ອາເມລິກາຄັດຄ້ານແຜນກຳນົດເຂດ ຫ້າມບິນເໜືອຊາຍແດນສອງເກົາຫລີ

ແຫລ່ງຂ່າວເປີດເຜີຍວ່າ: ອາເມລິກາຄັດຄ້ານແຜນການຂອງ ສປປ ເກົາຫລີ ແລະ ສ.ເກົາຫລີ ທີ່ຈະກຳນົດເຂດຫ້າມບິນເໜືອຊາຍແດນທີ່ມີການຮັກສາຄວາມປອດໄພຢ່າງໜາແໜ້ນ.

ລາຍງານລະບຸວ່າ: ຜ່ານມາ ອາເມລິກາ ແລະ ສ.ເກົາຫລີ ຕ່າງຢືນຢັນວ່າມີຈຸດຢືນຮ່ວມກັນໃນບັນຫາ ສປປ ເກົາຫລີ, ແຕ່ເບິ່ງຄືວ່າເລີ່ມມີສັນຍານຂອງຄວາມບໍ່ສອດຄ່ອງກັນ ຂະນະທີ່ ສປປ ເກົາຫລີ ແລະ ສ.ເກົາຫລີ ເລີ່ມເດີນໜ້າແຜນການຫລຸດຜ່ອນຄວາມເຄັ່ງຕຶງດ້ານການທະຫານ ແລະ ຮັດແໜ້ນການພົວພັນທາງເສດຖະກິດລະຫວ່າງກັນ. ອາເມລິກາໄດ້ສະແດງຄວາມກັງວົນວ່າ: ຂໍ້ຕົກລົງດ້ານການທະຫານລະຫວ່າງສອງເກົາຫລີອາດສົ່ງຜົນກະທົບຕໍ່ການກຽມພ້ອມດ້ານການທະຫານ ແລະ ສົ່ງຜົນໃຫ້ຄວາມພະຍາຍາມໃນການປົດອາວຸດນິວເຄຼຍບໍ່ຄືບໜ້າ.

ທ່ານ ໄມ ປອມເປໂອ ລັດຖະມົນຕີຕ່າງປະເທດອາເມລິກາ ສະແດງທ່າທີ່ບໍ່ພໍໃຈຂໍ້ຕົກລົງດັ່ງກ່າວໃນລະຫວ່າງການໂອ້ລົມທາງໂທລະສັບກັບທ່ານນາງ ຄັງ ຍອງ ວາ ລັດຖະມົນຕີຕ່າງປະເທດ ສ.ເກົາຫລີ.