ລາວ-ຈີນ ເພີ່ມທະວີການຮ່ວມມືພັດທະນາກິລາ-ກາຍຍະກໍາ

ພິທີລົງນາມເຊັນບົດບັນທຶກການຕົກລົງເຫັນດີ (MOA) ເພື່ອສຶກສາຄວາມເປັນໄປໄດ້ໃນການພັດທະນາວຽງງານກິລາ-ກາຍຍະກໍາ ໃນໂຄງການຮ່ວມມື (ເຂດອຸດສາຫະກໍາ ວັດທະນະທໍາການກິລາສາກົນ ລາວ-ຈີນ) ໄດ້ມີຂຶ້ນໃນວັນທີ 19 ຕຸລານີ້, ທີ່ນະຄອນຫຼວງວຽງຈັນ ລະຫວ່າງທ່ານ ນາງ ຂັນທະລີ ສີລິພົງພັນ ຫົວໜ້າຫ້ອງການ ກະຊວງສຶກສາທິການ ແລະ ກິລາ, ທ່ານ ປາຍຢູນ ປະທານ ບໍລິສັດ ເປິຍຈິງຟູລຸ້ຍເຮີງທົ່ງການລົງທຶນ ຈໍາກັດ ສປ ຈີນ ແລະ ທ່ານ ຫຼີຄ່າຍ ຜູ້ອໍານວຍການໃຫຍ່ ບໍລິສັດທີ່ປຶກສາດ້ານການລົງທຶນ ແລະ ກໍ່ສ້າງເຂື່ອນໄຟຟ້າ ຈໍາກັດຜູ້ດຽວ ສປ ຈີນ, ມີທ່ານ ບົວລານ ສິລິປັນຍາ ຮອງລັດຖະມົນຕີກະຊວງສຶກສາທິການ ແລະ ກິລາ ເຂົ້າຮ່ວມນໍາດ້ວຍ.

ເພື່ອສົ່ງເສີມການພັດທະນາເສດຖະກິດ ຂອງ 2 ປະເທດລາວ-ຈີນ ໃຫ້ເຕີບໃຫຍ່ຂະຫຍາຍຕົວ ໂດຍການຈັດສັນຊັບພະຍາກອນທໍາມະຊາດໃຫ້ເກີດຜົນປະໂຫຍດສູງສຸດ ແລະ ແທດເໝາະກັບສະພາບຄວາມເປັນຈິງຂອງປະເທດ ແລະ ປັປປຸງຍົກລະດັບທາງດ້ານຄວາມສາມາດຂອງກິລາ-ກາຍຍະກໍາລະຫວ່າງ ລາວ-ຈີນ ແລະ ການແລກປ່ຽນວັດທະນາທໍາດ້ານກິລາອື່ນໆອີກ.

ໂຄງການຮ່ວມມືດັ່ງກ່າວ ເປັນໂຄງການລະດັບສາກົນ ຍົກສູງລະດັບການແຂ່ງຂັນ ແລະ ສົ່ງເສີ່ມຄຸນນະພາບທາງດ້ານຮ່າງກາຍຂອງທົ່ວປວງຊົນລາວ, ສ້າງໃຫ້ ສປປ ລາວ ກາຍເປັນສະຖານທີ່ຝຶກຊ້ອມ ແລະ ຈັດການແຂ່ງຂັນລະດັບສາກົນໄດ້. ເພື່ອປະກອບສ່ວນໃຫ້ໃນການພັດທະນາເສດຖະກິດ-ສັງຄົມ ມີຄວາມເຂັ້ມແຂງ ໂດຍສະເພາະຂົງກຂດວັດທະນາທໍາ-ສັງຄົມ ແລະ ກິລາ-ກາຍຍະກໍາ.