ຜູ້ນຳອາຊີ-ເອີຣົບຮ່ວມກອງປະຊຸມອາເຊັມ
ປະທານສະພາສະຫະພາບເອີຣົບ ໂດນັລ ທັດ ກ່າວໃນພິທີເປີດກອງປະຊຸມສຸດຍອດ ອາຊີ-ເອີຣົບ (ອາເຊັມ) ຄັ້ງທີ 12 ຢູ່ນະຄອນຫລວງບຣຸກແຊນ ປະເທດແບນຊິກ ໂດຍມີຜູ້ນຳປະເທດເອີຣົບ 30 ປະເທດ ແລະ ອາຊີ 21 ປະເທດ ເຂົ້າຮ່ວມກອງປະຊຸມຄັ້ງນີ້.
ທ່ານ ທັດ ກ່າວວ່າ: ເອີຣົບ ແລະ ອາຊີ ຄວນໃຊ້ປະສິດທິພາບທາງເສດຖະກິດຮ່ວມກັນ ໃນການແກ້ໄຂບັນຫາທີ່ທົ່ວໂລກກຳລັງຜະເຊີນ ໂດຍສະເພາະຄວາມຂັດແຍ່ງທາງການຄ້າທີ່ເຮັດໃຫ້ປະຊາຊົນຫລາຍລ້ານຄົນຕົກຢູ່ໃນຄວາມສ່ຽງ ແລະ ເປັນໄພຄຸກຄາມຕໍ່ສະພາບອາກາດໂລກ.
ກອງປະຊຸມຄັ້ງນີ້ ຖືເປັນການລວມປະເທດທີ່ມີມູນຄ່າການຄ້າລວມກັນຄິດເປັນ 55% ຂອງການຄ້າໂລກ ແລະ ມີປະຊາກອນລວມກັນຄິດເປັນ 60% ຂອງປະຊາກອນໂລກ.
ລັດຖະມົນຕີດ້ານກິດຈະການຕ່າງປະເທດຂອງສະຫະພາບເອີຣົບ ກ່າວວ່າ: ຜູ້ນຳເອີຣົບຈະນຳບັນຫາເລື່ອງສິດທິມະນຸດຂຶ້ນມາຫາລືກັບຜູ້ນຳອາຊີ ໂດຍສະເພາະເລື່ອງວິກິດການຊາວໂຣຮິງຢາໃນລັດຍະໄຂ່ຂອງມຽນມາ.
ກອງປະຊຸມຄັ້ງນີ້ມີຂຶ້ນທ່າມກາງຄວາມກັງວົນເລື່ອງສົງຄາມການຄ້າລະຫວ່າງຈີນກັບອາເມລິກາ ແລະ ຄວາມເຄັ່ງຕຶງລະຫວ່າງເອີຣົບກັບນະຄອນຫລວງວໍຊິງຕັນ, ແຕ່ຜູ້ນຳສະຫະພາບເອີຣົບລະບຸວ່າ: ຈະບໍ່ມີການລວມກຸ່ມເພື່ອຕ້ານນະໂຍບາຍຂອງປະທານາທິບໍດີ ທຣຳ ໃນກອງປະຊຸມຄັ້ງນີ້. ນອກຈາກເລື່ອງການຄ້າ ແລະ ສິດທິມະນຸດແລ້ວ, ກອງປະຊຸມສຸດຍອດ ອາຊີ-ເອີຣົບ ຄັ້ງທີ 12 ນີ້ ຍັງເນັ້ນເລື່ອງຄວາມໝັ້ນຄົງຢູ່ແຫລມເກົາຫລີ, ບັນຫາຜູ້ອົບພະຍົບ, ການໂຈມຕີທາງໄຊເບີ ແລະ ການຕໍ່ສູ້ກັບການກໍ່ການຮ້າຍ ແລະ ສະພາບໂລກຮ້ອນ.
