ອູເບີເປີດໃຫ້ບໍລິການຢູ່ມຽນມາ
ຢາງກຸ້ງ 11 ພຶດສະພາ: ອູເບີ ຜູ້ໃຫ້ບໍລິການເອີ້ນລົດຮັບສົ່ງຜ່ານແອບພິເຄເຊິນໃນມືຖື ເລີ່ມເປີດໃຫ້ບໍລິການຢ່າງເປັນທາງການຢູ່ນະຄອນຫລວງຢາງກຸ້ງ ຂອງມຽນມາ ໃນວັນທີ 11 ພຶດສະພານີ້.
ການເປີດໃຫ້ບໍລິການຂອງອູເບີມີຂຶ້ນ ພາຍຫລັງແກຣ໊ບຕັກຊີ ບໍລິສັດຄູ່ແຂ່ງຈາກສິງກະໂປເລີ່ມເປີດໃຫ້ຊາວມຽນມາທົດລອງໃຊ້ບໍລິການເມື່ອ 6 ອາທິດຜ່ານມາ. ການເອີ້ນລົດຮັບສົ່ງຜ່ານແອບພິເຄເຊິນຖືເປັນເລື່ອງໃໝ່ ແລະ ພວມໄດ້ຮັບຄວາມນິຍົມຈາກຊາວມຽນມາ ເນື່ອງຈາກລົດຕັກຊີໃນປະເທດສ່ວນຫລາຍມີສະພາບຂ້ອນຂ້າງເກົ່າ ແລະ ບໍ່ມີການຕິດຕັ້ງມິເຕີໃນການຄິດໄລ່ຄ່າບໍລິການ. ພະນັກງານບໍລິສັດຊາວມຽນມາຄົນໜຶ່ງກ່າວວ່າ: ລາວຢາກຈະທົດລອງຂີ່ລົດອູເບີ ແລະ ລາວຮູ້ສຶກຍິນດີຕ້ອນຮັບທີ່ບໍລິສັດມາເປີດໃຫ້ບໍລິການໃນປະເທດ ເພາະການບໍລິການລົດຮັບສົ່ງຈະຊ່ວຍເພີ່ມຄວາມສະດວກສະບາຍໃຫ້ແກ່ລູກຄ້າ ໂດຍບໍ່ຕ້ອງມາຢືນຕໍ່ລອງລາຄາກັບຕັກຊີ.
ສ່ວນຜູ້ຂັບລົດຕັກຊີສະແດງຄວາມກັງວົນວ່າ: ການເປີດໃຫ້ບໍລິການຂອງອູເບີຈະສົ່ງຜົນກະທົບຕໍ່ການເປັນຢູ່ຂອງຕົນ. ທັງນີ້ ປັດໄຈເລື່ອງການແຂ່ງຂັນດ້ານລາຄາອາດເປັນສິ່ງສຳຄັນສຳລັບການບໍລິການຂອງອູເບີຢູ່ມຽນມາ ເພາະຄົນພາຍໃນປະເທດສ່ວນຫລາຍມີລາຍຮັບຂ້ອນຂ້າງຕໍ່າ. ອູເບີກຳນົດອັດຕາຄ່າບໍລິການເລີ່ມຕົ້ນ 1.500 ຈ໊າດ (ປະມານ 9.120 ກີບຕໍ່ຄົນ) ແລະ ມີຄ່າບໍລິການຂັ້ນຕໍ່າ 1.800 ຈ໊າດ (ປະມານ 11.040 ກີບ).
