ່ນປົວທາງທັນຕະກຳ ແຕ່ເປັນການພະຍາຍາມໃສ່ເຄື່ອງມືເຂົ້າໄປໃນຜົ້ງປາກເອົາແບບຢ່າງການດັດແຂ້ວທີ່ທັນຕະແພດໃຊ້ໃນການປິ່ນປົວຄົນປ່ວຍ ໂດຍທີ່ບໍ່ແມ່ນທັນຕະແພດ ເຊິ່ງເຮັດໃຫ້ເກີດອັນຕະລາຍຕໍ່ສຸຂະພາບຜົ້ງປາກ ແລະ ແຂ້ວ.

ການດັດແຂ້ວແຟຊັ້ນທີ່ພົບທົ່ວໄປມີຢູ່ຫລາຍລັກສະນະ ນັບແຕ່ໃຊ້ລວດເສັ້ນນ້ອຍໆຮ້ອຍມຸກ ຫລື ລູກຕຸ້ມສີຕ່າງໆ ເຊິ່ງໄວໜຸ່ມນິຍົມຊື້ມາໃສ່ເອງ ຫລື ໃຫ້ຄົນຂາຍໃສ່ໃຫ້ ຫລື ໃຊ້ເຄື່ອງມືແບບຕິດແໜ້ນໂດຍເອົາເຄື່ອງມືທີ່ເປັນໂລຫະຮູບ 4 ຫລ່ຽມທີ່ມີຮ່ອງສຳລັບໃສ່ລວດ ແລະ ຮ້ອຍຢາງສີສັນຕ່າງໆລົງໄປ ຈົນກະທັ້ງໃຊ້ເຄື່ອງມືແບບຖອດໄດ້ ທີ່ມີລັກສະນະຄ້າຍຄືເຄື່ອງມືຄົງສະພາບແຂ້ວທີ່ທັນຕະແພດໃຊ້ພາຍຫລັງການດັດແຂ້ວ.

ສຳລັບອັນຕະລາຍທີ່ເກີດຈາກການດັດແຂ້ວແຟຊັ່ນພົບໄດ້ຫລາຍພາກສ່ວນ ທັງຈາກການໃຊ້ເຄື່ອງມືທີ່ບໍ່ສະອາດພຽງພໍ ເຊັ່ນ : ຖາດພິມແຂ້ວບໍ່ໄດ້ຂ້າເຊື້ອ ເຮັດໃຫ້ມີໂອກາດຕິດເຊື້ອພະຍາດຕ່າງໆໄດ້ ເຊັ່ນ : ໄວຣັສຕັບອັກເສບ, ວັນນະໂລກ, ສານບາຫລອດ, ຂີ້ກົ່ວ, ແຄັດມຽມ ຫລື ສານໜູທີ່ຈະໄປສະສົມໃນຮ່າງກາຍຫລາຍ ຈົນເຮັດໃຫ້ເກີດອັນຕະລາຍ ຫລື ກະຕຸ້ນໃຫ້ເກີດອາການແພ້ຕາມມາໄດ້ ແລະ ສິ່ງສຳຄັນຄືອັນຕະລາຍຕໍ່ແຂ້ວ ແລະ ເນື້ອເຍື່ອໃນຜົ້ງປາກ ໂດຍສະເພາະລວດທີ່ໃສ່ເຂົ້າໄປໃນຜົ້ງປາກ ຫາກປັບແຕ່ງໂດຍຜູ້ທີ່ບໍ່ມີຄວາມຮູ້ ຈະເຮັດໃຫ້ເກີດແຮງກົດແຮງບີບແຂ້ວຫລາຍເກີນໄປ ແຂ້ວເລື່ອນຜິດຕຳແໜ່ງບໍ່ເປັນລະບຽບ ເຮັດໃຫ້ມີອາການເຈັບແຂ້ວຫລາຍ ມີແຂ້ວຕາຍ ແລະ ປ່ຽນເປັນສີດຳຄຳ້ ຫລື ມີຮາກແຂ້ວເປື່ອຍ ຈົນເຖິງຂັ້ນຕ້ອງຫລົກແຂ້ວເຫລັ້ມນັ້ນ ອອກໄປ.

ນອກຈາກນີ້, ເຄື່ອງມືດັດແຂ້ວແຟຊັ້ນອາດເຮັດໃຫ້ເກີດການບາດຢູ່ຜົ້ງແກ້ມ ຫລື ປລາສະຕິກກົດທັບເຫືອກຈົນກາຍເປັນບາດແຜຊຳ້ເຮື້ອ ເຊິ່ງສ່ຽງຕໍ່ການເປັນພະຍາດມະເຮັງໃນຜົ້ງປາກໄດ້ ທັງນີ້ເຄື່ອງມືທີ່ໃສ່ໃນຜົ້ງປາກຈະຂັດຂວາງການເຮັດຄວາມສະອາດແຂ້ວ ຈົນເຮັດໃຫ້ແຂ້ວເປັນແມງ ຫລື ເຫືອກອັກເສບບວມແດງ ແລະ ມີກິ່ນປາກໄດ້. ນອກຈາກນີ້, ເຄື່ອງມື  ຫລື ອຸປະກອນດັດແຂ້ວແຟຊັ້ນຕ່າງໆຍັງມີໂອກາດຫລຸດລົງຄໍ ຫລື ຫລອດລົມ ເຮັດໃຫ້ເປັນອັນຕະລາຍເຖິງຊີວິດໄດ້.